الموضوع: ليه موديلات بيجو صغيرة ومتوسطة الحجم مفيش عليها اقبال فى السوق المصرى؟؟

المشاركة الأصلية كتبت بواسطة unendlich

أحلى حاجة في الموضوع ده أسلوب نقل الفتاوي الشهير بتاع المصريين عن طريق الكلمة السحرية "بيقولك"
نفسي ييجي اليوم إن اللي مجربش يقول معرفش

اللي بيقول أصل قطع الغيار غالية: ممكن نعرف بتتكلم على أي أساس ؟؟ تعرف أسعار قطع غيار ال 308 مثلا ولا ال 508 ولا هو كلام و خلاص ؟ طب هل شوفت المواضيع بتاعت قسم هيونداي اللي بتتكلم على أسعار حاجة الالانترا الجديدة ؟ هل تعلم طيب إن تيل فرامل الالانترا أم فرامل عيانة (mando على رأي formulator) بنفس ثمن تيل ال 508 أم 210/240 ألف و اللي ماركته bosch ألماني ؟

اللي بيقول التوكيل وحش: أنت آخر مرة دخلت التوكيل امتي أصلا ؟ هل كان معاك بيجو في يوم من الأيام ولا برده "بيقولك" ؟ طب هل تعلم إن الوكيل معدش هو هو بتاع زمان (معدش وجيه أباظة) ؟

اللي بيقول ايراني: الناس اللي جابوا العربيات الإيراني (و ده كان أيام سفالات وجيه أباظة) دول اتضحك عليهم للأسف. العربيات دي ملهاش أدني علاقة ببيجو و مش بتتباع ولا بتنتج في أي مصنع من مصانع بيجو على مستوي العالم. الشيء اللي اسمه رؤى ده و اللي ناس افتكرته 405 ده لا يمت بصلة بتاتا لل 405 اللي محدش يختلف على مدي كفاءتها. موتور ايراني بالكامل, جر خلفي .... يا راجل ده حتي الشكل اخدوا النص الوراني بتاع ال 405 القديمة و الأمامي بتاع الجديدة,شغل تييييييييييت يعني من الآخر.
برده البارس دي كانت شيء مش معروفله معالم و كان design إيراني مش فرنساوي.
لما حد يتقرص من الحاجات دي مينفعش ييجي يقول اصلها بيجو, لأ عايز بيجو اركب زي اللي بينزل عند الناس المحترمة.

اللي بيقول أصلها مش فارقة كتير : أنا كنت معايا السيفيك 2007 (الجيل الثامن, اللي هو المحبوب قوي) جايبها زيرو. دي عربية ميختلفش عليها اتنين إنها تاخد أي عربية كوري أو ياباني غسيل و مكواه, فيما عدا الكورولا ال 2008/09 الجنوب أفريقي (أخويا كان معاه ال 2008) لكن في الطوالي بس, في الغرز الهوندا عفشتها أفضل الصراحة. دلوقتي أنا بعت السيفيك و جبت الحمد لله ال 308 و عايز أقول إنها حاجة تانية خااااااالص, عفشة ملهااااش حل و الباور ال electro mechanical بتاعها حكاية (غير خالص ال electric بتاع الهوندا و الكورولا). على السرعات العالية (جربت لحد ال 200) المناورات بالبيجو حاجة تانية خالص, أنا حسيت إني كنت راكب بسكلته الصراحة.
خامات التابلوه برده و العزل و قفلة الباب مختلفين تمااااما.

مما لا شك فيه اننا سوق متخلف بكل المقاييس. يعني سوق فضل الكورولا ال 2007 على ال 2008 (رغم التفوق الميكانيكي الرهيب لصالح ال 08), فضل البومة على الشارك, السوق الوحيد اللي تسمع فيه عن نجاح عربية صيني (اللي مينفعش تتباع أصلا في أوروبا أو أمريكا), سوق بيهتم بمرايات الضم و البلوتوث انما abs و ebd و airbags و الذي منه تلاقي "يا راااااجل, كبر مخك", سوق بيشتري العربية عشان سعر اعادة بيعها مش عشان كفاءتها ...
مع احترامي يعني, ده مش سوق يتاخد مقياس لأي حاجة

انا مقدرشى احكم على الاسواق الثانيه بس اللى اعرفه ان فعلا فى مصر بنشترى بمنطق كلمة "بقولك"
و مش بتكلم على الموديلات الحديثه - لا بتكلم على القديم نسبيا
و انا دلوقتى بدرس شراء عربيه بإذن الله فى حدود 50 الف .. فمن خلال بحثى لاقيت انها تجيب 405 مستريحه و لو زودت شويه لغايه 70 الف اجيب 406 كمان !!!!

طيب نشوف مثلا الاسعار فى العربيتين دول
- 405 (الفرنساوى مش الايرانى) من 35 لغايه 45 --- يعنى تجيب اخر موديل فرنساوى سنه 2002 ب 45 الف بس
نفس 45 الف دول يجبولك شاهين او هوندا سيفيك 1995 - على الرغم من اعجابى الشديد بالهوندا الا ان افضلى انى اجيب الاحدث بنفس السعر و طبعا الشاههين مش بفكر فيها اصلا
ده تفكيرى انا
اما بقى لو حتبع تفكير اغلبية الشعب المصرى حتلاقيه بيفكر بمنطق سواق التاكسى يبقى حجيب شاهين (علشان حمارة شغل على حد التعبير) او هيونداى اكسيل (علشان قطع غيارها رخيصه و سهل اعادة بيعها و شكلها حلو) و كل ده اقل من 40 الف كمان
ااما لو جيت ناحية البيجو - تلاقيه يقولك "لااااااااااااااا توكيلها زباله " كأن الواحد بيروح للتوكيل كل يوم علشان يحط منه بنزين