ال rpm مش ثابت والعربية بتقطع

**A.DIEA** · 19-09-2012 07:58 PM

اشتريت نيو صني من 3 ايام وعملت بيها كام مشوار لزوم التليين وهي دلوقتي عاملة حوالي 650 كم بس بدأت الاحظ ان لما بدور العربية صوت الموتور بيبقى مش ثابت ومؤشر ال rpm بينزل ويطلع حاجة بسيطة ومش ثابت وبحس ان العربية بتقطع عند عدد لفات 2000 بس سحب العربية ممتاز ممكن حد يقولي الموضوع ده عادي ولا لا وايه ضرره على الموتور لو مش عادي وايه السبب وشكرا

**Bishoy.Girgis** · 19-09-2012 08:18 PM

متابع و ان شاء الله خير

**Youssef.Awad** · 19-09-2012 08:19 PM

مممممممممممممممممم
الاعراض دى فى الصنى القديمة كانت ضفيرة الكهرباء !!!

**Land_Cruiser** · 19-09-2012 09:11 PM

ممكن تطلع على التوكيل و تقولهم على الاعراض دى او تنتظر مع صيانه الالف اللى حسب مشى حضرتك بالعربيه تبقى قربت و تقولهم عليها يضبطوها مع الصيانه و تطمنا

**A.DIEA** · 19-09-2012 09:15 PM

المشاركة الأصلية كتبت بواسطة land_cruiser

ممكن تطلع على التوكيل و تقولهم على الاعراض دى او تنتظر مع صيانه الالف اللى حسب مشى حضرتك بالعربيه تبقى قربت و تقولهم عليها يضبطوها مع الصيانه و تطمنا

شكرا جدا لكل من يساهم في الافادة بس دي مش حتأثر على العربية ؟

**the_air_devil** · 19-09-2012 11:21 PM

قبل ماتخاف وتتفزع من اللي انت شايفه .... هل حاسس بحاجة تانية غير ان عداد لفات المحرك بيلعب شوية (هو بيلعب على الضيق من 2000 لحد 1500 في الغالب) وده بيكون وقت التليين وأول 500 كيلو بس , بعد كدة بتلاقيه بدأ يتظبط.....ولو تلاحظ ان في صيانة الألف التوكيل بيعمل إعادة معايرة لعداد لفات المحرك, لأن أجزاء المحرك المعدنية بتبدأ تطبع على بعضها وساعتها ده ممكن يفرق في القراءة الصحيحة

أما إحساسك بأنها "بتقطع" فده حاجة مش طبيعية, لأن انا لاحظت عداد العربية عندي بيعمل كدة لو انا ماشي بيها وسايب البنزين والعربية ماشية بقوة الدفع الذاتي في أي منزل, بالاقي عداد الآر بي إم عامل مراجيح,,,, وعمال يتنطط من 2500 لحد 1000 , بس الظاهرة دي اختفت مع الصيانة ,. ماكانش فيه تقطيع ولا حاجة بس ممكن تحس ان سحب العربية مش تمام في الأول ولاحظ انها لسة زيرو , ماتحاولش تفتري عليها وماتتوقعش العروسة تقوم تطبخ يوم الصباحية :)

أما عن ان صوت الموتور مش منتظم فده طبيعي جداً أول ألفين كيلو تقريباً وده بيكون ساعة الدوارة والتسخين فقط, لو ماشي بتلاقيه مظبوط ومنتظم, وده في حالة انك مش مشغل التكييف على تبريد عالي وسرعة مروحة كبيرة, أما لو كان الوضع غير كدة فأنصحك تروح للتوكيل يشوفلك فيها إيه

وربنا يجنبك كل المشاكل ويباركلك فيها ويجعلها سبب خير دايما.....تحياتي

.....
ملحوظة: سخن العربية دقيقتين قبل ماتطلع بيها.....هاتدور معاك وتلاقيها عاملة 1700 لفة....خلال نص دقيقة هاتلاقي دورة الزيت بدأت تنتظم والموتور بيتحرك في مدى 1400 أو أقل وصوته بدأ يهدى....والحال هايتحسن بإذن الله لو غيرت الزيت بعد الصيانة إلى تخليقي 10000 كيلو وهايقلل وقت التسخين

**kliken** · 20-09-2012 12:21 AM

ان شاء الله تكون بسيطه و تتظبط فى صيانه الالف زى ما air devil تفضل و قال

**A.DIEA** · 20-09-2012 08:49 PM

[QUOTE=the_air_devil;3874528594]

شكرا سيدي الفاضل وكلام حضرتك مظبوط انا كملت 1000 كم والحمد لله لاقيت العربية ظبطت لواحدها غير ان استهلاك البنزين بقى كويس 6 لتر لكل 100 كم وشكرا مرة تانية