صباح الخير لكل اعضاء المنتدى
اولا كل سنه و انتم طيبين بمناسبة عيد الفطر المبارك و انشاء الله العيد اللي جاي يكون كل واحد جاب العربيه اللي بيتمناها وبعتذر مره تانيه اني اتأخرت في التقرير

طبعا بصراحه مافيش عربيه اتهرت تقطيع بسبب و بدون سبب اكتر من السيفيك الجديده فبصراحه اول ماجت الفرصه اما صدقت و خصوصا اني راكب vti 2010 فهقدر اقيم كل الاختلافات و التطورات عن الجيل السابق و بصراحه عمري ما بحكم لا بالشكل و لا بالريفيوهات عشان بحسه شغل هواه الفيصل التجربه العمليه و خصوصا اخوكم من النوع اللي هوايته السواقه و بصراحه الهوايه دي خاربه بيتي عشان بركب زيرو من سنه 95 و اقصى حاجه للعربيه معايا 3 سنين
نيجي للمهم

سيفيك اول فئه lxi 2012

الشكل الخارجي

مش هتكلم كتير عشان الموضوع ده بالذات اتهرى و اتبرى و دي اذواق بس اللي عايز اقوله ان العربيه على بعضها على الطبيعه معقوله جدا يمكن اللي لفت نظري في المؤخره ( لا مؤاخذه ) البومبيه اللي في جانبي الاكصطدام الخلفي من تحت تحسه بارز و مش ماشي مع حجم الفانوس الصغير نسبيا بس احتمال ان التصميم ده عشان الايروديناميك بما انها عليت شويه الله اعلم

الصالون و وضعية الجلوس

طبعا زي مانتوا عارفين ان العربيه تعتبر اوسع من الجيل السابق و موضوع فرامل اليد اللي رجع لورا و كان معانا واحد صاحبنا قاعد ورا طوله 185 سم من غير مشاكل
نيجي لكرسي السائق تحححححححححفه ناعم و زي مايكون مزودينه اسفنج فمريح جدا اريح كرسي قعدت عليه بصراحه
الدركسيون جميل جدا انضف من الجيل السابق بمراحل من ناحية الملمس و الديزاين بتاع الملتي فنكشن تحس انك هتسوق عربيه الماني فخمه
طبعا لاحظت ان كمية البلاستيك زايده في التابلوه و جانبي الابواب و صاحبي قال لي اصل ده مش بلاستيك دي ماده عشان ما تتفاعلش مع الشمس و تسبب غازات مسرطنه و ضاره بالبيئه بصراحه طنشت و قلت اما نمشي على طريق خشن نشوف الوضع
بالنسبه لتصميم العدادات مع انوار التابلوه و التكييف و ال dvd
يخرب بيت الجمال تحس انك راكب عربيه من زمن تاني و الله من كتر جمالها تخطف عينك اكتر من الطريق كمية تناغم في الالوان مع التصميم فعلا تحس انه الجيل الجديد من التصميم ده و سمعت ان ال vti اشد كمان من ناحية شاشة المعلومات

نطلع بالعربيه

طبعا العربيه طلعتها حلوه بس فيه ملاحظه انها وهي على التاني (30-40) اقل تسارع مقارنه بالجيل التامن و الموتور بيعمل صوت نعره من الشكمان و انت بتسحب على 2500 لفه و الصوت ده مش موجود في الجيل التامن بس مش مشكله ده بيدي اثاره
المهم طلعت على الدائري و انا مش متفائل من الاداء بس بصراحه العربيه خيبت ظني
العربيه بتتسارع بعد سرعة 50 بمنتهى الخفه و الرشاقه استجابه غير عاديه لدوسة البنزين
اداء فتيس ناااااااااعم - كيك داون بسهوله زي ما تكون بتقرا افكارك
بالنسبه للثبات هو هو نفس الثبات بتاع الجيل التامن رغم انها عليت

الهاندلينج زي الباسات و خصوصا بعد ما لاحظت ان الفرامل بقت اقوىمع نظام الثبات الالكتروني vsa

بصراحه ممتعه جدا جدا في سواقتها و تحس انها واخده روح جديده و الاداء رشيق عن الجيل السابق
دخلت احود بسرعتي على رمله لقيت ال vsa اشتغل و مافيش اي تأثير على الثبات

نظام توفير الوقود شغال و ملحوظ شكل الاداء في حالة تفعيله

نيجي للعفشه بقت عامله زي عفشه الكورولا 2006 و جربتها في المطبات اللي بمشي عليها بعربيتي لقيتها زي الملبن

العزل احسن من الجيل السابق

التكييف بيشتغل و يفصل من غير الرعشه الشهيره

و اخيرا نزلت من العربيه و كنت زعلان و عايز اسوقها تاني


وفي النهايه مش هاقيم العربيه هاسيبكم تقولوا رأيكم ويا ريت المناقشه تكون موضوعيه و مش عايزين ندخل الكوري