شركة كونتاكت اصبح تقسيطها إسلامى .....!!!!

**Sharky** · 21-07-2008 12:47 PM

المشاركة الأصلية كتبت بواسطة wael333

يا جماعه انا وجدت هذه الشركه -بيت التأمين المصرى السعودى المفترض انها تامين تكافلى ولكنى اتصلت بهم الان وسئلت على نظام التأمين على الاوبترا قالو لى انك بتدفع 2.75% من القيمه السوقيه للسياره يعنى على اساس ان سيارتى( اشتريتها 90 او 93 الف) ادفع 2600 جنيه فى السنه وشامله الحوادث اذا قدر الله لى بحادثه سوف اتحمل 400 جنيه وهم يدفعوا الباقى وممكن تصلح فى اى مكان التوكيل او غيره بعد بالطبع معاينه السياره عندهم وعمل محضر فى القسم وتدفع انت التكاليف ثم بعد ذلك تقدم لهم الفواتير فيردو لك المبلغ ناقص 400 جنيه زى ما قلت.

المهم انا سألته بالنسبه (لتوزيع الفائض التأمينى على المشتركين) كما يقولون قال لى ( حضرتك عارف ان السيارات فى مصر والحوادث الكثيره فليس هناك ربح بل هناك خساره الا اذا كنت تريد تحمل الخساره معنا) فقلت له (معنى ذلك ان ليس هناك توزيع فاذا انه ليس تكافلى او المفترض ان هذا شرط حتى يكون اسلامى فكيف اذا؟؟ هل هذا فى السيارات فقط بمعنى ان وثائق التأمين الاخرى بها توزيع) قال لى (لا اعلم)

المهم انا الان لا اعلم هل صحيح كده العقد من الناحيه الاسلاميه؟؟!!

هذا هو الموقع للشركه

http://www.esih.com.eg/Default.aspx

كده مش شركة تأمين إسلامى
و طالما هى بتخسر عالطول طب فاتحة ليه !!!

**M_HaFeZ** · 21-07-2008 01:06 PM

مش فى قوائم ماليه أخر السنه
ومش فى رقابه على حساباتها
هو اى حد يتزنق يقولك انا بخسر
وكمان كان فى موضوع لاخ هنا بيشتكمى من الشركه دى .

**wael333** · 21-07-2008 01:55 PM

المشاركة الأصلية كتبت بواسطة sharky

كده مش شركة تأمين إسلامى
و طالما هى بتخسر عالطول طب فاتحة ليه !!!

قالى ان هو عامل وثائق بنص مليون وعليه مصاريف 750 الف!!
هو ده الى انا سألته ازاى بتغطوا الخساره اذا ؟؟!! ولكنه سكت ولم يرد

**ahmedae** · 21-07-2008 02:28 PM

السلام عليكم جميعا

الحمد لله الذي بفضله تتم الصالحات

يظهر يا جماعة ان موضوع كونتاكت ده فيه حاجة مش مظبوطة لانهم فعلا بيعدلوا العقد في صورة شرعية لكن بيعملوا حاجات تانية ملحقة بالعقد وبيكون فيها النقط اللي فيها مخالفة شرعية زي الورقة اللي بتمضي عليها واللي فيها طريقة الدفع مذكور فيها ان فيه غرامة تأخير في الدفع قيمتها % 1 من قيمة القسط عن كل يوم تأخير في الدفع , وكمان بتمضي علي تفويض ليهم انهم يسحبوا من حسابك قيمة القسط , دا غير انك بتعملهم توكيل
يعني هما بيحاولوا يظبطوا العقد ويخلوا البنود اللي فيها مشكلة شرعية في ملحقات للعقد.

والله يا جماعة انا احترت , بس بقول يمكن دي تكون بداية لحاجة كويسة ومع الوقت وبضغط من الناس اللي غيورين علي دينهم يمكن يضطروا يعملوا التعديلات من غير تحايل.

سبحانك اللهم وبحمدك اشهد ان لا اله الا انت استغفرك واتوب اليك

احمد

**mhoss** · 21-07-2008 02:35 PM

المشاركة الأصلية كتبت بواسطة ahmedae

السلام عليكم جميعا

الحمد لله الذي بفضله تتم الصالحات
والله يا جماعة انا احترت , بس بقول يمكن دي تكون بداية لحاجة كويسة ومع الوقت وبضغط من الناس اللي غيورين علي دينهم يمكن يضطروا يعملوا التعديلات من غير تحايل.

سبحانك اللهم وبحمدك اشهد ان لا اله الا انت استغفرك واتوب اليك

احمد

نعم صدقت و ده اللى احنا بنحاول نعمله دلوقتى و ربنا المستعان

**Scent7104** · 21-07-2008 04:02 PM

البياع قال لي ان مفيش موضوع 1% تأخير ده و انهم لغوه ... بس في حد تاني قال لي انه موجود و علشان اتفاداه خال اسدد في الميعاد.

و محدش قال لي موضوع التفويض و انا سألت عن طريقة دفع القسط قالوا لي زي مل انت عايزة :
اما في حسابهم في البنك
او في احد فروع Cib
او مباشرة في الشركة
او اديلهم شيكات بقيمة الأقساط.

نقطة التوكيل فده توكيل بالسيارة بحق البيع - انا حأحاول ارفعه ان شاء الله- و قالوا لي ان ده عام بيجبه الخاص و الخاص هو العقد الي بينا و ده بيقول انه السيارة ملك للمشتري . انا لسه ما شفتش العقد بس احساسي ان الشركة ده عايزة تتعامل بشفافية شوية اكتر من باقي الشركات و علشان كده انا باحاول معاهم في موضوع التوكيل ده.

بالنسبة للتأمين فأنا مش لاقية شركة تأمين اسلامي في مصر - زي بالضبط ما انا مش لاقية بنوك اسلامية!!!- كله بيقول كده و في الآخر بتلاقي حاجة ناقصة هدفها مصلحة البنك أو شركة التأمين. (و بعدين احد مبادئ الاسلام عدم الكذب هو برده في شركة بتخسر في مصر و لسه فاتحة!!!)

النقطة الأخيرة باقول برده يا جماعة احنا في مصر فيه ناس كتير بتنصب و بتسرق فلازم ندرس ايه الضمانات بتاعت الشركات ده من وجهة نظرها مش بس من وجهة نظرنا احنا علشان نعرف نحاجيهم و نقدر نقنعهم.

و انا لسه هاسال دار الافتاء و ارجع لكم

**mhoss** · 21-07-2008 04:42 PM

المشاركة الأصلية كتبت بواسطة Scent7104

نقطة التوكيل فده توكيل بالسيارة بحق البيع - انا حأحاول ارفعه ان شاء الله- و قالوا لي ان ده عام بيجبه الخاص و الخاص هو العقد الي بينا و ده بيقول انه السيارة ملك للمشتري . انا لسه ما شفتش العقد بس احساسي ان الشركة ده عايزة تتعامل بشفافية شوية اكتر من باقي الشركات و علشان كده انا باحاول معاهم في موضوع التوكيل ده.

النقطة الأخيرة باقول برده يا جماعة احنا في مصر فيه ناس كتير بتنصب و بتسرق فلازم ندرس ايه الضمانات بتاعت الشركات ده من وجهة نظرها مش بس من وجهة نظرنا احنا علشان نعرف نحاجيهم و نقدر نقنعهم.

و انا لسه هاسال دار الافتاء و ارجع لكم

على فكرة فى أخ لسه سائل الشيخ على النهارده بالتليفون انه عاوز يشترى سيارة بالتقسيط من شركة كونتاكت الشيخ رد عليه قاله بس من غير ماتعملهم توكيل الأخ قاله بس موضوع التوكيل ده لازم عندهم الشيخ قاله يبقى لايجوز!!!

فخلى بالك من موضوع التوكيل ده.
أما بالنسبة لدار الافتاء فموضوع شراء سيارة بالتقسيط جائز عندهم بغض النظر عن الاجراءات و لو حتى من بنك!!!

**Scent7104** · 22-07-2008 11:46 PM

بصوا يا جماعة من الآخر مفيش حاجة اسمها ده اسلامي في مصر "بغرض انه يتقي ربنا" انما هما بيعملوا كده من مبدأ "اللي تغلب به العب به"

انا بلغوني الموافقة امبارح ورديت عليهم عملتوا ايه في موضوع العقد : قالواانه لازم و اعاوا لي اسبابهم تاني " اللي ذكرتها قبل كده" - انهم بيضمنوا حقهم!!!

طيب خليني معاهم اسمع للآخر (زي ما قلت علشان احط نفسي مكانهم)...

أولا " : احنا بنقول اسلامي ليه عشان مفيش نسخة مفتاح (البنك كمان دلوقتي مش بيعمل نسخة مفتاح)
ثانيا": فائدة 1% على التأخير (ده لسه موجودة)
ثالثا" : حظر البيع (البنك قال لي برده مفيش حظر بيع)
رابعا" : انه بيشتري العربية و بعدين يبعها لي ( علشان ما يبيعش ما لا يملك) طيب اذا كان هما لسه هيشتروا لي العربية (بعد ما اتفقوا معايا و طلعوا لي الموافقة) يعني هما ما عندهمش معرض و كمان قالوا لي ممكن تروحي تشوفي العربية في معرض تاني و لو جبتيها ارخص ماشي هنجبهالك (طيب ما هو ده برده نفس الكلام اللي قالوه لي في البنك) و برده البنك قال لي هايشتري العربية من المعرض و بعدين يتعاقد معايا!!!
خامسا": التأمين ( لسه اجباري) آه ممكن يديلك الفرصة تختار بينهم و بين شركة تانية.
سادسا" : الأساتذة بتوع كونتكت اللي خايفين من العملاء اللي بينصبوا عليهم و علشان كده طلعوا حكاية التوكيل ده - طالبين مني اكتب لهم شيكات بقيمة الأقساط (كل شيك بتاريخ القسط) و لو انا معنديش حساب في البنك هيفتحوا لي في باركليز حساب و امضي على شيكات من غير رصيد!!! علشان اذا فرضنا و انا اتأخرت عن الدفع يروح مندوب ليهم و يصرف الشيك!!!

و أخيرا" الفائدة 8,6% بزيادة 1% عن البنك
التأمين 3,6%
1% مصاريف ادارية

طيب حد يفهمني ... جايز افهم ايه الفرق...

انا بس هأقول حاجة اخيرة : من يومين كنت باسمع محاضرة للدكتور محمد سليم العوا عن الوسطية و الافتاء و الحكم في ظل الظروف و المتغيرات...و الراجل قال انه في حقبة من الزمن اجيز بيع غير ما يملك الفرد و لكن بمعايير محددة حتى لا ترقى إلى اي من شبهات في ربا (وذلك تحت ظروف اجتماعية معينة في هذه المنطقة ) فالأساس أن الحكم ثابت و لكن التطبيق يختلف.

و في النهاية انا هأحاول ابعد عن التقسيط خالص ...و يا رب يلهمني و يوفقني ... و لا ندم من استخار.

**Scent7104** · 22-07-2008 11:57 PM

معلش توضيح : أنا كان قصدي بنقول اسلامي علشان النقط الستة مش (أولا) بس...

خطأ ترتيب الجملة

**osamamab** · 23-07-2008 02:29 AM

السلام عليكم ..

الرجاء المشاركة والرد على الأسئلة بأسفل:

** دوله بها 80 مليون مواطن .. الغالبية العظمى منهم من المسلمين .. كم شركة تبيع بالتقسيط طبقا للشريعة الإسلامية (بناءا على فتاوى شيوخنا الأفاضل الذين نحسبهم من المخلصين) .. في مجال السيارات أو غيرها ؟

** كم سيارة تم بيعها بالتقسيط في العشرة أعوام الماضية ؟ وكم شخص اشترى سيارة بالتقسيط (بطريقة تقسيط مخالفة للشريعة الإسلامية) ؟

** هل هناك شركات تأمين إسلامية ؟ كم عددها ؟ ومتى بدأت في العمل الفعلي ؟

** السؤال الأهم : لو ما لقتش قسط إسلامي فاشتريت "لامؤاخذه" حمار .. آسف !! .. حصان .. وحبيت أروح بيه الشغل كل يوم .. تفتكروا ممكن ده يؤثر بالسلب على تنفيذ اتفاقية الجات ؟

** السؤال الأكثر أهمية : لو حبيت أطور ركوبتي وأجيب كارو ملحقه بالحصان .. وبالتقسيط .. هل هناك تأمين إجباري ؟؟

** السؤال الأكثر أهميه من السؤال السابق الذي كان أكثر أهميه من السؤال الذي سبقه : لو حبيت أطور الكارو وأركب لها موتور استيراد وأبيع الحصان بالتقسيط لواحد مسكين تفتكروا لازم أحتفظ بنسخه من اللجام ؟؟

كان الله في عوني وعونكم .. المشكلة مش مشكلة تملك سيارة فقط .. المشكلة ان كثير منا اصبح لا يبالي من أين يكتسب المال وكيف وأين ينفقه .. المشكلة إنك تصحى تصلي الفجر في جماعه وبعدين تروح الشغل وتمد إيدك للرزق بالحلال أو بالحرام مش فارقه ..

وسؤالي الأخير قبل ما أشد فيشة الكمبيوتر .. لماذا لا يستجاب للدعاء !!!!!!!!! ..

أغششكوا ؟؟

لو رجعنا لحديث الرسول عليه الصلاة والسلام سنعلم الإجابة