سلام علي كل الناس اللي هنا وانا فرحت بوجود قسم للداتشيا وفرحت اكتر لما لقيت ناس بتحبها للدرجة الكبيرة دي وتقريبا فاهمين كل كبيرة وصغيرة فيها ماشاء الله عليكم.

بصراحة عايز يجيلي يوم واحب الداتشيا زي مانتو حبتوها وعلشان اكون صريح معاكم هي مكانتش ابدا مريحاني.

والحكاية اننا اشترينا داتشيا نوفا موديل 2000 علي الزيرو من سنة 2000 يعني بقالها دلوقتي اهو تقريبا 12 سنة، ومشكلتنا معاها بدأت من الكربراتير اللي عمره ما اتظبط الا نادرا جدا وكان معانا ميكانيكي المفروض انه كان بيشتغل في توكيل داتشيا قبل ما يقفل انما الامانة لله كرهنا فيها وفي سيرتها لأنه عمره ماعرف يظبط الكربراتير ايدا ودايما كهربتها مش مظبوطة ووالحرق مش مظبوط.

ووصل بينا الحال اننا شيلنا الكربراتير تماما (كان 2 باب) وتخيلوا ضيقنا فتحته وركبا للاسف كربراتير 128 بعمته بقالنا ع الحال ده من حوالي اكتر من 3 سنين، ومش هحكي بقي ازاي العربية مخنوقة ومابتسحبش واخرها اخرها يعني 90 ده لو جابتهم بعد عناء، ده غير ان كربراتير ال 128 جوه الداتشيا شكله يكسف مع احترامي لانه مش مناسب لحجم موتورها ولا قوتها ابدا.

السبب في تغيير الكربراتير ان الميكانيكي ده قال شوية حاجات بعد ما تعبنا منه :
-زي الكربراتير بتاعها محتاج جلب علي المسامير او حاجة كده ودي مش موجودة واصلا مش هو ماكانش عارف يفكهم.
-وقال انه متصمم علي بنزين 95 فما فوق في اوروبا يعني حتي بنزين 95 عندنا مينفعلوهش.
-واخيرا اقنعنا ان كربراتير ال 128 هيريحنا وهيتظبط كل فين وفين وننساه. وفي الاخر خرطنا قاعدة ليه وضيقنا الفتحة الاصلية وركبناه وهو فعلا مش محتاج ظبط كتير زي الاصلي اللي كان مودينا للكهربائي كل 10 ايام وحرقه مظبوط لكن طبعا حانقها بدرجة بشعة لا سحب ولا سرعات وكاننأ دفنا الموتور بتاع الداتسيا بالحيا.

وانا بفكر جديا اني ارجع الكربراتير الاصلي بعمته ووصلاته وكل حاجة لكن خايف من حاجتين:
- اني مالاقيش حد يعرف يظبطه بردو
- وفي الاخر اندم علي المجهود ده واضطر ارجع تاني لكربراتير ال 128.

ياريت تقولولي ايه رأيكم في الموضوع وهل الافضل ارجع للكربراتير الاصلي ولا اغير بنوع تالت.

وشكرا ليكم