الموضوع: ألنترا md بعد 25000 كم

المشاركة الأصلية كتبت بواسطة khalid_adel

اولا ربنا يباركلك في العربيه يوحفظهالك
وانا بحييك على التقرير المحايد الجميل ده
وبالنسبه للنقطه الاخيره دي احب اتكلم مع حضرتك فيها لاني مهتم بيها وهي القياده الحذرة
وانا كنت بطلق عليها مصطلح من تأليفي الا وهو self traction control :)
وده بيبقى في الغالب من خلال تجربتي المتواضعه في العربيات التورشن بييم (بس مش في كله انا بقول في الغالب)
وفي عربيات تانيه مفيهاش انظمه تحكم الحديثه دي ولكن في سواقتها تحس انك مطمن اوي وتكاد تكون تفرد تريح شويه وانت على 160 وبتاخد غرز
وفي عربيات تانيه فيها انظمة ثبات وتحكم لكني كنت ببقى ماشي على 140 او 120 وبحس اني واقف على الطاره وضهري لقدام ومركز اوي زيادة على اللزوم بعكس المثال السابق
وبيني بينك ده بيرجع لتصميم العربيه والشاسية ونظام العفشه اما انظمه التحكم دي بتيجي لما يحصل مشكله تبتدي هي تشتغل لكن انا بتكلم ان قبل حدوث المشكله preventive system او في السواقه العادية
وتقبل تحياتي وكل سنة وانت طيب

استاذ / خالد

أولا .. أنت واحشني جدا و سعيد بمشاركتك تلك

ثانيا.. أعذرني علي التاخير في الرد لأني كنت مشغول في مقابلة افطار المنتدي اليوم و التي كنت أتمني أن أراك فيها , و كنا علي فكرة في سيرتك أنا و يوكو و كنا بنفتكر رحلة العودة من الاسكندرية و الشد بين الالفا روميو و اللينيا و طبعا الياريس لما عدت منكوا سرقة
ههههههههههه


نيجي بقي لكلامك ..
طبعا كلام سليم جدا و أنا مقتنع أن وسائل الامان لو موجودة مش معني كده أني أعتمد عليها كليا بدليل أني في الاربع سنوات الماضية اللي كان معايا فيها سيارات بها وسائل الأمان و خاصة نظام الفرامل المانعة للأنغلاق لم يعمل بها هذا النظام سوي 3 مرات تحديدا لأني دائما باعتمد علي أسلوب حذر في القيادة أو توقع الخطر و مش معني أن العربية فيها نظام امان او stability control اني أخد الملف علي 180 او 200 كم/ساعة

علشان كده لما حصلت غلطة أن الألنترا جت و أكتشفت أن مافيهاش abs مازعلتش و لا قلقت منها

أما موضوع التورشن بيم .. فأنا شايف أنه قد يكون ميزة في الملفات و ده من خلال تجربة يمكن في البداية قلقت منه مع الحركة العرضية اللي بتحصل في الخلف لكن مع الوقت أحساسي بالخوف زال و بدأت أتشجع أني أخد الملفات علي سرعات أعلي

عموما أتمني أننا نتقابل و نتناقش في الموضوع ده و ياريت تشرفنا في مقابلة هيونداي - نيسان يوم الخميس القادم (9/8) بعد الافطار في كافيه "باين" بالحديقة الدولية بمدينة نصر

الألنترا مش بتنزل مصر بالتكييف الاصلي بتاعها و لا الكاسيت الاصلي كمان و لكن بيتم تركيب نوع اخر بديل هنا في التوكيل علشان الجمارك لأنهم بيعتبروا التكييف و الكاسيت أوبشن و بيتم أحتساب جمارك اضافية و بالتالي سعر العربية هايزيد عن كده

بس الصراحة التكييف كويس جدا

و علي فكرة الكلام ده مش بيحصل بس في هيونداي و العربيات الكوري لأ في ماركات ياباني و اوروبي كمان توكيلاتها بتعمل كده و شوفت فعلا بعض العربيات الياباني أثناء شحنها علي السفن اللي بأطلعها في ميناء السويس و الاسكندرية منزوعة من الكماليات و بيتم تركيب بدائل غير اصليه لها هنا في مصر

و ده الفرق بين التوكيل و الخليجي يا سادة