الموضوع: ال rpm بيعلى لوحده

المشاركة الأصلية كتبت بواسطة ehab_mansour

مشفتش المشاركة دي قبل ما اكتب مشاركتي الاولي لكن المهم
حسب ما فهمته من شكل البوابة ان عندك في الشمال بيركب واير الأكسراتير و قاصدها من الناحية الأخري فيشة حساس ال tps و تفصيله Throttle Position Sensor و ده المسئول اللي بيحدد وضع البوابة للكنترول (زاوية فتح البوابة)
و جنبها فيشة حساس الأيدل و شكل فيات نظامها زي جنرال موتورز لأن فوهة البوابة من فوق مقسومه جزئين هتلاقي الجزء الصغير ده نازل علي مكان حساس الأيدل و بالتالي الحساس هو اللي بيتحكم في السلانسية

المفروض ان الفيشة بتاعت حساس الايدل دي ليها من الجنب مسمارين يفكوها عشان تطلع الحساس و تغسله جيدا و تنظيف مكانه و اللي بالتالي هيظبطلك سلانسيه العربية و لكن لو مافيش مسامير لفكه هتحاول تغسل فتحته الصغير من فوق جيدا و تحط فيها منظف لحد ما ينزل من تحت عشان تتأكد من نضافة مسار السلانسيه و تغسله كويس كمان من تحت

ياريت تتأكدلنا هلي فيه مسامير في الجنب و من تحت فيه ايه ؟ و لو طبعا نضفت جيدا و متحلتش المشكلة هتحتاج تغير البوابة كاملة لو الحساس لواحده مش بيتفك

وفيه حل كمان ممكن يحللك المشكلة لو الدنيا نضيفه و لكن مش مضبوطة و هو :-
اللي اعرفه ان النظام ده من الحقن بيحتاج الي ideal learn بعد التنظيف او بعد فصل كابل البطارية و هتعمله كالتالي :-
1- افصل بطارية العربية لمده خمس دقائق ثم عيد تركيبها
2- افتح كونتاكت لمدة خمس ثواني ثلاث مرات و اقفله تاني يعني تفتحه لمدة خمس ثواني و تقفله خمسه أخري ثلاث مرات
3- المرة الرابعه تفتح لمدة خمس ثواني و بعدين تدور العربية و تتركها دايرة حتي تسخن ثم تقوم بتشغيل التكييف لمده 5 دقائق مثلا و ان شاء الله هيتظبط السلانسيه معاك بعديها

جرب كل اللي قلتلك عليه و ربنا ييسرلك الحال ان شاء الله و تتحل دون الحاجه لشيء لو لتغيير

والله الموفق

متشكر ليك جدااااا بشمهندس ايهاب
انا مره من فتره عملت ايدل ليرن قبل ما افك البوابه وانضفها ولكن نفس المشكله فضلت كما هى لكن مشكله ال rpm يفضل معلق كأنى دايس بنزين دى مظهرتش غير بعد التنضيف

والمكانيكى الغبى اللى فك البوابه ينضفها مفكش كابل البطاريه فك الفيش وركبها تانى والبطاريه راكبه انا عارف ان ده غلط بس انا مخدتش بالى عشان انبهه
ححاول اعمل ايدل ليرن تانى

والبوابه مفيهاش اى مسامير خااااالص هى كلها حته واحده والحساسين دول راكبين فيها
واللى فهمته من كلامك انى حنضف الحساس اللى فوق اللى فى الصوره ليه 4 طرف
وهل لو نضفت اللى تحت بالمره فيه غلط ؟؟
وانضفه ب wd40 ولا الافضل ايه ؟؟

وهل كده البوابه بتتباع كامله مينفعش الحساس يتفك ؟؟

وشكرا ليك جدا يا بشمهندس