باركولى الحمد لله جبت لانسر شارك 2012 زيرو الفئة الثالثة اللى موجود فيها جنوط وشبورة وكونسولة ومخادع خلفية وaux مع السى دى وأبنوس .

على فكرة انا بقالى 6 سنوات راكب لانسر 3 سنوات مكواة مستعملة وبعدين جبت بومة زيرو وقعدت 3 سنوات لحد ما بعتها وجبت الشارك .

الفوارق اللى لاحظتها بين البومة والشارك لصالح الشارك مع احترامى وحبى للبومة فالشارك اثبت على الطريق ماتورها اقوى يمكن علشان انا كانت البومة حبيبتى 1300 سى سى . صالون الشارك واسع عن البومة جدا وأشيك بكتير قوى مع انى زعلت لما اكتشفت ان تابلوها فايبر مش جلد زى البومة . عدادات الشارك شيك قوى وفى لوحة ديجيتال فيها كل المعلومات المطلوبة وكأنى أتعامل مع كمبيوتر .جنوطها كبيره وده بيديها ثبات رائع على الطريق . باختصار انا حاسس وانا راكبها انى راكب عربية محترمة زى العربيات الالمانى أو اليبانى الغالية . اد ايه عرفت ان العربية دى مظلومة فى السوق المصرى جدا ولو حبيت ابيعها مع انى حاسس ان عمرى ما هافكر فى ده انا شاء الله هفضل ماسك على السعر العالى ومش هابيعها بالبخس اللى بنشوفه فى سوق السيارات .

ولو سمحتوللى احب أن أضيف بعض المشاكل اللى قابلتنى مع البومة وأستطعت بفضل الله حلها وهى :

أولا : مشكلى ضعف إضاءة التابلوه ودى حلتها باستخدام اللون الاحمر والتكييف كمان ولى موضوع بالمنتدى شرحت فى ازاى عملت كده وكانت الاضاءة شيك وقوية جدا فى نفس الوقت .

ثانيا : مشكلة النأرزة أو صوت النخبيط اللى بنسعمه فى الدريكسيون أثناء المطبات بالاخص واحنا كاسرين شمال ودى حلتها عن طريق استبدال بستم حديد موجود فى علبة الدريكسيون ببستم فايبر ومن غير ما نفك العلبة ولا العفشة خالص وده بيمنع الصوت بنسبة 90% وانا كاتب تفاصيل الموضوع ده فى إضافة لى بالمنتدى .

ثالثا : البارومة اللى بتيجى فى الجزء الخلفى من الاعتاب الجانبية أمام الكاوتش الخلفى ودى حلتها عن طريق ملىء هذا التجويف بعد تنظيفه طبعا بسيليكون عضم وده بيعمل عازل قوى جدا ولا تأتى بارومة فى العربية خالص بعد وضع هذا السيليكون وبردو انا عملت موضوع بالتفصيل عن هذا الحل .


ايه ده ماحدش قاللى مبروك ...............................