الكاوتش بقى زي الصابونة بعد اقل من 15 الاف كيلو !!! ؟

**Ahmod** · 11-09-2012 03:42 AM

السلام عليكم ورحمة الله وبركاته

من فترة - اعتقد اقل من سنة تقريبا - مش فاكر تحديدا

غيرت كاوتش الياريس وجبتلها جنوط مقاس 16

كنت محتار اجيب انهي نوع كاوتش خصوصا ان البيرجيسدون في المقاسات الكبيرة غالي وكان داخل في 950 جنيه للفرده

لقيت نوع اكسيليرا اندونيسي سعره معقول كان ب 450 جنيه للفردة مقاس 195/50/16

بعد فترة حسيت اداء الفرامل مش زي المعتاد كمان تماسك العربية في الملفات بحسها ضايعة بس قلت مش مشكلة وبعد سنتين ولا حاجة ابقى اغيره واجيب حاجة احسن

المشكلة اني دلوقتي بقالي مدة حوالي اسبوعين حاسس بحجات غريبة بتحصل !!

اول حاجة حستها ان لما ابقى واقف في اشارة او واقف عموما واطلع بدوسة بنزين جامدة بسمع صوت الكاوتش !! ودي حاجة المفروض انها مش بتحصل لان عربيتي اتوماتيك

في الاول قلت حاجة كويسة والعربية اداءها اتحسن وبقت بتطلع بفركة

لكن بعد كدة بدات الاحظ ان العربية بتزحف او الكاوتش بيعمل صوت مع اي فرملة !! وخدو بالكو من كلمة اي فرملة !!

بقيت حاسس اني راكب فيرنا - مع احترامي لملاكها - !! اللى هو بمجرد ادوس فرامل الشارع كله يتفرج ودي حاجة ماكنتش بتحصل قبل كدة نهائي !! انا العربية عندي فيها ABS+EBD وعشان تطلع صوت مع الفرملة كانت نادرا لما بتعمل كدة !!

كمان بقيت بحس ال ABS بيشتغل كتير !! بعكس الاول كان قليل لما بيشتغل

حاجة كمان اداء الفرامل قل جامد ومابقتش بتمسك زي الاول !!

ومؤخرا بقيت مع اي u-turn بسمع صوت الكاوتش برضوا وانا بلفه !! ؟

فمعقول الكاوتش خلاص انتهى وادمر لدرجة انه فقد كل خواصه في التماسك وبقى بيزحف واكني ماشي على صابون ؟؟؟

ولا في حاجة مثلا مسكت في الكاوتش وخليته بيعمل الاصوات دي ؟؟ مع اني شيكت على العجل ومالقتش في اي حاجة فيه !! والنقشة موجودة مافيش فيها مسح ولا اي حاجة

الكاوتش انا عامله بيه حاليا من ساعت ماجبته لحد النهارده حوالي من 15 / 17 الاف كيلو مش عارف بالظبط

انا حاسس ان نوع الكاوتش ده كان مقلب كبيييير خصوصا اني استرخصت واهتميت اني اجيب جنط غالي على حساب نوع الكاوتش !! وفعلا ندمت واكتشفت ان نوع الكاوتش اهم بكتير من نوع الجنط !!

بس ماتخيلتش بصراحة انه ممكن يكون ضايع للدرجة دي !! ؟

ولا تفتكرو المشكلة من حاجة تانية وانا مش واخد بالي ؟؟

**Mahmoud Nagieb** · 11-09-2012 04:46 AM

المشاركة الأصلية كتبت بواسطة lanos2004

الحق وغيرة -على الاقل الاتنين الى قدام والباقى بعدين-وفيه انواع كاوتش رخيصه وكويسه كورى طبعا

الابحاث المثبتة بتقول ان الاهم انه يغير اللى ورا الاول .... لانه هو ليه العامل الاهم فى التماسك ... وكان فيه فيديو متصور فيه عربيتين مرة بكاوتش جديد امامى ... ومرة بخلفى .... وطلع انه الخلفى الاهم لانه اللى بيمسك العربية من انها تلف وليه عامل كبير فى التماسك

تحياتى

**Mohamed_Nafie** · 11-09-2012 05:02 AM

أنا مش عايز اضيقك بس ال Apollo Accelera فعلا مش قد كده .. كان متركب مع واحد صاحبي في عربية فيرنا ومركب جنوط ونفس اللي بيحصل معاك .. لدرجة إنه مبقاش بيقدر ياخد ال u turns بسرعة زي ماكان بيعمل في الاول وإن العربية ثبتها ضايع مع إن الجنوط الجديدة اعرض...

**حماده المصري** · 11-09-2012 05:12 AM

يا معلم اعمل مقص للكاوتشات زي ما مكتوب ف الكتلوج مقص او ترجع الي قدام ورا والعربيه هتتزبط بضمانتي

وعموما ده حال الكاوتش الماركات دي بس برضو المقص بيفرق

**Mohamed_Nafie** · 11-09-2012 05:15 AM

انا برده حابب اضيف حاجة ... الجنوط الجديدة مركبلاها رينجات ولا لأ ؟

**Yasser.Essam** · 11-09-2012 05:20 AM

استعوض ربنا فى الحالى وغير الكاوتش ده بماركه نضيفه ومضمونه وناس كتير بتستخدمها زى

البريدجستون

بريللى

كومهو

جوديير

ميشلان

دانلوب

**lanos2004** · 11-09-2012 05:38 AM

المشاركة الأصلية كتبت بواسطة mahmoud nagieb

الابحاث المثبتة بتقول ان الاهم انه يغير اللى ورا الاول .... لانه هو ليه العامل الاهم فى التماسك ... وكان فيه فيديو متصور فيه عربيتين مرة بكاوتش جديد امامى ... ومرة بخلفى .... وطلع انه الخلفى الاهم لانه اللى بيمسك العربية من انها تلف وليه عامل كبير فى التماسك

تحياتى

الفرامل والزحف دة الكاوتش الامامى من غير اى ابحاث ولا تجارب-بالركه كدة
المنحنيات والملفات الخلفى بيكون له دور كبير فعلا بالبركه برضه من غير ابحاث

**reallistic** · 11-09-2012 06:01 AM

المشاركة الأصلية كتبت بواسطة حماده المصري

يا معلم اعمل مقص للكاوتشات زي ما مكتوب ف الكتلوج مقص او ترجع الي قدام ورا والعربيه هتتزبط بضمانتي

وعموما ده حال الكاوتش الماركات دي بس برضو المقص بيفرق

يا ريت توضيح بالتفصيل !

المشاركة الأصلية كتبت بواسطة no_rules

استعوض ربنا فى الحالى وغير الكاوتش ده بماركه نضيفه ومضمونه وناس كتير بتستخدمها زى

البريدجستون

بريللى

كومهو

جوديير

ميشلان

دانلوب

ضيف ليهم فولدا "fulda"
الماركة دي أنا اشتريت من واحد هنا عالمنتدى الله يباركله فردتين مقاس 14 - 165\60
و رغم أن المقاس زي ما هو واضح أنه رفيع بس بسم الله ما شاء الله
الكاوتش ده أدائه رائع بجميع المقاييس (ثبات ، صوته واطي ، نقشته شكلها حلو ... الخ)
أما بالنسبة للبيرللي "pirelli" أنا ليا معاه تجربة سيئة
و عرفت بعدها من أكتر من واحد أنه فعلاً مش قد كده و ناشف و صوته عالي

**MohammedAladel** · 11-09-2012 08:58 AM

كان عندى فردتين قدام alpha accelra إندونيسى كان صاحب السيارة القديم مركبهم هو مشى بالظبط حوالى 40 ألف كيلو

بعد ما غيرته وشفته برا لقيته ناشف كدا غير الكونتنتال خالص وتقيل حبة وبصراحة النقشة بتاعته ماسكة نفسها ومتمسحتش

لكن أداء على الطريق لاحظت فيه إنه بيكسح مع الفرامل الجامدة مع إن عربيتى إيه بى إس بس إيه يعنى

لما الواحد يدفعله فرق مية جنيه أو 150 ويجيب كاوتش نضيف مضمون