رفع الدعم عن البنزين..حسبى الله ونعم الوكيل

**Mahmoud Saloum** · 13-10-2012 06:46 AM

المشاركة الأصلية كتبت بواسطة mxz911

ماشى انا متفق معاك فى حاله واحده فقط .. ان اللى جايب العربيه مثلا السيراتو او الالنترا ده جايبها فراغ وكتر فلوس وللدلع من الاخر
لكن اما تكون أسره مثلا يعنى مجمعه فلوس العربيه بطلوع الروح عشان تركب حاجه متهينش اداميتها .. لأن المواصلات فى مصر اهانه للأدميه وزى الزفت وكلنا عارفين
انت كلامك ممكن يكون منطقى على فئه صغيره من الناس .. ولكنه لا ينطبق تماما على نسبه كبيره من الأسر اللى جايبه عربيه مثلا عشان متتبهدلش
وبعدين حاجه كمان .. حتى اللى جايبها دلع وفراغ ده ممكن يكون شقى وتعب كتير فى عمره وبعدها قرر يدلع نفسه شويه ب حاجه اقل ما يقال عنها انها حق من حقوقه مش ترفيه !

وعموما النكته اللى جايه دى ممكن تفهمك أصدى

أمريكى بيسأل مصرى : أحلامك إيه ؟ فقال له المدرس المصرى 1/ شقة محترمة 2/ سيارة معقولة 3/ مرتب يكفى أسرتى 4/ وزير يستمع لى ويحترمنى ...فرد عليه الأمريكى : أنا سألتك عن أحلامك ..وليس عن ( حقوقك ).

طيب دعنا نتفق اولا ان النكتة دى مش نكتة ولكنها حقوق المواطن المتوسط فى اى دولة متحضرة ومحترمة
وكمان نتفق ان امتلاك سيارة ليست رفاهية ولا كماليات ولكنها ضروريات لمن استطاع شرائها لانها فعلا وسيلة مواصلات ادمية
وكمان نتفق ان مالكى السيارات اللى زى السيراتو والالنترا و ..... ينتمون للطبقة المتوسطة العليا وانت طالع
وكمان نتفق ان فى طبقات متوسطة سفلى وتحت المتوسطة وفقيرة وشديدة الفقر ومعدمة ودول بيمثلوا تقريبا 70% من الشعب ومن حقهم ان الطبقات الاعلى تمد يد العون والمساعدة ليهم

طيب لو الطبقات الاعلى دى مساعدتش الطبقات الادنى هيحصل ايه هتزداد الفوضى وتزداد السرقة والقتل والاجرام وبعد كده ثورة جياع تأتى على الاخضر واليابس

طيب الحل ايه اولا مشاريع عملاقة وسياسات اصلاحية وتطهير للمؤسسات الفاسدة ولكن ده بياخد وقت طويل بس ال70% خلاص وصلوا للذروة ومش لاقيين رغيف العيش ايه الحل؟ لازم الاكثر قدرة يساعد الاقل قدرة قبل الدنيا متولع حتى لو احنا اتضرينا شوية لان البديل ان احنا بردو هنتضر بس ضرر بالغ. ولك منى كل التحية والاحترام

**Mahmoud Saloum** · 13-10-2012 07:20 AM

المشاركة الأصلية كتبت بواسطة ahmed_badawy14

يا جماعه مصر و الله بتشهد افشل وزير ماليه في تاريخها عارفين حضراتكوا فاتوره دعم الطاقة كااام 90 مليار جنية منهم 9 مليار غاز و نصهم بيروحو للمصانع و 10 مليار للبنزين و الكيروسين و 10 مليار للسولار و حوالي 20 مليار للمازوت بتاع الكهرباء و المصانع و 12 مليار جنيه للبيوتين الي هو بتاع انابيب البوتاجاز .. عارفين لما يعرفو الدعم عن 95 الدولة هتوفر 700 مليون جنية بس و في حين لو الدوله وفرت بنزين 92 هتوفر حوالي 500 مليون جنيه يعني حوالي 1200 مليون جنيه من اجمالي 90 مليار .. نيجي بقي للبيوتين الي هو دعمه 12 مليار جنية الحكومة بتعمل الانبوبة 2.30 و بتيدها للحرامية بتوع بتروجاس تبيعها ب 3 جنية و طبعا الموزعين دول الي بيبلغ عددهم 3000 موظف بيبيعوا الانبوبة ب 30 و 40 جنية .. و المصيبة ان ارباح الموزعيم دول في السنة حوالي 13 مليار جنية طب يا اخي حط عليهم ضرايب 20 % او مشيهم و حط جمعيات اهليه عندها ضمير تقوم بالواجب ده او ارفع دعم الانبوبة 10 جنية و بيعها ب 15 للناس و هتوفر نص الدعم ده او ممكن تركب غاز طبيعي لكل المناطق ديه و معلومة كده ع الماشي ان استهلاك الشقق للغاز حوالي 1 % و بعد ما يوصل للمناطق يوصل ل 10 % بس .. و تنتهي من حكاية 12 مليار بتاعت البيوتين ... نيجي بقا لكارثة دعم جديده اسمها الصحة دعم الصحة حوالي 23 مليار و متفرحش اوي بالدعم ده ...3 مليار جنية بيروح لادوية التامين و الفشل الكلوي و الاجهزة الحديثة الي بتتجاب في الكراتين و بتتحط في المخازن و محدش بيطلعها و 10 مليار جنية مرتبات و 9 مليار جنية لديوان عام الصحة ليييييييييييييييييييييييي ه ... عشان الموظفين و المسئولين بيجيبوا مكاتب جديده و يركبوا رخام في مكاتبهم و عندك دعم القطن الفاشل و دعم القمح الي للاسف اتحكم فيه القطاع الخاص و ظلم الفلاح و فضيحة خصخصة شركات الاسمنت و غيره و غيره ..

انت قلت حاجة فى غاية الاهمية ان الدعم بيتسرق زى السولار اللى بيتعبى فى جراكن اليومين دول وبيتباع فى السوق السوداء وزيه زى التموين والانابيب والدقيق بتاع العيش وهما دلوقتى تقريبا ناويين يعملوا بطاقات للمواطنين علشان يصرفوا عليها الانابيب وبرده انا متوقع ان حجم السرقات دى هتقل ولكنها هتظل موجودة افضل شيئ هوا الدعم النقدى لازم يرفع الحد الادنى للاجور والمعاشات ويكون فيه معاش بطالة واعالة اسر بارقام محترمة وبعدين يرفع الدعم كلية. تقبل تحياتى واحترامى

**dr_hady4447** · 13-10-2012 07:27 AM

رد انتا ياحسين

**maryano** · 13-10-2012 09:46 AM

بصراحة كل دة عك في عك اعتقد في كذا خطوة المفروض الحكومة تعملهاا قبل مترفع الدعم اولها فين الموصلات المحترمة اللي الواحد يركبهااا يعني معرفش اركب عربيتي علاشان البنزين و اركب ميكروباص مع سواق مبلبع حاجة اعد اسمع شتايم و قله ادبو او يتقلب في اي حته و حيات يتضيع علاشان الدوله مش بتحترم شعبهااا ولااا لو معايا اختي او مراتي افضل ماشي قلقان علاشان لو واحد شمام ضيقها او عمل حركه مش ولا بد كل دة علشان الشرطة مش شايفه شغلهاا ولااا لو واحد شغله بعيد عن سكنه و بيضرب مشوار مش اقل من 100 كيلو يوميااا علاشان يشتغل يدفع اد كدة في البنزين لغايه لما يكتشف انو يعود في البيت اوفر يعني اي حد يفكر يجيب عريبه علاشان يحفظ كرمتو هو و عيلتو الدوله تقولو لااااا انزل اطلع عينك مع البلطجيه و الشمامين علاشان انتا متستحقش تعيش باحترام و كماان قبل متقولي عجز في الموازنة والكلام الكبير دة متحصبنيش ان الشرطة مش شايفه شغلها في مكفحة تهريب السورلار و البنزين متحصبش الناس ال الحكومه اللي بعد الثورة مش عارفه تعمل حد اقصي للاجور ولااا عرفه تشيل دعم الطاقه من المصانع اللي بتصدر برة زي مصانع لااسمنت كل دة و جبناش سيرة اب الخضار حيغلي تعريفه الميكروباص تغلي كل حاجة حتغلي يا تري هو دة لحل ؟؟؟؟؟ واللي سرقو فلوسنا وال جيبنا منهم مليم

**Elawany13** · 13-10-2012 11:40 AM

المشاركة الأصلية كتبت بواسطة mahmoud saloum

معلش يا جماعة وارجو ان محدش يزعل منى بس هوا ليه اصحاب السيارات اللى زينا الحكومة تدعملهم البنزين؟؟؟؟ يعنى مثلا الاقى واحد محترم راكب عربية سيراتو ولا الانترا ونازل منها على منفذ التموين علشان ياخد زيت وسكر مدعم ؟؟؟ وممكن نفس الراجل يروح يدفع فى عشوة 500 جنيه!! كمان ومع احترامى لاصحاب السيارات القديمة لكن كل واحد معاه 7 و8 ألاف جنيه يروح يجيب عربية قديمة وممكن تكون 1800 ولا 2000 ولا 3600 سي سي زى الامريكانى القديم عايزة بنزينة تمشى وراها والبلد تدفع دعم! و الشوارع تتملى سيارات وبالتالى نقف بالساعات فى الاشارات ونحرق البنزين واحنا واقفين والدولة تدفع دعم ؟؟؟ وياريت واحنا ماشيين نبص على العربيات هنلاقى كل واحد راكب عربية واربع كراسى فاضيين جنبه وبقيت الشعب محشور فى علب سردين وفى المترو ! وطبعا مينفعش زيادة عدد الاوتوبيسات او زيادة التصاريح للميكروباصات لان ده هيقفل الشوارع تماما ومحدش هيتحرك من مكانه.
ده اول حاجة تانى حاجة ليه القاهرة مثلا تمشى فيها عربيات فوق ال 800 سي سي يعنى بمناسبة ايه لا فيه مطالع حادة ولا فى تراك سباق ولا اى حاجة يعنى لما حد عايز يمشى بعربية 1600 سي سي ولا 2000 سي سي يبقى على حسابه مش على حساب الدولة
يا يجماعة الدعم ده معناه اعانة او معونة ازاى الواحد يبقى راكب عربية تمنها 60 ولا 70 ولا 100 ولا 200 الف جنيه ويقبل على نفسه ياخد اعانة من الدولة؟ ويا ترى مين اللى يستحق الدعم انا وانت وكل الطبقة المتوسطة والفوق متوسطة و الثرية ولا الطبقة اللى تحت خط الفقر وتعيش فى المقابر والعشوائيات و ....
للعلم ده مش معناه انى مع الحكومة الفاشلة اللى ماسكة البلد دلوقتى ومفيهاش غير وزير الداخلية والباقى ممكن يشتغلوا مدرسين فى مدرسة ثانوى بس الموضوع بتاع البنزين ده بالذات انا معاهم فيه ولو هيأثر عليا شخصيا.
وأرجو انكم تتقبلوا رأيى بصدر رحب وبموضوعية

ياريت يبقى فيه احترام لبعضنا والى علمك يامحترم
من علمنى حرفاً
التعليم مهنة الرسل والأنبياء يابشمهندس
مدرسين الثانوى الفشلة دول هما اللى عملوك مهندس قد الدنيا فى شركة متعددة الجنسيات وبتقبض بالدولار
ومش فارق معاك ان الدعم يتشال

لا حول ولا قوة إلا بالله

**م/مصطفى محمود** · 13-10-2012 02:49 PM

يا جدعان خلونا نكون واقعيين الله يكرمكم ، رفع الدعم عن الطاقة لا مفر منه ، ولا مرسي ولا مبارك ولا أى حد من اللى كان مترشح كان هيعرف يعمل حاجه غير كده وإلا بجد كنا هندخل فى كارثة بجد

انا بشتغل فى شركة للطاقة الشمسية ، وبحكم شغلي بشوف أسعار الطاقة فى مصر والشرق الأوسط

والله كنت لسة شغال على مشروع رجل أعمال أردني فى القرية الذكية بياخد الكيلو وات ساعة ب 26 قرش وأحنا بناخدة (اللى فى نفس الرينج ) ب 48 قرش ، وهو أول شريحة عندة فى الأردن جنية ونص ، طب واحد زي ده يوفر فى الكهرباء لية ولا حتى يستثمر فى طاقة نظيفة (كل مشاريعه فى الأردن طاقة شمسية)

قيسوا نفس الكلام على السولار اللى بيروح للشركات (المواصلات نسبة بسيطة منه والأغلب مولدات )

بجد رفع الدعم لا مفر منه ، وبلاش نفكر بنطاق محدود ، رفع الدعم ده هيحسن من مرتب الدكتور اللى عامل إضراب، هيحسن من وسائل المواصلات ويخليها آدمية

يا جماعه فى عجز رهيب فى الموازنة ، ويا نكون متحضرين ونقبل التضحية ونستغنى شوية عن العربية ونقبل برفع الدعم ، يا نقبل بتدهور إقتصادي فى المقومات الأساسية للدولة (كهرباء وصحة وتعليم ودفاع وأمن وبحث علمي ) فى مقابل ان كل واحد فينا عايز يركب عربيتة ومستخسر يركنها تحت البيت شوية ويركب مواصلات

بجد ياريت نكون قد الحدث ومقدرين الظروف اللى فى البلد ، ألمانيا الغربية بعد الحرب العالمية انتشر فيها العمل التطوعي والناس كانت بتستغنى عن الطاقة لتوفيرها للمصانع

واللى قبلينا قالوا " اللى ميشوفشي من الغربال يبقى أعمى "

**elshweakh** · 13-10-2012 02:58 PM

mahmoud saloum
انا اسف على التعليق على كلام حضرتك بس بصراحه
لقيتك بتنسى تكتب ف اخر كل مشاركه (.....................................)

تنبيه بمراعاة اداب الحوار
مشرف احوال الشارع
ب10