لو رجع بيك الزمن ممكن تشتري النترا 2012 تاني؟

**devil_storm** · 22-07-2012 08:47 AM

المشاركة الأصلية كتبت بواسطة ahmod

تطلع مع فانتزيا على المحور يوم خميس الساعة 8 / 9 بليل !! ؟

او يوم الاحد على الساعة 2 الظهر كدة !! ؟

ولو مازحفتكش وراها المحور من اوله لاخره قول عليا مش بفهم

المشاركة الأصلية كتبت بواسطة se_coralsea

لأ أصول الشد المظبوط و تقييم الاداء لعربيتين يكون طريق مفتوح زي مابيحصل بره لكن في وسط زحام مروي و لعبكة مرورية ده مش شد و لا أختبار

ادى الناس بتقولك اصول الشد اذاى... طريق مفتوح و فى ملفات مش وسط الزحام المرورى!!!

وانا موافق اطلع طبعا يا باشا بس المحور مليان عربيات و ممكن فى اى وقت الطريق يقفل عليك و بيعتمد على الحظ... يعنى ممكن شاهين تسبقنى لو اتزنقت فى حتة و دة مش معناه الشاهين اقوى... يعنى انا ممكن عربية تعبانة 128 كمان تسبقنى فى صلاح سالم لان كلة عربيات و ممكن تقفل عليك و ده بيعتمد على حظ... وصلت؟؟

انا بقى اتحداك فى طريق السخنى او اى طريق فاضى و فى ملفات تختارة, المهم مفهوش عربيات تزنق علينا علشان نشوف شد المواتير بصحيح..
و انا موافق اطلع معاك يوم الخميس القادم الساعة 8 بالليل على طريق السخنى و نشوف مين يزحف التانى.. اكد انك موافق و قولى نتقابل ازاى يا باشا.

**Ahmod** · 22-07-2012 04:07 PM

المشاركة الأصلية كتبت بواسطة SE_coralsea

لأ أصول الشد المظبوط و تقييم الاداء لعربيتين يكون طريق مفتوح زي مابيحصل بره لكن في وسط زحام مروي و لعبكة مرورية ده مش شد و لا أختبار

الطريق المفتوح ده اختبار للمواتير مافيش كلام

لكن احنا هنا بنتكلم على حاجة تانية مش القصد تقييم لاداء ماتور كل عربية

و بعدين مين قالك أني لما شديت مع الفانتازيا بالياريس كان الطريق فاضي
أحنا فضلنا نجري لمسافة تزيد عن ال 140 كم من الاسكندرية للقاهرة الساعة 4 بعد العصر و كنت مقضيها غرز لأني بصراحة كنت مستعجل لدرجة اني لم أخفض سرعة العربية معظم تلك المسافة و ماكانش عندي أستعداد اضرب فرملة واحدة قبل ما اوصل البيت

غرز الصحراوي غير غرز المحور !!

معروف ان الصحراوي واسع والغرز بتتاخد على الواسع جدا وبعرض الحارات كلها ودي مافيش فيها مشكلة وعمرها ماكانت مقياس لثبات العربية

و برضه لما عديت من الفانتازيا بالألنترا علي طريق السويس (الوصلة مابين الشروق و الرحاب) الساعة 5 بعد الظهر وسط غابة من العربيات و الغرز و الملفات و مع ذلك عديت من الفانتازيا بمنتهي السهولة و علي سرعة فوق ال 120 مش تحت ال 100 و بعدها الفانتازيا ماعرفش يعديني تاني ألا بعد كمين طريق السويس لني كنت باهدي علشان ألف من اليوتيرن و أدخل علي الرحاب

لأ و ايه ... ده كمان فيرنا و احنا بنجري سخن و شد معانا و طلع من الفانتازيا ..... هههههههه

المشاركة الأصلية كتبت بواسطة devil_storm

ادى الناس بتقولك اصول الشد اذاى... طريق مفتوح و فى ملفات مش وسط الزحام المرورى!!!

وانا موافق اطلع طبعا يا باشا بس المحور مليان عربيات و ممكن فى اى وقت الطريق يقفل عليك و بيعتمد على الحظ... يعنى ممكن شاهين تسبقنى لو اتزنقت فى حتة و دة مش معناه الشاهين اقوى... يعنى انا ممكن عربية تعبانة 128 كمان تسبقنى فى صلاح سالم لان كلة عربيات و ممكن تقفل عليك و ده بيعتمد على حظ... وصلت؟؟

انا بقى اتحداك فى طريق السخنى او اى طريق فاضى و فى ملفات تختارة, المهم مفهوش عربيات تزنق علينا علشان نشوف شد المواتير بصحيح..
و انا موافق اطلع معاك يوم الخميس القادم الساعة 8 بالليل على طريق السخنى و نشوف مين يزحف التانى.. اكد انك موافق و قولى نتقابل ازاى يا باشا.

واضح كدة انك مش قادر تفهم اللى انا اقصده !!

يا باشا تقييم المواتير والشد على الطريق المفتوح النتيجة معروفة وانا ماقلتش ان الفانتزيا هتطلع لو الطريق مفتوح ولو قلت كدة ابقى بضحك على نفسي

انت قلت ان الالنترا ثابتة لحد ال 180 وبتاخد بيها غرز وممكن تعدي الفانتزيا على اي طريق سواء كان ملفات او غرز او غيره !! ؟ اكنك عايز تقول ان الالنترا في مستوى ثبات الفانتزيا ؟؟

وده اللى انا معترض عليه وبقولك الالنترا مش هتاكل عيش مع الفانتزيا في المناورات والملفات على السرعات العالية

ومين قال ان الزحام المروري عمره ماكان مقياس ؟؟؟

معلش لما تجري وتشد شداية جامدة Aggressive وسواقة على المحور / الدايري في اوقات الذروة !!

ده اختبار لكل حاجة في العربية عشان تبقى عارف

هتكبس وهووب مرة واحدة الطريق يقف Full Brake !! يفتح الطريق تسقط نقلتين تلاتة وتجري Overtaking acceleration !!

الطريق يهدي سيكا وانت عايز تجري على نفس الغيار تديها حتة In gear acceleration !!

وطبعا غرزتين تلاتة قطم على سرعات عالية ورينا ثبات العربية والهاندلنج بتاعها عامل ازاي ؟؟؟

وبعدين يا باشا طريق ايه اللى يزنقك وشاهين تسبقك ايه اللى انت بتقوله ده بس

هو انا بقولك تعالى نجري في شارع فيصل مثلا !! ؟ ولا على كوبري اكتوبر في الضهر ؟؟؟

انا قلتلك اوقات بيكون فيها الطريق زحمة شوية اه بس مش لدرجة اللى انت بتتكلم فيها ؟؟؟

وعلى فكرة !! لو انت اتزنقت في غرزة وقفلت عليك وعربية عدتك !! لو انت اقوى منها هتجبها من قافاها وهتعديها تاني ايه المشكلة !!! ؟؟

اللى انا اقصده او بتكلم فيه عشان الناس تبقى فاهمة احنا بنحكي في ايه !!

الالنترا كماتور اقوى من الفانتزيا معاك

لكن كثبات وهاندلنج عمرها ماهتبقى في مستوى الفانتزيا ولو الطريق ملفات ومناورات على سرعات عالية الالنترا مش هتعرف تعمل حاجة !!

**AshTurbo** · 22-07-2012 06:45 PM

المشاركة الأصلية كتبت بواسطة SE_coralsea

أحذر خطأ الغير ..... مقولة فقط هاتسمعها في مصر

المقولة دي دائماً حطوها في دماغكم بالذات في مصر ..

في مصر السواقة بحرفنة مش هي كل حاجة في عامل كبير أوي أسمه خطأ الغير سواء مشاه أو سواقين عربيات نتيجة لعدم ألتزام الناس بقوانين المرور توقع في أي لحظة تلاقي مفاجأة على الطريق :

- خدوا بالكم دايماً من ال blind area في التجاوز لأن ممن تلاقي ناس بتعدي أو عربية ماشية على سرعة بطيئة .
- فرشة نظرك لازم تبقى واسعة ودي ميزة بتختلف من سواق للتاني وهي أمكانية أنك تشوف الطريق على أتساعه بشكل جيد يخليك تقدر تتفادى المشاكل بسهولة .

**Ahmod** · 22-07-2012 07:19 PM

المشاركة الأصلية كتبت بواسطة se_coralsea

أستاذ أاحمد ..
علي طريقة وصفك للشد في المحور و الدائري
تقدر تقولي خيشت بالعربية كام مرة ؟
و كام مرة كنت هاتلبس في عربيات تانية لولا ستر ربنا ؟
و هل تضمن أن مافيش في مرة شداية و كبساية و غرزاية و قطماية أنك لاقدر الله تخيش في واحد طلع لك فجأة أو أتصرف تصرف مفاجئ مش في حسابك ؟

أحذر خطأ الغير ..... مقولة فقط هاتسمعها في مصر

الحمد لله ماخيشتش بالعربية ولا مرة وانا بجري !!

وكل الخبطات اللى العربية اتخبطتها كانت اما وانا واقف او ماشي براحة او باخد مطب والاقي حاجة لبست فيا وزعلتني في كتير !!

المرة الوحيدة اللى خبطت فيها وانا بجري كانت في شارع الهرم

خدت غرزة يمين وانا مش كاشف الطريق كويس اتفاجاءة بموتسيكل دليفري راح هو منيلها بزيادة وحدف عليا حدفت العكس رحت مريح على مرايا عربية نيسان صني جمبي كسرتها

وقفت واعتذرت وعرضت عليه اني اجبله مرايا جديدة

والحمد لله الواحد مهما يجري وياخد غرز سواء واسعة او قطم او وفي ملفات طالما الواحد عارف امكانيات عربيته وحدود ثباتها + قوة الفرامل عندك

الحمد لله مش بيحصل اي مشاكل طبعا ربنا اللى بيسترها وصحيح ربنا سترها في مواقف كتيير والواحد بيجري بس في نفس الوقت سترها في مواقف كتير وانا ماشي براحة !! يعني الحمد لله كل حاجة بستر ربنا

الواحد يخلي باله ومايتغشمش وربك اللى بيسترها

انا معاك ان فيه ناس كتير بتخيش وهي بتجري وده بيبقى بسبب غباء او غشومية من السواق لانه مش عارف يقدر امكانيات وحدود عربيته

مثلا واحد يكبس جامد والفرامل عنده ضعيفة يلبس !! ياخد غرزة او ملف على سرعة عالية والعربية بتاعته ماتجبهوش تعرض منه يقوم عامل حادثة لاقدر الله

ياخد غرزة يمين وهو مش كاشف الطريق !!

واما نقطة خطأ الغير فخطأ الغير ده ممكن يودي في داهية بغض النظر عن انت بتجري او مش بتجري !! يعني لو كل واحد هيعمل حساب خطأ الغير يبقى هنقعد في البيت وماحدش هيسوق عربيات

انا ممكن ابقى ماشي في حالي والاقي واحد مرة واحدة رمى عليا لبسني في الرصيف ! ابقى باخد مطب في امان الله ويجي واحد من ورة يطيرلي ضهر العربية زي ماحصل معايا من حوالي اسبوعين

**MARTINDALE** · 23-07-2012 11:50 PM

الناس بتحط في المقارنات ظروف غريبه عجيبه , يا جماعه هو انا هجيب العربيه اتخانق بيها ؟؟
90% من الشعب المصري بيجيب العربيه وبيمشي بيها براحته ومش مطلوب منهم يكونوا سواقين F1 .
وليه اشد على الدائري ولا في شارع فيصل او في الهرم وليه اصلا اعمل full break . يا جماعه في عامل مهم جدا لازم ناخده في الاعتبار وهو ان احسن الطرق المصريه غير مخصص لتجاوز سرعه 120كم/ساعه .
الطرق وتصميمها وثباتها ده علم بيدرس برا في اكاديميات وكليات وعندنا بيتاخد بالفهلوه .
الطريق مش بس منحنيات ومطبات هوائيه ونعومه , على سرعه 180 لو خدت حفره صغيره ممكن توديك في خبر كان وطبعا محدش ينكر ان طرقنا الجميله ملياااااانه حفر ونقر وحاجات غريبه . شويه عقل يا شباب علشان خاطر اهاليكم مايزعلوش عليكم .