الموضوع: تجربتى المريرة مع السواقة

المشاركة الأصلية كتبت بواسطة theangel

السواقه متعه في بداية مابتبقي متعلم يعني انا مثلا وانا ف ثانوي كان عندنا عربيه سوزوكي سويفت كنت متردد جدا اني اتعلم وبفكر بقي اني اول ماركب هبقي عامل زي اللي ف لعبة جاتا ماشي يطيح ف خلق الله :d قولت لأ ياعم
المهم بيني وبين نفسي كنت عايز اتعلم ف كنت متعود دايما بعد الصلاة اقعد شويه انا وواحد صاحبي ف العربيه ده وانا ف 3 ثانوي تقريبا بقي وقتها كنا جبنا لنسر كرستاله المهم قولت كده مش نافع ف جبت واحد صاحبي كان لسه متعلم جديد قعد جمبي وولله ماقالي اي حاجه لقيت نفسي دورت وسايق وماشي وسط العربيات وروحت مكان فاضي خدت كام لفه وقمت طالع ع الطريق العمومي بقي وسط الزحمه والعربيات واتعاملت وقتها مكنتش بعرف اتصرف ازاي لما يبقي في زحمه والطريق واقف ف كنت من بعيد لما الاقي الطريق زحمه افضل اهدي خالص ع الأخر بحيث اني لما اوصل هناك يكون الطريق مشي او لو وصلت وهو ممشيش ف الغالب كانت العربيه بتسك مني بقي لإني مكنتش لسه متعلم اد كده
والحمد لله شويه بشويه بقيت بسوق كويس جدا وعملت حادثه قبل كده مع عربيه هوندا يوم وقفة العيد الفجر ووقتها كنت مصدوم بقي وقولت مش هسوق تاني خلاص ومش عايز اسوق تاني وكنت فعلا مقرر مركبش العربيه بس سبحان الله روحت البيت ركنت بعد مارفرف العربيه اطحن والإربه بتاعة المياه بتاعة المساحه كانت اتكسرت من تحت وفاكر وانا نازل انا ووالدي الصبح شاف العربيه لإني طبعا كنت خرجت من غير مايعرف بالليل بيقولي ايه اللي عمل كده ف العربيه نفس اللي انت قولته بالظبط ولله قولته ^_^ بس بعدها بثواني اعترفت حقنا للدماء :d وخرجت بيها ف العيد عادي وسوقتها تاني ف نفس ذات اليوم ولا كإن في حاجه حصلت
دلوقت الحمد لله معانا الماتريكس بس اوتو وبصراحه مع ان المانيوال يمكن يكون كان متعب شويه خاصة ف الزحمه لكن انا بعشق المانيوال ...... ودلوقت خلصت كلية اهو وبقي اي حد عايز يسافر اي مكان ف البيت عندنا اللي متعلمين سواقه قبلي بيقولي انا اوصله والحمد لله الواحد بقي محترف إلي حد ما وربنا يديمها نعمه

الموضوع ده بيدينى امل فى الحياه بعد ما كنت خلاص قربت اتعقد
بس المشاركة دى بالذات بتعبر عنى اصل انا كمان عملت حادثه يوم وقفة العيد الفجر و الخساير كانت جامدة شوية فى العربية و كنت مصدومة جدا وقولت مش هسوق تاني من ساعتها و انا بصلح فى العربية و يدوب لسة بادئة تفوق من الحادثة نزلت بيها كام مرة بدرى كده و برجع على طول عشان خايفىة النهاردة بقى بعد الفجر خبطتها تانى

بجد انا خلاص اتعقدت و مش عايزة اسوق تانى لانى مش عارفة ازاى اصلا اتعلم صح

انا حكايتى مع تعلم السواقة غريبة شويه ويمكن محدش يصدقنى لما أقولكم أنى و الحمد لله الحاج الله يكرمه ويعطيله الصحة وطول العمر كنا نعيش معاه وإحنا صغيرين فى السعوديه فى مدينه صغيره إسمها رفحاء وكان كل يوم جمعه نروح معاه أنا واخواتى الكبار ( لى أخين أكبر منى ) يعلمنا السواقة فى البر ( الصحراء ) طبعآ أخويا الكبير كان فى الثانوية والتانى الإعدادية والعبد لله 6 إبتدائى وكانوا بيسوقوا لوحدهم وطبعأ أنا مش ساكت مرة أقعد على رجل الوالد ومره أسوق لوحدى بس مجرد أنى امشى حتى لو مسافة صغيره طبعا انت حواليك صحرا فا مفيش أى خوف من اى نوع وبعد كده من بداية المرحلة الإعداديه كنت بسوق عادى جدا وعلى فكرة اللى سافر السعودية يعرف إن دا السن الطبيعيى لركوب العربيات هناك ( يعنى فى المدرسه الإعدادى كل عيّل معاه تويوتا هاىلكس موديل السنه ويغير العربيه كل سنه ) والحمد لله ربنا يديمها نعمه مخبطش العربيه نهائى ( ويمكن عشان مفيش حاجة أخبط فيها أساسآ هههههههه )
مع إنها كانت تويوتا كرسيدا 81 وحش كاسر لوخبط بيها فى جبل مفيش مشاكل المهم لما رجعت مصر فى سنه أولى ثانوى بقت المشكله بالنسبه لى فى أنى مش بعرف أسوق فى الزحمة عشان متعود على أن مفيش أساسآ هناك اى حاجه فى اى حاجة بس الحمد لله كانت عربية شاهين وإتعلمت عليها ومخدشتهاش الحمد لله خلاصة الكلام البركة فى الحاج وأحب أقولكم على نصيحه أنا إن شاء الله ناوى أنفذها مع أولادى أول مايطول الولد أو البنت الدواسات والدركسيون علمّه هتفرق معاه كتير أوى ومش هيخاف أبدا من العربيه .
دى خلاصة تجربتى وآسف للإطالة .