النهارده بعد الصلاه روحت على الحرفيين، لقيت العسكرى فاتح بالصدفه كده عشان كانوا بيخدوا حاجه من الورشه و ماشيين، المهم كلمت ميدو و اول ما قلتيلو Steering locked قالى زى ما عادل قالى قبل كده طقم دواره، قلتيلو لا حصلت مع كذا حد قبل كده و كانت فيشه او فيوز فضل مصر انها طقم دواره و بيتصلح ب300 جنيه، قلتيلو تعالى بص عليها بس و يا سيدى لو طلع طقم دواره فعلا ابقى خد اللى انت عايزه.
اول ما دور قالى طقم دواره برضه و بدا يفك لحد لما فك الlock اللى فى الدركسيون و فضل يحاول يصلح فيه كتير و برضه مفيش فايده، نفس العيب.
قام مكمل فك لحد الboard بتاعه الفيش اللى ورا الفيوزات و فكها لقاها مليانه تراب طبعا و فى كام فيشه مملحه، روحت جبت علبه WD40 و علبه منظف تانى مش فاكر اسمها ايه و رشها على الفيش و الboard و حاول يدور، برضه مفيش فايده !!!!! و على ما جبت الWD40 و جيت كان فك قدام واتاكد ان كل الفيوزات اللى فى الكبوت سليمه. قالى انا هروح اجيب حاجه من الورشه و افطر و اجى، و بعد بتاع ساعه و نص كده، لقيته جايب طقم دواره جديد و لما ركبه مدرتش شويه فى الاول و قالى عشان ده طقم دواره auto و عربيتى manual و قام دايس على فيشه من الفيش اللى قدام بمفك و المفك التانى على البطاريه قامت دايره!! طيب يا عم، دى عايزه طقم دواره جديد، بكام يا ريس 2500 و عشان خاطرك 2200 :'(
فقلتلوا لا كده متلاقيش، قالى طيب انا هعمل اخر محاوله و قعد يبص على الboard بتاعت الفيش دى و قمنا وخدنها و لحمين فيها سلك من ورا و مطلعينوا من ورا الفيش و قام مدخلوا على الbin اللى مش موصله قامت دايره الحمد لله.
طبعا القصه دى خدت النهار كله من الساعه 1:30 لحد الساعه 6:30.
خدتها و روحت المشوار اللى كان ورايا النهارده و كانت تمام و انا رايح، لكن و انا راجع بعد ما طلعت بيها ب 5 دقائق لقيت لمبه الStop نورت مع Electronic fault طبعا انا خفت اوقفها لمتدرش تانى و انا كنت فى المهندسين ساعتها و قلت هتبهدل بيها قمت مكمل الطريق كله لحد البيت باسرع ما يمكن و ركنتها و بطلت، شيلت الكارت و دورت تانى، قامت دايره من غير اى مشكله!! المهم ايمن مومو لسه قافل معايا من شويه عشان انا كنت كلمته الصبح و مردش و لما قلتلو اللى حصل قالى كويس انك مغيرتش طقم الدواره و دى اخر حاجه تتعمل و فى كذا حاجه ممكن تتظبت قبليها و ان الوصله ديه مفيهاش مشكله و حكايه الelectronic fault دى لو اتكررت تانى لازم اشييك على الوصله دى او على مكنه الstop عشان ممكن تكون باظت من الفك و التركيب و الشغل فى الكهرباء و كده.
ودى حكايتى مع الميجان النهاردة، انا بجد كنت حابب العربيه اوى بس الموضوع ده ضايقنى كتير بصراحه و شكل السلك اللى ملحوم بازير ده و طالع من ورا الboard للفيشه مش راضى يطلع من دماغى و مضايقنى اكتر عشان حاسس ان العربيه متلصمه و ممكن تقل باصلها فى اى وقت و طبعا مش عايز برضه ادفع 2500 فى طقم دواره جديد.
ياريت لو حد عنده حل وسط يقولهولى عشان انا شكلى كده هبتدى اصدق اللى بيتقال على الميجان، انا من ساعت ما جيبتها من 3 اسابيع مروحتش بيها الشغل غير بتاع 4 مرات و شويه فى التوكيل بتعمل صيانه ال60 و ادفع 2500 و استلمها الثلاثاء، يطلعلى حوار الطقم ده كمان يوم الجمعه و يعطلها كمان اسبوع وادفع يا ريس كمان 2500!! ده غير كام حاجه صغيره ظبتهم كده فى السكه و بمبلغ مش بطال برضه، لا كده كتير يا جدعان، مش كده و لا ايه؟؟
المفضلات