والله العظيم انت دمك زي السكر .. الجين تو في رأيي شكلها لحد النهارده شبابي جدا و بينافس موديلات 2012 .. و كمان شكل التابلوه عاجبني جدا .. و خاماتها صحيح بعضها مش عالي لكن بالنسبة لي مقبوله برضه جدا لإنها بتتكلم في فئة أقل من 100 ألف بالتالي كده تبقى محترمة والله ..
و فعلا حاجة مستفزة لما جد يقولك ( عندنا ) مفتوحه و حلوة كده !!
و ثبات الجين تو مع تجربتي أفضل من البومة .. مع إني أمتلك البوما لكن الحق يتقال .. و معنى إن البوما تبقى كاتيجوري أعلى من الجين تو في السعر .. و الثبات يبقى بالطريقة دي .. يبقى الجين تو تفوقت على نفسها و في رأيي أفضل ثبات في كل الفئة السعرية دي بالكامل ولو هنقارنها في الثبات يبقى هتتقارن بفئة الـ 150 ألف في الثبات ..
موتورها جيد جدا .. عفشتها ماقدرش أفتي فيها لإني يادوب تجاربي معاها بسيطة بالتالي ماعرفش ليها مشاكل ولا لأ .. بس اصحابي اللي معاهم الجين عمرهم ماشتكوا من عفشة !!! و كمان دي من جيل المالتي لينك يعني تكنولوجيا أعلى من فئتها كلها برضه و ده واضح جدا في الثبات ..
أما الكماليات ماينفعش أبدا برضه تتقارن بفئتها السعرية في الكماليات ..
حتى لو قطع غيارها مش منتشرة أو توكيلها نص كم ... بس كعربية ماينفعش حد يبخسها حقها ... دي أفضل عربية في الفئة السعرية دي في رأيي .
بص يا باشمهندس أحمد .. والله حضرتك بجد إنسان محترم جدا .. و أنا بعتذرلك عن نفسي لو كنت اتكلمت معاك بأسلوب سيء ... بس انت مش واخد بالك خالص من أسلوب الأستاذ lanos2004 .. طيب بالله عليك ده يرضيك ؟؟
الكلام بتاع ميدو في رأيي مافيهوش أي تطاول .. و صدقني أنا اللي كنت فعلا عايز أعمل مشاركات مستفزة بعد كل مشاركة بيدخل بيها الأستاذ lanos2004 بس دايما بقول عادي كلنا اخوات و طبيعي يحصل إن حد يتعصب بزيادة و يكون رده خالي من بعض الذوقيات بدون قصد و بقول أنا برضه في النهاية أخوه الصغير و نستحمل بعض و أركز في الهدف من الكلام و أنفض للحاجات الجانبية الرخمه دي ..
ميدو على فكره أنا لا أعرفه ولا هو يعرفني .. لكن أنا بقول رأيي من باب إحقاق الحق .. ميدو ماطلع منه أي تطاول ..
أما بالنسبة للجين تو فأنا قولت رأيي في تعليقي على كلام ميدو ... ولو فيه حد بيقدس عربيته أكيد مش هيكون أنا ولا برضه شايف ميدو وصل للمرحلة دي .. و حضرتك برضه منطقي في كلامك .. لكن فعلا أنا ماشوفتش حد بيتكلم عن عربيته بالطريقة اللي بيتكلم بيها الأستاذlanos2004 عن عربيته !!!
ميدو طلب منك تجاوبه عن أسئلة معينة و حضرتك برضه بتعاند !!
و حتى بتتكبر و انت بتشكر في الجين تو و انت متضرر ( هيونداي برقبة الجين تو إلا في موضوع الثبات ) ده على أساس إن الثبات ده زي الكاسيت في العربية !!!
و بعدين أنا عمري ماشوفت حد فعلا ساق كل أنواع العربيات و ممكن يقول اللي انت بتقوله عن اللانوس .. أو أصلا ممكن يركب كوري في حياته .. على الأقل بيكون منصف جدا في كلامه .. فمهما تقول إنك ركبت أنا بقول إني مش مقتنع .. الإكس 6 أنا كنت لسه راكبها أول امبارح .. ماعتقدش فيه حد ممكن يقعد في العربية دي و يطلع يشكر في عربية كوري !!! ولا الإكس 6 دي كمان انت قطعتها باللانوس على طريق العين السخنة ؟؟؟ عادي يا عم هاتلنا صورك علشان نصدق معلش ... خدنا على قد عقلنا .. و ياريت فيديوهات و انت سايق بس كمان .. علشان ممكن بجد نعمل عنك فيلم تسجيلي تاريخي عن اللي ساق e300 , 528 , x6 , cayenne و في النهاية يمتلك لانوس و بيقول عليها إنها واو و بتعدي من بي إمات و باسات و غيره و غيره زي مانت بتقول كده .... والله حدث أسطوري .. انت مش متخيل قد إيه الناس هتتفرج على الحلقات دي أكتر من أي مسلسل في رمضان .. علشان كل واحد غلبان زيي كده عنده لانسر أو مازدا أو فوكس أو اوكتافيا أو 316 أو سيفيك .. يطلع يتف على عربيته و على نفسه كمان علشان ماشتراش لانوس !!
وبعدين يا سيدي ربنا من عليك بنعمه و بتركب لانشات و مرسيدس .. طيب معلش إحنا غلابه .. كده هنحسدك يعني يا باشا .. خاف على نفسك و ماتقولش كده كتير قدام الناس .
* بالله عليك ماتتكلم مع الناس في المنتدى بالأسلوب السيء ده .. كده بتضرهم يتكلموا معاك بأسلوب أسوأ و في النهاية هتقلب بغم و حد من المشاركين هتتلغي عضويته و كده ..
اعذرني على أسلوبي اللي فات .. أنا بس حبيت أقول لحضرتك إن ماحدش هيغلب لو حب يتريق على حد .. و حضرتك بصراحه بهدلتني أنا شخصيا تريقه و ربنا يستر و مايكونش فيه حد زعلان منك .... إحنا كلنا هنا في المنتدى هدفنا نتعلم و نساعد و نفيد غيرنا على قد مانقدر .. و أكيد فيه أسلوب أحسن من كده لو عايز توصل معلومة و سامحني لو كنت دخلت شمال برضه و أنا بتكلم معاك بس فعلا لإن من البداية دخلتك ماكانش فيها أي تقدير ..
و في النهاية راحت ولا جت كلها على رأي الباشمهندس أحمد عزت حديد في حديد مش هنتخانق يعني .. و باشا رمضان كريم ، و كل سنة و انت طيب و يارب ماتكون زعلان مني ...
المفضلات