الموضوع: مع ولا ضد قرار الحكومة المصرية بغلق المحلات التجارية بعد العاشرة مساء

انا ضد القرار..

للاسف تقليد و خلاص..

ممكن للترشيد يعمل مخالفات ضخمة على المحلات اللي بتعمل انوار زيادة و الهبل ده...

يشيل الكراسي و اشغالات الطريق..

يزود عدد رجال الشرطة عشان الحماية " و مش من قلتهم يعني!!"

انما احنا شعب بيحب السهر.. سهل جداً اننا نسهر عشان نشتري حاجات.. انا شخصياً بحب الخروج بالليل اكتر عشان الحر و الزحمة.. و شوف الناس كلها في الشارع لحد الساعة 1 و مفيش مشاكل.. طبيعة شعب كامل.

كمان لو قفلنا القهاوي و الكافيهات, هانرجع لزمن "و سوري في اللفظ" الغرز.. هتلاقي كل مجموعة شباب ملموميين على بعض في أى شقة او اي حتة, و طبعاً اسهل كده ان المخدرات تزيد او, او.. و لو ده محضلش, هايفضلوا واقفين في الشوارع و يقرفوا في اللي رايح و اللى جاي..

بلاش كل ده, مين هيراقب المحلات دي كلها محل محل؟ و لا شوية هايتراقبوا و شوية فاكس, و زي ما d . A .\ ayman قال, اللي هايدفع السبوبة هيتساب في حالة؟؟

و بعدين سوري بقى, هو حل مشكلة النضافة و الأمن و المرور و البنزين و رغيف العيش بتوع ال 100 يوم عشان ييجي يتكلم في قفل المحلات و لا مش قفلها؟؟

و بعدين هو لامؤاخذة مثلاً بيوفر ايه للدولة لما كل خروجة ليه بتتكلف ملايين حراسة و تأمين و هبل,مين اللي بيدفعها يعني, ماهو احنا !! كان فالح بس يقف في التحرير و يفتح صدره زي الديك الشركسي !!

و تاااااااااااني, يجيب المليارات اللي اتسرقت من مصر, يبعت حتى للدول اللي بتشد في شعرها برة دي يجمد حسابات الحرامية و يسترد الأموال دي و يبني محطات كهربا و يظبط البلد.. انما سوري البلد مش هاتتعدل طول ما هوا قاعد يفتكس في قوانين من دماغه "بدون وجه حق عشان مش هو المشرع المفروض" لا بتقدم ولا بتأخر و سايب الأساسات بايظة.

المشاركة الأصلية كتبت بواسطة elawany13

البركة فى البكور

‫البركة في البكور‬‎ - youtube

تأييدى للقرار مش لمجرد موضوع القهاوى والدخان والحشيش واشغال الطريق
ده كان مجرد مثال على التهريج اللى بيحصل والأمثلة كتيره
واكيد اللى مش موافق على القرار ليه ظروفه ورأيه هيكون ليه واجهته واحترامه
بس هيه فعلاً توازنات بين ايجابيات وسلبيات زى اى حاجه فى الدنيا
وأنا شايف ان كفة الإيجابيات لتنفيذ هذا القرار راجحه بإذن الله
ولكنى زى ما قولت مش شايف انهم هيقدروا ينفذوه فعلاً
وعلى فكرة ان من النوع اللى بيحب السهر وبتأخر فى الشغل بره
بس شايف ان ديه عادة سيئة
وبتمنى اغيرها
وأكبر حجه وبرهان على صحة كلامى

قَالَ‏ صلى الله عليه وسلم، :‏ اللَّهُمَّ بَارِكْ لأُمَّتِي فِي بُكُورِهَا‏.‏

معاك بس المشكله انهم قفل القهوة هيقفو فى الشارع وبرضه مش هينامو ولو حصل كل المناطق الشعبيه هتفضل قهاويها فاتحه زى ماهى ثم القهاوى مش مقياس والسينمات كمان هتقفل من امتى و السيبرات هتقفل امتى و غيرة وغيرة قرار فاشل ومش مدروس ومفيش اليات لتنفيذة اساسا اذا كنت مش عارف تسيطر على الزباله وتلمها وهى بتزي ومع العلم انها مبتتحركش هتتحكم فى كل ده ازاى الصح اللى عايز يسهر يتنفخ فى الكهرباء والميه و يتظبط محاضر اشغالات ساعتها هيرف ان الله حق غير كدة معروف ديتها كبايه شاى للباشا الامين و اتعشت على كدة

المشاركة الأصلية كتبت بواسطة magic girl

انا شخصياً بحب الخروج بالليل اكتر عشان الحر..

+1
بالظبط كده.. و ده شيء مش موجود في أوروبا..

المشاركة الأصلية كتبت بواسطة amr5500

مش معني اننا شعب بيحب السهر وبيحب يخرج ويسرح في الشوارع لغايه وش الفجر يبقي دي حاجه كويسه ومفروض نتمسك بيها
ياريت نتخلي عن العادات السيئه لو عايزين نتقدم
الاجانب عندهم ميعاد النوم مقدس علشان يصحو يشوفوا اكل عيشهم وده سبب من اسباب تقدمهم
لكن الناس اللي بتقول ده تقليد للاجانب ياريت نقلدهم في حاجه مفيدة ما احنا بنقلدهم في كل سلبياتهم
اشمعني التقليد في الشئ المفيد مش بيعجب الناس
وزي ما قال الاخ الكريم elawany13

اكبر حجه وبرهان على صحة كلامى

قَالَ‏ صلى الله عليه وسلم، :‏ اللَّهُمَّ بَارِكْ لأُمَّتِي فِي بُكُورِهَا‏.‏

مع احترامى ليك ياباشا ماللى عايز يسرح يسرح وهو انت فاكر اما تقفل كل ده مش هيجى كل واحد ياجر سطح عمارة ويعمله غرزة واللى بيسرح بالليل بدل ميقعد على قهوة هيروح الغرزة اللى بيسرح ده بيسح من فراغه شغله وهو هينام من الساعه 9 لوحدة

مع جداا فى كل الدنيا كده


دا ان اكنت بنزل علشان اجيب حجات الساعه 12 الظهر و الاقى الناس كلها قافله



خلاص بدل ما يفتحوا متاخر و يقفلوا متاخر


يفتحوا بدرى من 9 او من 8 حتى زى خلق الله و يقفلوا بدرى زى باقى العالم يعنى