الموضوع: اشتريت نيسان صني (2013) أتوماتيك - العيوب - ياريت تساعدوني

المشاركة الأصلية كتبت بواسطة manwela8

السلام عليكم ورحمة الله

أنا اشتريت نيسان صني (2013) أتوماتيك لون برونزي من حوالي شهر من فرع السبع بالمعادي وعامل تأمين شامل مع أليانز وعامل بيها حوالي 1900 كم وعملت صيانة ال 1000 كم من اسبوع.

الحمدالله..اتخربشت كذا مره بسيطة من الأجناب والإكصدامات واتخطبت مرة فى الإكصدام الامامي تحت الفوج لايت ناحة السواق، بس أنا سايب كل الكلام ده.

العربية واسعة ما شاء الله وعالية عن الأرض وسعرها مناسب بالنسبة لإمكانياتها.

عندي شوية عيوب فيها حابب أعرف رأيكوا فيها وياريت تساعدوني حيث أنها أول سيارة لي:

1- صوت تشغيل التكييف بعد حوالي 3 أسابيع بقى عالي قوي وفي تكه أول ما أشغله (مهندس الصيانة قاللي إن ده صوت طبيعي للكمبريسور)

2- في صوت في الفرامل كدة غريب وساعات بسمعة لما أدوس عليها وأنا واقف ومثلا بحرك الدريكسيون (مهندس الصيانة قاللي إن ده صوت طبيعي عشان الطنابير بتحك في حاجة تانية)

3- في صوت زنه في الزجاج اللي جنبي طول ما هوه مقفول للآخر و بروح منزله شويه الصوت يروح.

4- في صوت بقي تكتكه طول مانا ماشي مش عارف مصدره منين وشيلت كل الحاجات اللي في الشنطة وكمان ربط الكوريك في مكانه وشيلت كل الزلط اللي في الكاوتش والصوت لسه موجود وده أكتر حاجة مضايقاني في العربية وللأسف بان مرة في الصيانة على خفيف والمهندس قاللي إن ده من الزلط اللي في الكاوتش بس أنا متأكد انه من حاجة تانية

5- في صوت صفارة بتتطلع من العجل في الملفات زي لو أكنني باخد أمريكاني وقلت للمهندس عليها قاللي هازبطلك هواء العجل، قولتله مش محتاجة زبط زاويا قاللي لأ.

6- كان في رشح زيت على الموتور والمهندس قاللي ده عادي برده.

7- في صيانة ال 1000 حطيت زيت موتور 10000 بس شيل مش موبيل فهل ده كويس؟

8- حاسس سحب العربية ضعيف.

9- هل تنصحوني بتغيير الكاوتش الصيني؟

10- هل ينفع أشيل الإستيكرات اللي على الزجاج الأمامي؟

منتظر الردود والمساعدة وشكرا.

معظم الي بتقوله طبيعي وفي الغالب حضرتك ممكن تكون اول مره تركب عربيه او ركبت قبل كده بس اول مره تقتني عربيه وكل ده حصل معانا معظمه

تكه الكمبريسور في كل عربيات العالم


التسارع ده موضوع نسبي لازم يتقارن بنفس الموديل بس لو حسيت ان السحب اقل الاول يبقى في حاجه


التخبيط والعربيه واقفه لما بتلف الدركسيون او لما بتدوس فرامل بتحصل في كل العربيات انا كان معايا 4 عربيات موديلات مختلفه كلهم فيهم نفس الحوار ومع كل اصحابي في سياراتهم كده

الكاوتش عموما في الحر ممكن يصفر والجلب بتاعه المقصات وبقيت الجلب برضو بتسخن جامد ف ده بيطريها ويخليها تصفر وبتحصل في عربيات كتير

وعموما الماكسس كاوتش حقير ف لو غيرته هتفرق معاك جامد


الصوت الي في الازاز واجب عليهم يصلحوه طبعا

ترشيح الزيت على الموتور ممكن ميبقاش ترشيح ممكن يكونوا شويه زيت وقعوا من الراجل وهو بيحط الزيت للعربيه ف اسلم حل انك تنضف الترشيح كله وتستعمل العربيه كام يوم وتشوف لو في حاجه رشحت يبقى في مشكله والترشيح هتلاقيه بيجي من مكان راكب على مكان تاني بيكون في النص بيهم جوان هو الي بيرشح

شل عموما افضل من موبيل بس في زيت موبيل جديد اسمه بيك لايف تقريبا جميل جدا

تكتكه الكاوتش وانت ماشي لو بتبان اوي وانت جنب الرصيف ولو في بتزود السرعه التكتكه بتزييد يبقى فعلا في زلطه مثلا في الكاوتش ولا حاجه


صدقني معظمها حاجات طبيعيه والحر عموما بيبهدلالعريبات كلها