الموضوع: شركة كونتاكت اصبح تقسيطها إسلامى .....!!!!

النهارده كلمت واحد من كونتاكت
قالي انهم لغوا التأمين
ونسخة المفتاح
وكمان مافيش غرامة تأخير
لكن مازال هناك توكيل بالسيارة لو نقدر نغير موضوع التوكيل ده يا جماعه لصيغة رهن للسياره أظن ان العمليه كده هاتبقى شرعية

السلام عليكم
صورة العقد فى المرفقات ولكنى حجبت اسم العميل احترما للخصوصية واعتذر بسبب عدم وضوح الصورة ولكن للالتزام بتعليمات الموقع بخصوص حجم الصور
وشكرا
ابو هاجر المصرى

السلام عليكم ورحمة الله
يا اخوانا حد شايف فى العقد نفسه اى محذور شرعى والا ايه رأيكم
ابو هاجر المصرى

يا جماعة كونتكت عندها منتج تقسيط اسلامي مختلف عن منتج التقسيط الاساسي فامحدش يخلط بين الاتنين ، التقسيط الاسلامي لسه فاتحينه ماكملشي شهر
خصائص النظام الاسلامي

1) مافيش غرامات تاخير
2) ما فيش تامين لا اجباري و لا اختياري عايز تامن روح امن في اي حته بعيد عنهم
3) العقد و المستندات باستثناء التوكيل تم تعديل صيغهم و كتابتهم لاستبدال ما هو غير شرعي بما هو شرعي و ذلك عن طريق عرضها على الدكتور السالوس و الشيخ محمد حسان و الشيخ محمد حسين يعقوب و الشيخ ياسر ، لم يتم عرض التوكيل لان الصيغه معتمده في الشهر العقاري و ماينفعشي تتعدل ، الخلاف الي ظهر: في وجود التوكيل من عدمه مش في الصيغة بتاعته
4) مافيش نسخة مفتاح
طريقة تحصيل القسط :
1) تحط الفلوس في حساب الشركة في بنك ال Cib
2) يكون عندك حساب في ال Cib بتاعك انت و تحط فيه القسط و الشركه تخش تسحبه اول كل شهر و انت مرتاح (مفيد اوي للي مرتبه بينزل في حساب مش بيقبض كاش)
3) تكتب شيكات بنكيه ، شيك عن كل قسط ، و في ميعاد استحقاق القسط الشركه تروح تصرف الشيك عشان تاخد فلوسها

انا بقى عايز اسال سؤال ليه الشركة لغت كل الضمانات و سابت التوكيل ؟؟؟
ببساطة شديده : لان هي دي الحاجه الوحيده الي فعلا تضمن ليها حقها
حتى الشيكات انت ممكن تتحبس لو مادفعتش بس العربيه لسه بتاعتك و الشركة مش هاتطوا منك و لا مليم عدم سداد الشيكات لايعني انك ملزم ترجع العربيه للشركة ابدا.

و بعدين لو فيه اثم اعتقد هايقع على الشركة مش على المشتري ، التوكيل مش ربا عشان يكون حرام على الشاري و المشتري.

انا اشتريت عربيتين بالقسط من كونتكت و كتبت التوكيل و ماحصليش اي مشكله اول عربيه خلصتها و لسه باقسط في التانيه. و اعرف ناس كتير من الي اشتروا من كونتكت و لا واحد منهم حصلوا مشكلة بسبب التوكيل

و بعدين هما هايعملوا ايه بالتوكيل ؟ هايضحكوا عليك و ياخدوا منك العربيه ؟؟ اذا كان هما كل مكسبهم انك تدفع القسط هايخدوها يعملوا بيها ايه ؟؟

سيبك من كل ده و رد على السؤال الجامد ده : اديني حل اسلامي يلغي التوكيل و في نفس الوقت يحافظ للشركة على حقها و انا مستعد اوصله ليهم.

في بنوك ( زي بنك التمويل السعودي) بيعمل حاجه جميله اوي ، بيدفعك تامين ضد مخاطر عدم السداد ! يعني العربية ب 100,000 تدفع انت زياده 1500 عشان لو مادفعتش تقوم شركة التامين تدي للبنك فلوسه.

و تكون انت عميل ملتزم بس بتدفع الفلوس دي احتياطي احسن ماتدفعش يعني بمعنى اخر غرامة تاخير مستتره بس الفرق انك هاتغرمها بالرغم من انك ملتزم !!

كونتكت ممكن تعمل كده بدل ما الفايده 9% يخليها 11% و يلغي التوكيل و لو هربت بالعربية فا كونتكت حقها محفوظ و انت كسبت العربية اما لو انت ملتزم فانت غرمت 2% زياده اونطه ، و هو ده الي بيعمله معظم التجار و البنوك الاسلاميه

هل يمكن التعاقد مع كونتكت كارز بالبطاقة ووصل الكهرباء فقط؟ خاصة إنى هدفع 50% من ثمن السيارة ، ولا لازم ورقة تفيد إنى أعمل أو حد يكون بيشتغل يضمنى ، لأن دخلى ينحصر فى عائد إيجار شقة تمليك ومعاش وللأسف بنك abc و NSGB لازم حد بيشتغل وعنده مرتب عشان يقدروا يمنحوه قرض التقسيط ومش عارف اعمل ايه استلام السيارة موقوف بسبب كدة ، فياترى ايه موقف كونتكت كارز من المسألة دى؟ وايه البنوك اللى أقدر أقسط من خلالها بضمان المعاش أو عائد إيجار او بدون ضمان؟.

سؤال كمان لو تسمحوا
هيا الفايده في كونتاكت كام حاليا
انا اخر مره شاريين عربيه من هناك كانت 8.2% فقط

المشاركة الأصلية كتبت بواسطة ahmedkimo82

و ذلك عن طريق عرضها على الدكتور الثالوث

بالله عليك خد بالك من اسم العالم .. الدكتور
انت كده قلبت الاسم لحاجه تانيه مش عايز نحكى فيها