اقتباس المشاركة الأصلية كتبت بواسطة semsem kane مشاهدة المشاركة
طبيعى فية ناس كتير بتهرب من الهوندا لانها منخفضة بس الكلام دة كان من سنة 2010 , لان موديلات 2012 كلها سواء يابانى او كورى منخفضة

النترا منخفضة جدا , ال rb بردة نفس الكلام , الشارك , السوبارو , وطبعا ال bmw , mercedes

كل الفئات دلوقتى واطية فخلاص الموضوع دة مابقاش مشكلة
بص عشان انا مبحبش افتى, انا هراجع مواصفات العربيات التانية و اقارن بالهوندا و بعدين ابقى أرد, بس اعتقد ان كمان تصميم الهوندا بشكل عام و فرق المسافة بين العجلة الأمامية و الخلفية ممكن يكون عامل بيحسس الناس زيادة بموضوع الوطيان حتى لو مش واقعى, يعنى انا اعتقد البورا صعب تكون اعلى من الهوندا لكن احتكاكاتها فى المطبات اقل لانها قصيرة و رفيعة يعنى ممكن تكون ارشق بمعنى ادق (الموضوع قلب نظام Diet خالص), لكنه عيب فى نفس الوقت فى نظرى لأنها بالنسبة لي ضيقة جدا من ورا و انا بحب العربيات الواسعة و عشان كده فكرت اجيب الهوندا جنب البورا و اسيب البورا لزوجتى.

لكن بردو مع تعدد استفساراتى من ملاكها سواء اصدقاء ليا او معارف لأصدقائى, فى اجماع على جمال الموتور و سرعته, راحة القيادة, نعومة العفشة (بس مش قوتها, يعنى احدهم قارنها باوكتافيا A5 بتاعت والده قالى باللفظ هيا نعمة بس متحسهاش قوية زى الأوكتافيا), و اخيرا وطيان العربية البيتسبب فى حكها فى المطبات و مع عدم وجود مصفحة احدهم اتخرمت منو كارتيرة الزيت بسبب انو عدى فوق حكر قصير متوقعش انو يحك فى العربية اساسا.

و هنا لينا وقفة ده مش عيب فى السيارة ده عيب فى طرقنا طبعا (لأن الموضوع ده لسه حاصل معايا فى البورا من شهرين و هو عيب شائع فى البورا ان كارتيرة الزيت منخفضة), و ثانيا عيب فينا ان مفروض تفهم عربيتك و تبقى عارف موضوع انخفاضها و تتجنب انك تاخد البروز و البلاعات فى وسط العربية.

الخلاصة بالعامى زى ماتقالتلى: الهوندا عربية جميلة و مريحة و جراية و ثابتة بس يعتمد على استخدامك, يعنى لو بتركب ناس كتير فى العربية ,و بتاخد طرق مكسرة او طرق زراعية كتير فالعربية هتتعبك ,لكن طرق سفرك صحراوية نظيفة و مبتعديش على مطبات كتير و مبتركبش ناس كتير فى العربية (مبتحملش يعنى), فالعربية مناسبة ليك.