الموضوع: فرض ضرائب على اجهزة التكييف المنزليه .... اه يادماغى

المشاركة الأصلية كتبت بواسطة mtak

الله ينور عليك يا استاذ توت
دخلت الموضوع مخصوص علشان اشوف ردك
و سعدت به

أنا لي الشرف يا أخي الفاضل و الله .
هذا ردى فى موضوع اخر لنفس موضوع التكييف
بغض النظر عن الموضوع لانى لا استطيع ان افتح جريده اليوم السابع و لا احترمها بس لى شوية كلام عاوز اقوله بعد اذنك عن تلك المواضيع
اولا : تعرف ان كان زمان فى ضريبه بتتدفع على الناس اللى عندهم تليفزيون و قبلها بفترة كانت على الراديو
نشد خط و نتكلم :)
-------------------------------------------------------------
اى مؤسسه ( بيتك - شركتك - بلدك ) لها حد اقصى من الدخل و يجب ان يكون لها حد ادنى من النفقه حتى لا تضطر الى الاستدانه او الفلس او الجوع
يعنى مثلا ماينفعش يكون دخلك 10 جنيه فى الشهر و تدىى مصروف لولادك الاربعه كل واحد فيهم 2.5 فى اليوم
و المفروض ان ولادك ما يكلفوكش اكتر من دخلك
يعنى مايجيش العيل الصغير و يقولك انا دخلت سينما امبارح مع خطيبتى و طلعنا اكلنا عند ماك و دفعنا 50 جنيه :)
اول حاجه هاتعملها معاه ان بالقلم على وشه و تفسخ الخطوبه و تقوله
خلى عندك دم - دا اللى مايشوفش من الغربال يبقى اعمى
طيب لو سيادتك المدير قالك انت علشان بتشتغل كويس لك مكافأه الشهر ده
فرحت انت بالمكافأه و قولت للعيال مصروفكم الشهر ده هايبقى الدوبل
و رجعت الخطوبه تانى و صالحت ابنك و الدنيا زى الفل
الشهر اللى بعد ماخدتش مكافأه ( عادى ما هى مش كل يوم )
و اول ما دخلت مالبيت لقيت الواد بيقولك انا مادخلتش سيما مع خطيبتى بس ودتها مطعم ابو فلوس كتر منه
و المدام نطت فى وشك و قالتلك الغساله موتورها اتحرق
و ييجى حيلتها الصغير و يقولك كسرت ازاز عم ممتاز بالكوره و عاوز يكلمك
تعمل ايه ساعتها يا حلو
يا تنتحر
يا تسرق
يا تنتن يا تنتن و الاتنين ......................
---
حد فهم حاجه
الناس طالبت بفلوس زياده
و فعلا فى كتير مرتباتهم زادت
قوم ايه الناس انبسطت ان معاها فلوس و عاوزه تعيش زى اللى بتشوفهم
بقى السيد المحترم ابو منطلون من الباله ماسك البلاك بيرى و قاعد على قهوة ولى النعم
و الباشا اللى كان لما بيركب اتوبيس جيرانه بيحسدوه - اشترى موتوسيكل و جاره حب يغيظه
اشترى عربيه بالتقسيط و هو مش عارف هايدفع منين باقى اقساطها و هلم جرا
و طبعا انتم عارفين الباقى
الناس دى اتبهدلت فعملت ايه
عملت مظاهرة و اعتصام علشان مرتبها يزيد تانى و فعلا الحكومه زودته مرة تانيه
و حصل اختلاف فى حياة الناس دى
ان ابومنطلون بقى ماسك اى فون بدل البى بى
و ابو فسبه اشترى عربيه بالقسط ( هو جاره احسن منه )
و ابو عربيه ما عملش حاجه علشان رحمه من الدنيا فى حادثه بالعربيه الجديده
لا انكر على الناس حقها فى العيشه و التطلع الى الافضل و لكننا للأسف شعب استهلاكى و سفيه
الدوله عليها مسئوليه و لكننا فى مرحله يجب ان نتحمل المسئوليه معها
-----
لازم نفكر فى ابعد من كده و لازم نكون فى الناحيه الايجابيه
مش كل ما يحصل موضوع مشابه نلاقى كل الردود تستنكر و تشتم الحكومه و لا مرة لقيت ردود ايجابيه على المستوى الشخصى ( مع احترامى للجميع فى وجهات نظرهم)
لازم نعمل اى حاجه و لو حتى هاتوفر جنيه و لو كل الناس فى مصر مش هاتعمل اى حاجه و سايبينك انت لوحدك
برضه لازم نعمل الحاجه البسيطه
حتى و لو مش علشان خاطر البلد
و حتى لو كانت الحكومه حراميه و الاخوان سارقين البلد و المناصب و .........
خلوها علشان ربنا و تبتغى بها رضوان الله عليك
-----------------------------
افتكرت واحد قاعد فى كنتاكى و عمال يلعن السمنه و اللى بتعمله و هاتك يا اكل فى كل ما يسبب السمنه و فى الاخر
بيبسى دايت لو سمحت
المشكله انى شايف ان احنا حتى ما طلبناش البيبسى الدايت

للآسف الناش مش فهمة يعني أيه كلمة مجتمع
مجتمع يعني أجتماع عدد معين من الناس للحياة و السكن في مكان واحد و المفروض بقوانين مشتركة .
و لكن بسبب أن مبارك خرب البلد .... و خرب مخ المصريين .
وعبد الناصر أخترع أختراعات هابلة خربت الأقتصاد و اللي هو الخراب رقم واحد (الدعم )

الناس أتعودت على أن الحكومة تدفع .......... مش أنها تشتغل و تكسب و تعيش على أدها .


محدش عايز يعيش قليل و يعيش وحش ... و لكن المثل البلدي بيقول

على أد لحافك مد رجليك ......... و كل برغوث على أد دمه

و عذرا على الأمثال الشعبية .

المشاركة الأصلية كتبت بواسطة horas3000

هو انتم بتتكلموا بجد و لا بتهزروا
هو الكهربا اللي بيستهلكها التكيف ده انا باخدها ببلاش مثلا

هاديك مثال :

في أنجلترا كل لما العربية موتورها سعته اللترية تكبر كل لما يدفعك ضرائب أكبر للطريق و ضرائب مبيعات أكتر و تأمين أكتر .
مع أنك بتدفع ثمن البنزين و كل لما عربيتك تكبر أنت هاتدفع كدا كدا أكتر .
طيب هي الحكومة الأنجليزية عاملة كدا ليه ؟؟؟؟؟

علشان الأستهلاك الكتير ده بيأثر على الأقتصاد الأنجليزي و البيئة الأنجليزية و بيجبر الحكومة لضخ بنزين أكتر في السوق على الفاضي ....
يعني بيأثر على غيرك كمان مش أنت لوحدك و لأننا مش عايشين في الكون لوحدينا ... لازم نحس ببعض و نفكر لبعض و بصوت عالي .

نفس الموضوع ينطبق على التكييف من وجهة نظري الشخصية .

انا بدفع تمنها و كل ما بشغله اكتر بدفع اكتر
و زيدوا علي ده فلوس الزباله و اللي محدش بيجي جنبها

دي معاك مليون % حق فيها
و برضه بدفع للزبال عشان يشيلها
و مع ذلك بنزل الاقيها قدامي في الشارع و الادهي ان الكهربا بتقطع

اذا اللي ماسكين الدوله مش عارفين يستغلوا مواردها و طاقات الناس اللي فيها اللي مرميين في الشوارع و القهاوي و يعملوا مشاريع تقوم البلد يبقي ملهومش لازمه و يمشوا بكرامتهم احسن

معلش طول ما الناس بتفكر بطريقتك ..... يبقى البلد عمرها ما هاتتحرك حتى لو جبت حكومة أوباما تحكم مصر .
أيد لوحده ما تسقفش ...
أنا معرفش أي تفاصيل
بس واضح أن البلد فيها مشاكل كتيرة و محتاجة تعاون من كل الناس و كل المصريين لازم يفكروا في مصر ...
ممكن نتعب سنة أو أثنين و نستريح على طول زي تركيا و ماليزيا ما عملوا ... تعبوا شوية و بعدين أرتاحوا .
و من زرع حصد و من جد وجد .

مش كل ما الدوله تتزنق تروح واخده من الشعب

مقالوش هايخدوا من الشعب ...... الأشاعة اللي طلعت أن هايكون فيه زيادة على حاجة معينة .
مش كفايه الفلوس اللي بندفعها و مش بناخد حاجه في مقابلها

هو أيه اللي أحنا بندفعه و مش بنأخد حاجة مقابله ؟؟؟؟؟؟؟؟؟؟؟؟؟؟؟؟؟؟؟؟؟
ده أحنا كل حاجة مدعمة و ده اللي مخليك مش حاسس بحاجة مقابل حاجة .


ده غير الفلوس اللي بندفعها في خدمات زي التعليم و الصحه و خلافه للكيانات الخاصه و بنوفر علي الدوله عشان هي مش عارفه تعالج و تعلم اللي عندها اصلا ما بالك بينا

ما هي مش عارفة تعالج و لا عارفة تعلم علشان منظومة الدعم الفاشلة و نبقى كلنا كمصريين غلطانيين إذا أعتقدنا أن الأخوان يقدروا يحلوا حاجة أو أي حكومة تقدر تحل مصايب 60 سنة أو 30 سنة لوحدها .
زي ما قلت لازم كل الناس تتعاون ........ أحنا عايشين في مجتمع مش عايشين في كيانات منفصلة بكل فرد .

القرارات دي للاسف شايفها بتؤدي الي تطفيش رؤوس الاموال من البلد
طالما دافعين دافعين اروح ادفع في حته و اخد مقابل اللي بدفعه خدمات ادميه
و الحكومه مش هتلاقي حد تاخد منه فلوس بعد بكده
و البلد هتخرب اكتر ما هي خربانه

و عليه العوض و منه العوض

تحياتي

الحرافيش
طول ما مصادر دخل الدولة فردة وضرائب وكرتة
ومفيش انتاج حقيقي +اخلاق وسلوك احترام بعضنا
حنفضل في مهب الريح
بمعني البلد دي يلزمها تكون علي قلب رجل واحد
ونتجنب سياسة فرق تسد اللي مقصودة تتعمل من اي حد مستفيد من البوظان ده

والحديث-مامعناه- بتاع السفينة اللي الناس اللي كانو بداخلها في اسفلها وكل شويه يطلعو فوق علشان يملو مياه من البحر وهداهم تفكيرهم انهم يخرمو اسفل السفينة علشان تسهل لهم الحصول علي المياه لو ما حدش منعهم من جيرانهم في نفس السفينة حتغرق كلها-السفينة اللي هي الوطن واسف واستغفر الله العظيم-لاني مش فاكر الحديث بحذافيره ياريت اللي حافظه يكتبه في مشاركة تالية وشكرا