صباح الخير عليكم و كل عام و أنتم بخير.... أتمنى للجميع قضاء عيد فطر سعيد

أولا أنا بشكر المنتدى أنه منحني لقب استشاري الديزل و الدفع الرباعي :)

و أحب اتكلم عن موضوع ممكن يكون اتفتح قبل كدا.... على هيئة مقارنات ما بين محركات البنزين و الديزل

بس عايز أقوله من ناحية وجهة نظر تانية....
نقطة الإعتمادية و قلة أو انعدام الأعطال

الكلام في الأساس عن عربيات الدفع الرباعي و اللي مفترض أنها مصممة لدخول مناطق مفيهاش أي نوع من أنواع الخدمات أو حتى شبكات المحمول.....

أولا نبدأ بمحركات البنزين....

هقول كلام كلنا عارفينه بس مجرد تركيز على بعض النقاط

المحركات القديمة كانت بنظام الكاربراتير.... و طرمبة البنزين كانت بتتحرك مع حركة الموتور (طرمبة على رداخ) و ده طبعا كمحرك كان اعتمادي جدا و كان بسهولة لو حصل أي عطل أو عيب ممكن اصلاحه بدون الحاجة لمعدات أو أدوات معقدة.....

بعد كدا ظهر نظام الحقن و الرشاشات..... و تنظيم الحقن عن طريق كمبيوتر....

على أد ما النظام ده كان مريح جدا من كل مشاكل الاسبراتير اللي كان دايما بيحتاج محترف عشان يظبطه.... على أد ما كان له عيوب من ناحية أن الرشاشات لو فيها عطل أو انسداد ... يتحتاج تتنضف بجهاز مش من السهل توفره أو حمله في العربية....

كمان ظهرت الطرمبة الكهربا.... و اللي بتكون موجوده في التانك..... و مشكلة أي حاجة كهربا.... أنها يا شغالة... يا مش شغالة.....

either 1 or 0
nothing in between....

فلو حصل أي عطل في كهربة العربية... أو فيوز الطرمبة.... أو موتور الطرمبة الكهربا نفسه عمره انتهى صدفة و العربية في مكان صحراوي..... مالهاش غير أنها تتقطر.... أو يتغيرلها طرمبة و هي واقفة...... يعني تشيل معاك طرمبة زيادة احتياطي.....

كدا نقدر نقول على أكبر نقطتين ضعف ممكن يواجهوا عربية فور باي فور فيها نظام الانجكشن و نظام الطرمبة الكهربا.....

ايه حل المشكلتين دول؟؟

ممكن تغيير المنافول الداخل كله.... و تحويل العربية من انجكشن لكربراتير.....

و ده هيحل مشكلة عيب انسداد الرشاشات و كمان مشكلة الطرمبة

أولا ككربراتير.... هيبقا اتخلص من مشكلة الكمبيوتر اللي بينظم الاشعال.... و اللي لو جه عليه شوية مية ممكن يبوظ و يخلي العربية تهيس في المشي.... لأنه ببساطة بيلغيه....

ثانيا.... من ناحية الطرمبة.... لو حصل عطل فيها و عربيتك كاربراتير... ممكن تعلقلها جركن بنزين بحيث البنزين ينزل في الكربراتير من أعلى لأسفل بقعل الجاذبية الأرضية..... لحد ما توصل لأول نقطة تقدر تصلح فيها العربية......

----------------------------------------------------------------------------------

نيجي لمحركات الديزل.....

أولا.... محرك الديزل بيعتمد على نظرية تختلف تماما عن محرك البنزين في الاشتعال.....

و معلومة عالماشي.....

ممكن تحول محرك بنزين لغاز طبيعي.... لكن لا يمكن تحول محرك بنزين لديزل.....

و ده راجع لعوامل كتير...... أهمهم.... إختلاف السبيكة المعدنية اللي معمول بيها محرك الديزل.... و اللي بتكون أتقل و أكثر تحملا للحرارة... نظرا لطبيعة المحرك.....

محرك الديزل أثقل كتير من محرك البنزين (الكلام لو المقارنة بين نفس السعة اللترية)

محرك الديزل مفيهوش بوجيهات.....
محركات الديزل كلها حقن....مفيش حاجة اسمها كاربراتير في الديزل

طرمبات الديزل كلها على التقسيمة.... مفيش حاجة اسمها طرمبة كهربا في التانك و طرمبة ميكانيكية....

(لكن فيه حاجة اسمها طرمبة اسبراتير و طرمبة عادة سيتم شرحهم لاحقا)

طيب بيعتمد على ايه في الاشعال؟؟

دلوقتي من المعروف... أن لما ضغط الهواء بيزيد...... درجة الحرارة بترتفع.....

ازاي بيدور محرك الديزل و بيحصل أول انفجار؟؟

أولا... لما المارش بيدور ترس الفولام .... البساتم بتطلع لفوق.... و لما البستم بيطلع.... بيشكل ضغط جوة غرفة الاحتراق.....

الضغط ده زي ما اتفقنا.... بيتسبب في ارتفاع حرارة غرفة الاحتراق.....

في نفس الوقت بيحصل عملية رش لرذاذ الديزل من خلال الرشاشات ... و اللي أول ما بيسقط داخل الغرفة اللي حرارتها مرتفعة.... بيحترق... و بكدا بيحصل أول انفجار..... و بيفضل المحرك داير.....

و ده سبب أن محركات الديزل بتكون صعب تدور في البلاد الباردة... و طبعا تم حل المشكلة ديه عن طريق السخانات و اللي بتسخن الوقود قبل دخوله غرفة الاحتراق.....


يعني نقدر نقول أن محرك الديزل مفيهوش أي حاجة كهربائية..... كله شغال على حركة ميكانيكية... و دة سر نجاحة و استخدامه في سيارات الخدمة الشاقة.... زي الميكروباصات...و الأتوبيسات و النقل الخفيف و المتوسط و الثقيل.... الخ.....

محرك الديزل ممكن تغسله بمسدس المية في البنزينة بدون ما تقلق من أي شيء.... و هو داير..... و مفيش أي جزء في العربية ممكن تخاف انه ييجي عليه مية أصلا....

محرك البنزين لو جت عليه ميه..... لازم تنشف الأجزاء الكهربائية.... يا اما عمرها ما هتدور معاك..... و لو الكمبيوتر جه عليه مية... ممكن تضطر تغيره.... و كذلك بعض الحساسات في المواتير الحديثة.....

محرك الديزل كل ما الجو يكون حرارته عالية..... كل ما آداؤه يكون أفضل.... (طبعا دورة التبريد عندك لازم تكون جيدة) ...لكن لو مش سليمة أكيد هتحصل مشاكل من السخونة زي أي محرك....

محرك البنزين آداؤه مش بيكون كويس في الحر....


محرك الديزل أفضل في العزم.... (الشد و الجر و التحميل)

أما محرك البنزين فهو أفضل في التسارع.....

و ان كانوا مش بيفرقوا بنسبة كبيرة أوي عند الوصول للسرعة القصوى......


و محركات التيربو ديزل حلت مشكلة التسارع بنسبة كبيرة جدا..... بقا عندك تسارع البنزين بالإضافة الى عزم الديزل.....


ديه مجموعة من الأفكار حبيت أعرضها..... و أتمنى تكون مفيدة ليكم.....

و ياريت اللي عنده أي استفسار ميترددش......

طولت عليكم....

كل سنة و أنتم طيبين :)