الموضوع: سيراتو خليجي ولا وكيل بالضمان ؟؟؟

المشاركة الأصلية كتبت بواسطة ghazy12

انا كياوي قديم شويتين تلاتة كده يا باشا, و بتعامل مع توكيل كيا ابورواش بالذات من قبل ما النيوسيراتو تنزل
و بالتالي انا عارف هما كانوا عاملين ازاي قبل النيوسيراتو و بعد ما نزلت و حصل الاقبال الكبير عليها ما شاء الله...

توكيل كيا زمان يا فندم كان مثالي بمعنى الكلمة و كنا بنضرب بيه المثل و كان سبب رئيسي جدااا
لان ناس كتييير كانت بتشتري كيا و خصوصاً بعد محمد نصير الله يرحمه ما خد الوكالة من وليد توفيق...

توكيل كيا دلوقتي سئ لدرجة ان كلمة سئ نفسها مش هتوفيه حقه... اقل ما يقال عنه انه في انحدار تااااااااااام

انا عربيتي بقت بتدخل و تخرج من الصيانات بالمشاكل اللي فيها زي ما هي مع اني قايل عليهم مشكلة مشكلة
و مش سايبهم حتى يدوروا على المشكلة, لأ, انا بقوله المشكلة في كذا بسبب كذا لو سمحت حلهالي..!!!

اكتر من تغيير الزيت و الفلاتر مش هتلاقي, و الشئ اللي بقى يحزن ان المصداقية بقت منعدمة, يعني لو عندك
مشكلة في المساعد مثلاً, و عما عارفين ان في مشكلة في المساعد بس المساعد مش موجود عندهم في الستوك
او مش فاضيين يغيروه مثلاً, هتلاقيهم بيقولولك العربية زي الفل و المساعد سليم و انت اللي بتحلم بس مش اكتر..!!!

على سبيل المثال انا كان عندي مشكلة في البطاحات و اظن دي مش مشكلة خرافية يعني, قعدت صيانتين
اشتكي من البطاحات و الصوت بتاعهم علشان يغيروهم و فيييييين لما اتغيروا و العربية باتت يومين هناك..!!!!!

اكتر من مرة العربية تخرج متجرحة من عندهم و اسلوب التعامل مع العربية ولا كأنها عربية ايجار مثلاً,
ده غير المصنعيات اللي بقت استهباااااااااااااال غير طبيعي و ناس كتيييير عارفة الكلام ده لاني لو راكب
مرسيدس هدفع مبلغ في الصيانات مش اعلى بكتير عن اللي بدفعه في كيا... انا بتكلم بجد مش ببالغ

لو قعدت اتكلم عن التوكيل في الصيانات من هنا لـ 3 سنين قدام مش هيكفيني لاني مش طايقهم و بدأت
اكره براند كيا اللي بحبه جدااااااا من زمان بسببهم و بسبب المعاناة اللي بعاني منها كل صيانة بروحلهم فيها..!!!

ده رأي في توكيل كيا عن تجربة طوووويلة معاهم قبل و بعد التحول من توكيل مثالي لتوكيل زبالة بمعنى الكلمة...

اعذرني لو كلامي كان قاسي شوية عليهم بس اقسملك هي دي الحقيقة من واقع تجربتي...

تقبــل خــالص تحيــاتي لشخصـك المحتــرم و شكــراً لاهتمــامك يا فنــدم...

متفق مع حضرتك ومتخيل كمان المعانة مع وضع بالشكل ده وعندى تجارب كتير مع توكيلات مختلفة.
عارف اكبر مشكلة فى اى مؤسسة او شركة بتكون ايه؟الإجابة: لما يكون بيقدم خدمة عملاء وده ليه لأن اى ضرر لما بيحصل بيكون على صاحب المنتج فورا ودى خطيرة جدا التقصير بيكون بنسبة كبيرة فردى يعنى مدير مركز الخدمة او مهندس الإستقبال او وفى الأخر المهندس الى هيشتغل فى العربية

مهندس الإستقبال مسؤليته انه يسلمك العربية زى الفل ويراجع ورا المنفذين اقصد الى اشتغل فى العربية فعلا انه كل المشاكل اتحلت، وجهة نظرى الشخصية الرقابة مهمة والعقاب اهم لكل واحد ضر عربية عميل او قصر فى حل المشاكل مع انه كان عنده وقت لتجنب اى موقف يخلينا نقول عليه توكيل زبالة وضرر كان فردى كبر وكره الناس فى التوكيل كله وطبعا ده بيحصل مع تكرار المواقف والمشاكل مع الناس.

اى غلطة او تقصير بتحصل صعب الأعتراف بيه من التوكيل والأدارة لأن فرصة إصلاحه بتكون عدت وحضرتك صعب تقتنع او تقبل بأى حل من نحيته عشان هيكون زى مقلت انك تسيب العربية بايته يومين وده طبعا مش مقبول.

النصيحة فعلا لأى توكيل لازم يحقق المعادلة الصعبة توفير عمالة ماهرة ويحافظ عليها، برضه يكون صريح مع العميل يعنى لما يحس صعب تنفيذ الشكاوى لازم يبلغ ويرتب معاد تانى من نفسه مناسب مع العميل مش يرمى المشكلة وخلاص ويقول مش هينفع او العربية زى الفل.!

توكيل كيا بيجتهد وكل مره بروح بحس كده وده مؤشر ممتاز لأن كده الإدارة هدفها تحافظ على العميل بس بيحصل تقصير غير متعمد مع بعض الإهمال من الموظفين وده لازم يتعالج وفنفس الوقت الإدارة بتفكر توفر المصاريف وده بينعكس على الموظفين لأنه ممكن يعين ناس خبرة ضعيفة والموجود اصلا مش راضى بوضعه. فالموظف الجديد مش عارف يشتغل والقديم شغال من غير نفس ودى اكتر حاجة ممكن تدمر اى شركة.

تحياتى لحضرتك،

.

المشاركة الأصلية كتبت بواسطة m2nmsn

لا والله فارق وجه في بالي اكتر من مرة بس حاسس ان الشكل الجديد هينزل غالي جدا يعني ممكن يبقى فوق ال 150 الف وانا مش فارقة معايا انا عاجبني الشكل الحالي غير ان الشكل الجديد ده هياخد وقت علشان تبان عيوبة ومميزاته وبعيد اوي موضوع اول السنه ده انا ان شاءالله هجيبها خلال الاسبوع الجاي ده وكل سنه وحضرتك طيب :)

التوكيل الهاى لاين فيها تكييف تتش وكميرا وكل حاجة
الفرق الى هتدفعة فى الضمان علشان الخليجى والتوكيل كمان هيزود عليك فى الصيانات هيبقى مفيش توفير ويمكن يزيد، علشان كده قلت لحضرتك اشترى توكيل وريح نفسك.

بالتوفيق،

المشاركة الأصلية كتبت بواسطة m2nmsn

ياباشا انت متاكد من الكلام ده انا اتصلت بخدمه عملاء كيا قالولي مفهاش ولا كاميرا ولا تكييف تتش وكمان ركبتها عند سمير ريان مكنش فيها الكلام ده ياريت حضرتك تاكدلي المعلومة دي جايبها منين علشان لو كده يبقى فعلا اشتريها وكيل واريح نفسي

حضرتك معيا العربية وكيل فيها كل حاجة abs، تكييف تتش، 2 ايرباج، جنط 17، فتيس 6 سرعات، سمارت كى، امبوليزر، مريات ضم ، شفت فى الطارة، طارة ملتى، سينسور بارك، بس الفئة الى اشتريتها قبل الهاى لاين على طول وكمان اتفرجت على الهاى لاين وكيل فيها كل حاجة كاميرا وتتش الكلام ده متأكد منه 100% لغاية اخر 2011 يمكن دلوقتى مفيش عربيات متاحه للفئات العالية علشان كده التوكيل بيبلغ الناس انه مفيش ودى حاجة غريبة جدا.

.

المشاركة الأصلية كتبت بواسطة ابو ليلى

الوكيل كل فترة بغير فى الكماليات مع كل دفعة عربية يعنى ممكن تتغير فى خلال السنة 3 مرات
وده واضح فى السيراتو واسبورتاج وريو
رائى من زمان وكيل ولا تفرق تكيف تتش او كاميرا الاول كان الفرق واضح بين الخليجى والوكيل
دلوقتى خلاص 4 او 5 الاف مش فلوس قصاد عيب صناعة تصرف عليه اكتر من كده بكتير
حتى لو اشتريت ضمان خليجى مفيش فيهم مركز صيانة اقدر اعتمد عليه .
مراكز الصيانة المعتمدة حاليا كتير جدا غير الاول وفى بعضهم محترم فى التعامل .
غازى ...بلاش ابو رواش الا اذا كانت مشكلة فنية كبيرة والاهم انهم غيروها فى الاخر

+1 متفق مع حضرتك،
عيد سعيد إن شاء الله.