السلام عليكم
ازيكوا يا رجالة عاملين ايه :)
انا الحمد لله جبت المانيفولد اللى سألتكوا عليه من فترة و مشكورين جدا جدا بجد على مجهودكوا معايا و لولاكوا ماكنتش عرفت احل المشكلة دى. انا روحت عند مجدى بيومى اللى فى الحرفيينجبته و كان اخر واحد هناك و دفعت فيه مبلغ محترم و ركبته و الحمد لله الدنيا مشيت تمام.
فى خلال رحلتى الطويلة دى اللى استمرت 72 مافيهاش غير 7 ساعات نوم بس شوفت حاجة هى اشبه بالكارثة اللى بتحصل على ارض الواقع .. لما اتصلت ببيومى علشان اسأله على المانيفولد الاقيه بيقوللى انت سايب عربيتك فى التوكيل مش كدة ؟؟ طبعا استغربت جدا هو عرف منين حاجة زى دى و عن طريق مين و مليون سؤال بقى فى دماغى !!!
قولتله اة يا حج بايتة هناك بقالها كام يوم بس اشمعن ؟ وقاللى اللى عمرى ماكنت اتخيل انه يحصل بالشكل دة, بيقولى اصل فى واحد حبيبى اتصل بيا شغال فى اوماترا و قالى انا عايز المانيفولد دة ضرورى على اقصى سرعة !!!!!!!!!!!
طبعا انا عملت كدة و مانطقتش :| و دة لأنى قبل ما اكلم بيومى كنت قافل مع التوكيل و كان قالى سعر القطعة دى هيبقى عامل 4500 غير الضريبة و المصنعية يعنى هتقفل 5 و نص كدة تقريبا . مش دى المشكلة بقى, الكاااااااارثة انه كان طول الفترة دى بيقولى احنا هنطلبها لحضرتك من ايطاليا و هتاخد اسبوعين على ما توصل و ممكن نطلبها tnt علشان توصل فى اسرع وقت ممكن !!!!!!!!! و البيه المحترم لما عرفت ان فى حد برة هجيبها منه (من غير ما اقوله طبعا) بلغته انى مش هصلح العربية و هاخدها كدة بونش لاقيته بيقولى القطعة هتوصلك بعد 5 ايام بالظبط !!!!
البيييييييييييييييه البشمهندس راح يظبط فى الحرفيين و يجيبلى قطعة استيراد و يركبهالى على اساس انها جديدة !! انا الموضوع كله كلفنى 3000 ولو كان فى التوكيل كان هيدخل فى 5500 او 6000 بس مش دى المشكلة دلوقتى, الكارثة كمان انى اعرف ان التوكيل شغال معاهم فى كل حاجة طنابير على مساعدين على صاج على كله لدرجة انهم بياخدوا احيانا انصاص عربيات كاملة !!!!
ينهار اسود .. طب اضحكوا عليا فى فلوس ماشى مش هتفرق, لكن تركبلى قطع غيار مستعملة ؟؟؟!!!!
طب انا واحد بنزل و بلف و بسأل علشان كدة اكتشفت كارثة زى دى, الناس اللى بتروح تسلمهم العربية و تطلع تقعد فى الاستراحة دى بيتعمل فيهم ايه ؟!!!!
طب الواحد بيخاف من الناس اللى برة علشان الحوارات دى و بيدفع دم قلبه فى التوكيل كمان يضحك عليه بالشكل دة ؟؟
انا والله ما عارف اقول ايه غير حسبى الله و نعم الوكيل و انى لازم اعرفكوا حقيقة شغل الناس دى و كلامى دة اتحاسب عليه و اللى مش مصدق انا ممكن اوديه لبيومى بنفسى و هو هيأكدله .. دة كفاية انه طلع عارف مهندسين التوكيل كلهم واحد واحد :(
انا طولت عليكوا بس ارجوا انى اكون وصلت رسالتى علشان اصعب احساس فى الدنيا بجد ..... لما تحس انك اتختمت على قفاك
و الله الموفق و المستعان :)