الموضوع: هتسرق فى 16 الف جينة بمزاجى

مع احترامى للجميع مصاريف التسجيل و الجمارك و الضرائب و الرسوم و الحلاوة و الشاى و غيرة
كلها ملهاش اى لازمة و ببساطة العربية استعمال شخصى اذا كان معلهاش زكاة فى الاسلام يبقى عليها كل ده
عشان اية مع ملاحظه ان البلد واخده حقها و زياده اوى
تخيل بتدى لابنك حاجة حلوه و راح مديها لاخوه روحت واخد نقل ملكية منة

ربنا يعينك هو فعلا مبلغ كبير و تحس انه كانك رميته في الهوا بس انت اكيد ساعه مشترتها كنت عارف انك هتدفع المبلغ ده

للأسف النظام فى البلد كله ماشي غلط..
مثلاً الجمارك الخزعبلية اللى بتدفع على العربيات دى !!
انا شفت فى سايت خليجى بى ام الفئة الخامسة موديل 2006 تقريباً كانت ب 38000 درهم !! يعنى حوالى 65 الف مصرى, يعنى ولا حاجة..
نفس الشيء بالنسبة للبنزين, أولاً دعم بنزين 95 ده انا شايفة انه غلط, مادام عايز تدعم يبقى أدعم البنزين اللى معظم العربيات ماشية بيه, العربيات الفارهة زى ما بيقولوا اصحابها ممكن يستحملوا فرق الدعم..

بس فى نفس الوقت, مش معنى كده انى اسرقهم !
يعنى 11000 ترخيص ده كأنه عقاب ان الواحد جاب عربية اكتر من 4 سلندر!

و بعدين حتى نقل الملكية فى العربيات العادية, مثلاً لو جينا قولنا عربية 4 سلندر عادى بس جديدة هانقل ملكية مش اقل من 2000 جنية, يعنى حد مثلاً يكون قاعد يحوش عشان يجيب عربية, يقوم متدبس فى 2000 جنية نقل ملكية, غير الترخيص؟؟

لو الفلوس دى مثلاً بتتصرف على الطرق مثلاً أو بتبان فى البلد مكانش حد هيتضايق, انما فلوس داخلة الدولة, و مش بس من نقل الملكية, مخالفات على تأمينات على دمغة على رسوم مش عارفة ايه على مصاريف إدارية.. كل الكلام اليومي اللى بندفعه فى المصالح الحكومية.. و فى الأخر فعلاً مفيش حاجة عدلة بتتعمل, يعنى لا طرق نضيفة, ولا حتى معاملة عدلة لما الواحد يروح مكان حكومى, ولا مستشفيات أدمية اساساً للناس اللى مش عندها إمكانية العلاج الخاص" انا زرت مرة مستشفى حكومى وبجد كنت هاعيط من اللى بيحصل!!" , ولا مدارس بتعلم و لا أى حاجة نافعة فى البلد دى..

استعوض الله فى المبلغ اللى هاتدفعه, للأسف اللى عايز يعمل أى حاجة نضيفة " سواء ركوب عربية, تعليم, علاج, سفر, أى حاجة " لازم يدفع و يكع عشان الناس تنبسط..

انا مش عارف الناس اللى بتهاجم صاحب الموضوع و خلاص ديه و عايشين فى دور المثالية مش عايشين معانا على ارض الواقع ولا ايه

نشوف السرقة من الاول ( حق الدولة ) تيجى العربية تدفع نسبة توصل لـ 250 % ( رقم يهبل فعلا ) جمارك يعنى مثلا 10 اضعاف مكسب اللى بيصنع العربية عشان كده تلاقى معظم العربيات العالية بقت بتتجمع فى مصر .. لا و مش كفاية الرقم ده تلاقيه داخلك جوة العربية بيجمرك اى اوبشن فيها حتى الـ airbag & abs بيتجمركوا .. دا مشالوش الجمرك على حزام الامان الا لما نزل قانون بيلزم الناس تسوق بيه .. و تدفع بعد دا كله ضريبة المبيعات اللى هى مفروض الحاجة الوحيدة الطبيعية

حلو اوى شوف انت دفعت قد ايه كده .. تدخل جوة البلد بقى تلاقيه بيدفعك ارقام غريبة نقل ملكية .. طيب يا جماعة هو نقل الملكية ده مش مفروض فلوس ادارية و كده بس لا تدفع قد كده و تيجى ترخص تدفع قد كده برضه

و نيجى بقى للنقطة الاهم اللى ناس كتير اوى نسياها .. هى الفلوس ديه كلها مفروض تروح فين ؟ مش مفروض تبقى الطرق نضيفة و ليها صيانة .. طبعا الطرق كلها دلوقتى بقت زى الزفت و مدقات و العربيات كاوتشاتها بجنوطها بعفشتها بيبوظوا عشان الطرق اللى لا تصلح اصلا .. او تروح مرتبات للموظفين فى الدولة او ظباط الشرطة و طبعا دول مبقاش ليهم وجود خلاص او حتى تروح تصلح حال الناس الغلابة اللى ماليين البلد

لا دا كل شوية نسبة الفقر تزيد و حاجة تقرف .. طيب دلوقتى انا بدفع الجمارك و الضرايب و المصاريف الهبل ديه ليه مش عشان الاقى خدمات ليا او بلاش مش عشان احس ان اهل بلدى اللى ربنا مش كارمهم حالهم بيتحسن و لا انا بشوف ده و لا بشوف ده يبقى ديه فعلا سرقة

حق الدولة ده لما نلاقى خدمات لينا او خدمات للناس اللى حوالينا .. دا اعلانات التبرع بقت اكتر من اعلانات المنتجات فيه كده فى الدنيا !؟