الموضوع: القشقاي بتدلل

المشاركة الأصلية كتبت بواسطة boomboomzoro

كنت حاجز القشقاي من معرض بأوفر برايس كانت هتعمل 184 و بكلم المعرض بيقولي مش موجوده و لما توصل هتزيد شويه....فكرت في المستعمل لقيت عربيتين عاملين أقل من 5000 كيلو واحد طالب فيها 188 و واحد طالب 173
تنصحوني بإيه؟
أجيب مستعمل و لا أستني الجديد
اللي أنا مستغرب منه إن واحد شاري عربيه زيرو ب 175 و بعد ما إستعملها عايز يبيعها ب 188
علشان كده بقول القشقاي بتلل عليا هههههههه
رمضان كريم

أحجز من الوكيل و انتظر. ليه تدفع اوفر برايس اصلا ؟ دى فلوس مرميه على الارض و لو مستعجل شوف اللى ب ١٧٣ و لو ما عجبتكش أحجز مع الوكيل زى ما قلتلك و سيبك من الاستغلال ده. العربيه اول ما تعلق نمر سعرها الاصلى بينزل و محدش هيعترف بالاوفر برايس و هو بيشترى منك هيقولك دى عربيه مستعمله سعرها زيرو ١٧٥ و علقت نمر و اللى انت شفتها ب ١٨٨ الف دى صاحبها يعرضها بالسعر اللى هو عايزه حتى لو حط مليون جنيه المهم فى الاخر هيبيع بكام و لا هيرجع فى كلامه علشان مش هيلاقى حد

احجز واستنى ده عالم بتستعبط انا اول مرة اشوف كده

ربنا يصبرنا بقى على الاستغلال والجشع

لا للإستغلال وانصب إحجز واستنى يا إما ما تشتريهاش من الأساس مش من حلاوتها قوى يعنى

ياجماعه والله العظيم تكالبنا على اي سلعه هو اللي بيعلي سعرها في السما خصوصا لما تبقى حاجه شعبيه يعني مثلا في العربيات يقوللك الهيونداي بتعمل وتسوي وتتصلح عند اي حد فبالتالي يفضل غبور يرفع في سعرها الف في الفين لحد اما تبقى المانيوال بحاجه وسبعين !!!

المشاركة الأصلية كتبت بواسطة mody3on

اولا الموضوع عن النيسان قشقاي مش عالهيونداي
ثانيا القشقاي مش عربية شعبية ولا حاجة

أنا كلامي واضح
قلت مثلا
وان كنت مش لاقي حاجه مسخره اتريق عليها قد الهيونداي
ولو لاحظت في كلامي اني قلت (تكالبنا على السلعه)
يعني المقصود جرينا ورا حاجه معينه ايا كانت الفئه السعريه حتى لو نفس الكلام ده بيتقال على مرسيدس
يعني توضيح وجهة نظر مش اكتر
وهو انا هقارن القشقاي بالهيونداي مثلا ؟؟!!!

التوكيلات بتريح دماغها وبترمي على الموزعين
يبقى كل تأخيره وفيها خيره ان شاء الله
وماندفعش فلوس زياده لأي حد
ده المقصود من كلامي

سوق السيارات فى مصر يلزمه الآتى
الغاء الدعم عن البنزين و إلغاء الجمارك عن السيارات الجديده