السلام عليكم يا صقور النيسان

اولا انا حابب اشكركم جميعا و اشكر المنتدى انه ساعدني كتير في اختيار العربية دي
وانا الحمد لله استلمت اخر الشهر الي فات و كنت حابب اعملكم تقريير بس قلت استنى صيانة الاف بالمرة

اولا الحمد لله العربية جميلة جدا و انا حاسس ان سعرها جميل جدا بالنسبة لامكانيتها

نبتدي بالمزايا الي انا شفتها في العربية مع العلم ان انا كان معايا قبل كدا لانسر بومة هاف سبورت وده يا جماعة رأيي المتواضع و يا رب يكون مفيد ليكم

- العفشة ناعمة جدا
- التسارع و السحب يعتبر متناسب مع الموتور 1500
- الصالون واسع جدا سواء من الامام او الخلف
-مساحة الرؤية و الابعاد كويسة و متتخضش من العربية
-تبريد التكييف حلو جدا

العيوب

-صوت تشغيل التكييف عالي قوي يعني انا بتخض اول ما اشغل التكييف
-حاسس ان ادراج الصالون ضيقة ودرج التابوه بعيد عن السواق و مساحات التخزين قليلة
- الكاوتش الصيني كان بيدب في المطبات بس ظبط شوية بعد النيتروجين
- المرأ بتاعة الصالون مش جايبة رؤية واضحه للمساحة الخلفيه
-صوت صفارة حزام الامان مزعج جدا
-مافيش صفارة لما بتعدي 120

انا كمان عندي شوية استفسارات

- هو جهاز الانذار الي فيها بيشتغل ازاي و هل محتاج برمجة ولا لأ
-في فلتر تكييف في العربية دي و لو مافيش ليه او ايه الحكاية
-في تحت كرسي السواق بلستكتين قريبين من ذراع ترجيع الكرسي دول بتوع ايه
-كمان المكان الي بنريح فيه رجلينا لان العربية اتوماتيك المفروض في عربيات تانية بيبقى عليه معدن علشان ما يوسخش فرش الارضية فممكن يركبله حاجه معدن لاني بخاف اجيب رجلي عليه و بفضل حاططها على الدواسة الجلد بتاعة طقم الدواسات
-كمان عايز طريقة اشيل بيها استكيرات المعرض الي اشتريت منه العربية لاني ما بحبش الاعلانات على عربيتي من غير ما اجرح العربية او ابوظ الدوكو

نيجي بقى لتقرير صيانة الاف كيلو

انا كنت عايز اركب سنسور بارك (حساسات ركن) مع صيانة الاف و ابتديت اكلم السبع و مودرن موتورز قلت الي حلاقي عنده السنسور حعمل الصيانة عنده

و فعلا لاقيته عند مودرن موتورز فرع الدراسة و اخدت معاد تركيب بعد الفطار الساعة 9 بليل

المهم رحت قالولي فنيين الكهرباء مش موجودين بعد الفطار و كمان كنت نسيت كتيب الضمان في البيت فقالولي لازم تجيبه يا اما حتدفع تمن الصيانة الي هي مفروض هدية اول مرة

المهم بعد ما المهندس راجع العربية و قفت امر الشغل و اتفقت معاه اني حاجي تاني يوم الصبح

رحت و سلمتهم العربية و رجعت استلمها الساعة 3 لاقيتها خلصت و الصيانة و السينسور كله اتكلف 740 جنيه و انا حطيت موبيل وان بالمرة علشان اعمل صيانة كل 10 الاف
السينسور لوحده و تركيبة حوالي 470 جنيه و هو اكيد برة ارخص بس انا قلت اعملة في التوكيل علشان ضمان الكهرباء

معلش انا مش عارف ارفع الصورة بس يا ريت تقوليلي ارفعها ازاي و انا ححطها علطول

المهم الحمد لله السينسور شغال كويس بس حصلت حاجة غريبة و انا بستلم العربية لاقيت فيه خربشة في الباب الي ورا السواق و رحت اشوف المهندس الي استلم مني العربية لاقيته روح فشفت مهندس تاني و وريتله الخربشة و جابولي مدير الورشة تقريبا قالي احنا معندناش حاجة تعمل كدا دي اتعملت برة قلتله انت مستلمينها سليمة
فراحوا جابو ورقة الاستلام وفعلا ماكنش فيها اي علامة ان في تجريح فقالولي استنى شوية و دخلوني في غرفة استناهم و بعد ربع ساعة قالولي تعالى استلم العربية و كانوا عالجوا الخربوش ازاي ما اعرفش

بس راجعتها كويس و استلمتها الحمد لله و لاحظت ان التكييف بأى احسن من ما سلمتها بس مش عارف ليه.

و الحمد لله على كدا و حبيت اني انقلكم تجربتي و يا رب تكون فاديتكم.