تقييم لرينو فلوانس من احد ملاكها بعد 8 اشهر و 11,000 كيلو متر
بسم الله الرحمن الرحيم
بالطبع الموضع تم طرحه اكثر من مره من قبل أعضاء المنتدى الكرام وبلأخص السيد بوكلاا ولأنى شايف ان فى اعضاء جدد بيفكروا يشتروا العربية فحبت أعمل تقييم سريع للعربية بعد 11,000 كم
انا اول مره شفت العربية كان فى معرض اباظه الغردقة ولفت نظرى حجم العربية ولأنها تقريبآ الاكبر حجمآ فى فئتها وديه كانت اول ميزة بالنسبة لى . بالمناسبة هى اطول واعرض من الجيتا والأوكتافيا بفروق بسيطة
1-التصميم الخارجى
بدى لى فى اول الأمر غريب شويه ولكن بعد ما شفت العربية اكثر من مره اكتشفت انه تصميم مميز وجديد يتميز بمقدمة هجوميه وجوانب انسيابية ومؤخرة تعطى احساس بالفخامة .
2-التصميم الداخلى
يعطى احساس بالبساطة ( التابلوه ) وده ممكن مايعجبش ناس كتير لكن انا عاجبنى جدآ وشايف انه جديد وبسيط ويتميز بخامات اكثر من جيدة ومساحات واسعة وكراسى مريحة خصوصآ فى السفر ومن ضمن الحاجات الى بتعجبنى برده وضعية عداد السرعة المائل وكبر حجم الأبواب(الصاج) وصغر حجم الزجاج بييديك خصوصية انت والركاب وتحس انك معزول عن العالم الخارجى وده برده يرجع للعزل الجيد للسيارة . مساحة الشنطة 530 لتر ورغم كبر حجم الشنطة الا أنه مش مأثر على مساحة الكنبة الخلفية وده بفضل قاعدة العجلات الطويلة .3
3-الأداء
العربية تمتاز بدقة التوجيه وده يرجع للباور الكهربا . الموتور صوته هادى جدآ لحد 130ومن 130 لحد 160 الصوت بيعلى بشكل ملحوظ ويرجع يقل تانى من 160 لى 200 (ده احساسى)
طلعة العربية تقيلة حالها حال معظم العربيات الأوربى بس مش سيئة (احيانآ بيبقى معاى عربية صديقى باسات 2006 وانا شايف بصراحة ان طلعة الفلوانس اسرع بشكل ملحوظ من الباسات)
الى انا شايفه انو بطىء هو الغيار التانى. اما الغيارالتالت والرابع فهم سراع جدآ وخصوصآ فى الكيك داون (الغيار التانى فى الستيبترونيك افضل من الأتوماتيك)
المهم العربية أدائها مش رياضي على السرعات البطيئه (الغيار الأول و التانى)
ملحوظة -أداء العربية هيتحسن بشكل ملحوظ عند 3000 كم والأداء هيوصل لأحسن حالته عند 5000 كم
الخلاصة : العربية ادائها بشكل عام اكثر من ممتاز تتميز بنعومة وهدوء موتورها وباور مميز جدآ
وكمفورت بمزاق خاص.
4-العفشة
التعليق الأمامى اكثر من ممتاز
التعليق الخلفى (تورشن بيم) مختلف بعض الشىء عن التعليق الأمامى (ناشف شوية) لكن هيتحسن جدآ عن 5000 كم (فى ناس كتير علقت على التعليق الخلفى (تورشن بيم) لكن انا شايف انه لا يعيب العربية لأنه بتقنية اوربية تختلف تمامآ عن مثيلاتها فى السبارات الكورية وعن تجربة
وعلى فكرة واضح ان التورشن بيم هيبقى سياسة توفيرية للسيارات الأوربية الصغيرة والمتوسطة الحجم بدليل ان الجيتا الجديدة 2012 نازلة بتورشن بيم
5-الفرامل
حدث ولا حرج فرامل قوية جدآ مع نظام abs-ebd-bas
6- التكييف
اكثر من جيد ( لم اكن اتوقع من سيارة اوربيية تكييف بهده القوة)
7-الكماليات
كتييييييييييييييرة
8-الاعتمادية
العربية بقالها سنة ونصف والمشاكل الى ظهرت قليلة جدآ
9-التوكيل
من افضل التوكيلات فى مصر
10- العيوب
1-كاوتش المساحات
بيتقطع بسرعة( خامات سيئة) (ماتستخدمش المساحات من غير مياه ومن فترة لأخرى استخدم المساحات مع المياة
2-عوامة البنزين
مابتعلمش صح لكن ليس لها اى تأثير على أداء العربية. طب اية حكاية طرمبة البنزين ! طرمبة البنزين مافيهاش اى مشكلة . الموضوع ان العوامة بلت ان فى الطرمبة (يعنى جزء لاينفصل عن الطرمبة) والتوكيل اعترف بالمشكلة وبدءوا فعلا يغيروها بطرمبات جديدة مصنعة مخصوص للبنزين الى فى مصر.
3-نتشة الفتيس الى هى بين الأول والتانى
ودية كانت مضيقانى أوى أول لما اشتريت العربية. هى بتحصل احيانآ وليس معظم الوقت ولكن حاليآ وبعد 11,000كم اقدر أأكدلكم انها نادرآ لما بتحصل ولو حصلت بتبقى خفيفة (تكاد تكون اختفت) بس فى حاجة لازم أوضحها أنا بستعمل بنزين 95 والعربية كانت عاملة 3000 كم وآعتقد ان ده ليه سبب فى إختفاء النتشة
الخلاصة : ان كنت عاوز أشترى عربية بتكنولجيا اوربى فيها معدلات الأمان عالية وكان الأختيارين الى موجدين الجيتا والأوكتافيا ولكن سعرهم عالى فجت الفلوانس وحققت المعادلة الصعبة تكنولجيا اوربى فيها معدلات الأمان عالية بسعر الكورى .
على فكرة انا عربيتى E3 موديل 2011 اللون فضى استلام يناير 2011 الغردقة ب 137000 جنية
انا حبيت أنقلكم تجريبتى مع العربية لكى يستفيد منها اعضاء المنتدى المتميز إلى افادنى من خلال أعضاءه في قرار شراء الجميلة فلوانس وطبعآ اخص بالشكر الأستاز بوكلا على كل مدخلاته الى كان ليها دور رئيسى فى قرار شرائى للسيارة.
هزه تجربتى الشخصية قد يختلف معى البعض أو يتفق معى البعض قد اكون مخطئآ فى بعض الشىء
او فى كل شىء لكنى حبيت انقلها لحضراتكم .
والسلام عليكم ورحمة الله وبركاتة .