بولو موديل 2000 موتور 1400cc

**orabio** · 07-10-2012 10:30 AM

السلام عليكم
الى خبراء فولكس عندى مشكلة فى الفتيس والدبرياج العربية وهى باردة الصبح مثلا الدبرياج ناعم جدا والفتيس حلو وناعم والدنيا زى الفل مجرد العربية تسخن الدنيا تبوظ والدبرياج يبقى تقيل والفتيس يعض ولازم ادوس بقوه على الدبرياج لدرجة خايف انه الدواسة تتكسر تحت رجلى والغريب لو جبت الغيار الخامس وجيت افصل الغيار بعد لما تسخن العربية يبقى الغيار مش عايز يفصل يلزق واحد قالى ده واير دبرياج وواحد قالى ديسك
ياريت حد يفيدنى ويقولى من واقع خبرته فى المشكلة دى هو دبرياج ولا ديسك
وياريت اعرف سعر الديسك والاسطوانة والبلية للموديل ده ماكينة 1400 cc بولو

**orabio** · 07-10-2012 01:19 PM

ايه يا شباب الرجالة بتتفرج مفيش حد هنا قادر يقول معلومة ؟

**adel_2346** · 07-10-2012 02:21 PM

راجع على الديسك والاسطوانه

**elbaz45** · 07-10-2012 03:16 PM

المشاركة الأصلية كتبت بواسطة orabio

السلام عليكم
الى خبراء فولكس عندى مشكلة فى الفتيس والدبرياج العربية وهى باردة الصبح مثلا الدبرياج ناعم جدا والفتيس حلو وناعم والدنيا زى الفل مجرد العربية تسخن الدنيا تبوظ والدبرياج يبقى تقيل والفتيس يعض ولازم ادوس بقوه على الدبرياج لدرجة خايف انه الدواسة تتكسر تحت رجلى والغريب لو جبت الغيار الخامس وجيت افصل الغيار بعد لما تسخن العربية يبقى الغيار مش عايز يفصل يلزق واحد قالى ده واير دبرياج وواحد قالى ديسك
ياريت حد يفيدنى ويقولى من واقع خبرته فى المشكلة دى هو دبرياج ولا ديسك
وياريت اعرف سعر الديسك والاسطوانة والبلية للموديل ده ماكينة 1400 cc بولو

مشكلتك دى ياباشا كانت عندى بالظبط بس انا كان عندى الدبرياج واطى عليته سنه صغيرة وتشحم سلك الدبرياج او تغيره بس طبعا الدنيا مظبطتش زى منا عاوز والعفشجى قاللى لازم احل الفتيس "يقصد الدبرياج" وانا رفضت وقلتله لأ خليها لانه لو كان فك الدبرياج كان لازم يغير وانا بصراحة مش طالبة معايا دلوقتى غرامة الدبرياج وسيبتها واهى ماشية

**orabio** · 07-10-2012 04:57 PM

مشكور جدا يا باشا هى المشكلة لما العربية تسخن الفتيس يقفش والدبرياج يتقل الواحد عجز ورجله بتوجعه ههههه

**gabbbr** · 08-10-2012 10:24 PM

لو سلك الدبرياج عندك سنترينك يعنى بيرجلش نفسه بنفسه و يعنى ايضا انه مافيهوش رجلاش زى الصاموله تعليه و توطيه منها ممكن جدا مع زيادة الدوس على السلك بيسبب انه يوطى لوحدة من كتر الضغط عليه و ده عيب فى السلك لانه غالبا مش اصلى و ممكن ايضا تلاحظ ان الموضوع ده بيحصل معاك فى الاشارات و الطرق الزحمة
اما لو كان هذا الموضوع بيحصل معاك بعد سخونة السيارة بغض النظر عن ازدحام الطريق من عدمه فهذا ديسك لانه مع ارتفاع درجة حرارة الديسك بيتمدد و معامل المرونة لديه بيتغير و يصبح غير قادر على فصل الحركة من الموتور عن الفتيس بالكامل مما يؤدى الى صعوبة تغير النقلات هذا و الله اعلم

**elshrpeny** · 08-10-2012 11:28 PM

طيب سؤال سوفوستوقى كدا بعد إذنك ههههههههه
لو لا قدر الله الواحد حب يغير الإسطوانه او الديسك هل لازم بيتفك حاجه فى الماتور ولا بيبقوا بعاد عن الماتور ناحية الدواسه كدا ؟

**gabbbr** · 08-10-2012 11:41 PM

علشان تغير مجموعة الدبرياج لازم تفك الفتيس و يظل الموتور كما هو و يتطلب فك الفتيس فك الكبالن و تسقيط الفتيس ثم تظهر مجموعة الدبرياج مربوطة بترس الفلام و الذى هو بدوره متصل بعمود الكرنك بالموتور و يتم حل طقم الدبرياج و الموتور على وضعه بحوض السيارة اللهم لو كانت بعض انواع السيارات تصميمها يتطلب خلع الموتور من الحوض و عموما تغيير الديسك و لاسطوانه ياخد وقت ليس بالقليل ممكن ساعتين من العمل المتواصل و الله اعلم

**elshrpeny** · 09-10-2012 12:37 AM

يعنى المهم أن كلام حضرتك دا يا أستاذ جبر ينطبق على سيارات الفولكس بشكل أكيد , أما باقى الانواع فليس عندك معرفه اكيده بأنهم يعاملوا نفس معاملة سيارات الفولكس , كدا أنا فهمت صح ؟

- و حاجه كمان إن لما الواحد يعمل الفيلم دا ميكونش الماتور بقى إسمه محلول أو ملعوب فيه أو معموله عمره عشان نقطة إعادة البيع !!!

**SYD** · 09-10-2012 12:51 AM

اولا بالنسبة لصاحب الموضوع
راجع علي مستوي الزيت والأحسن ان حضرتك تنزله تماما وترجع تحط زيت من اول وجديد - في الغالب الزيت بتاع حضرتك هيبقي لزوجته w90/75 - وأغلب الظن انه ماتغيرش من فترة وللعلم الزيت يجب تغييره كل سنتين او كل 60,000 كم ايهما اقرب
2- راجع علي الواير وشوف لو عايز يتغير او لو جرابه تعبان ومقطع
3- لو الحلين السابقين لم يغيروا من الأمر شئ - انت مضطر تحل الأسطوانة والديسك وتشوف الدنيا ماشية ازاي

وعموما عيوب الديسك معروفة - زي الرجة والنتشة في الطلعة وصوت خشونة وخشولة
اما الأسطوانة فعيوبها بردو معروفة - زي ارتفاع صوت المحرك وفقد في العزم ويمكنك اختبارها عن طريق رفع فرامل اليد وتجربة الطلوع بالسيارة - أذا بطلت يبقي الأسطوانة مسافرة ويمكنك اجراء هذا الأختبار علي الغيارات الأول والثالث والمارشدير

بالنسبة للسؤال حول تغير الأسطوانة وما اذا كان يعيب السيارة اولا
فطبعا هذا لا علاقة له بالموتور نهائي وحتي لو فك الموتور وركبه 30 مرة ايضا لا مساس بأساسيات السيارة نهائي
ولتغيير الأسطوانة والديسك يمكنك فك الفتيس او الموتور وفي الغالب - فك الموتور اسهل من فك الفتيس

تحياتي