أنا كمان بعانى من الموضوع ده أشد العناء بحكم انى ساكن على الدائرى وكمان شغلى على الدائرى فا مفيش مشوار أعمله الا لازم استخدم الدائرى وبشوف مهازل وحوادث وكوارث عليه بجد تخلى الواحد يستشهد كل ما يسوق عليه.
أنا فعلا فكرت فى يوم من الأيام انى أوقف الطريق وأعمل احتجاج بس المشكلة انك بتعطل الدنيا كلها وطبعا ساعتها شكلك وحش والأمن هييجى يفض التظاهر وكأن مفيش حاجة حصلت وكله زى ما كان يا إما ناس كثير تتجمع بس طبعا كثير ده معناه مش أقل من 10000 بنى آدم علشان الموضوع يكون ليه وزنه وأهميته ويتاخد بجدية
الحل الأمثل من وجهة نظرى بجانب تفعيل قانون مواعيد سير المقطورات هو حاجة بسيطة جدا أغلب الناس اللى عاشت برة مصر شافوها. الحل هو تفعيل كلمة (ضابط) بكل ما تحتويه من معانى، يعنى باختصار مفيد أى فرد من أفراد الشرطة مينفعش يبقى شايف حاجة بتحصل غلط ومياخدش أى موقف منها ولو ده حصل وعلى حظه أى فرد شرطة تانى شافع وهو بيقصر ساعتها يبلغ عن المخالفة والضابط المقصر بس للأسف أصلا أفراد الشرطة مينطبقش عليهم كلمة (ضابط) لأنه لا يضبط الجريمة أو المخالفة والأسوأ من كدة انهم (أفراد الشرطة) أصلا بيرتكبوا مخالفات بالجملة فا إزاى أطلب من واحد مخالف أصلا يظبط واحد مخالف (فاقد الشئ لا يعطيه)
قانون من غير قوة عادلة زى قلته
حسبى الله ونعم الوكيل