السلام عليكم:
دى مقارنة بسيطة جدا بين سيارتى الحالية بيرسونا 2009 و سيارتى القديمة أكسار 1 2002
طبعا مبدئيا دى مش مقارنة معمليه و لا عقلية ولا فذة :)
السبب اللى خلانى أفكر فى تغيير الاكسارا اساسا هو انها كانت مانيوال وفى ظل الزحام اللى احنا عايشينه فبقيت محتاج سيارة اتوماتيك, فنويت انى اجيب بيرسونا زيرو لانى كنت بسمع عن البروتون من ناس كتير أنها عربيات جميلة ومن خلال ايضا أراء ناس أصدقائى
وفى يوم بعد ما أخذت القرار عربيتى أتحكت حكة عادية من اللى متعودين عليها فى بلدنا و كمان كل يوم الواحد بيسمع عن سرقات سيارات كثيرة فتوكلت على الله وقلت هجيب عربية مستعملة
و كانت الاختيارات كثيرة جدا ( الميزانية من 65000 الى 80000) فكانت كالاتى:
ميجان, C4, اوبترا, صنى, ألانترا, نيو أكسنت, اليارس وطبعا البروتون و البيرسونا

انا مش بحب الاوبترا, نيو اكسنت, الصنى

وده راحة نفسية مس أكتر :)
فى الاخر رسيت المقارنة ما بين الميجان و اليارس و البيرسونا
وفى النهاية تم استبعاد الميجان بناء على راى زوجتى العزيزة :)
ولم اجد ياريس نضيفه
المهم رسيت على البيرسونا على اقتناع الحمد لله ومكنتش عايز جين2 علشان فرق الشنطة فى صالح البيرسونا
المهم فى الاخر اشتريت بيرسونا 2009 عاملة 38000 كم وتم الكشف عند عصام صفا و العربية الحمد لله تمام

بعد الشراء ب 3 ايام رحت عملت صيانة الاربعين عند عصام صفا
وتم شراء 4 كاوتش جديد عشان الكاوتش كان بتاع الفابريقة وكان فى رعشة مع السرعات العالية

المقارنة:
* السحب: البيرسونا أحسن من الاكسارا فى الstart وده راجع ان الاكسار تقيله شويه وده اللى حسيت بية
*الثبات: عفوا عشان انا عارف ان ممكن ناس تختلف كتير معايا فى النقطة دى ثبات الاكسار احسن يكتير من البيرسونا (فى المنحنيات على سرعات عالية والغرز) وهكذا
* الشكل الخارجى: الاثنين شيك وعاجبنى جدا
* الشكل الداخلى: الاكسارا أحسن شكلا وموضوعا فى كل شىء حتى المالتى فانكشن الاكسارا شكلة احسن بكتير
* استهلاك البنزين: عالى جدا فى البيرسونا وناس كتير قالتلى كده على البرتون عامة
* العفشه: البيرسونا حلوة بس ناشفة شوية, الاكسارا مريحة جدا بس كانت بتتربط كتير لسة معرفش البيرسونا ظروفها اه
* الاوبشنز: زى بعض بس البيرسونا تزيد ب زجاج خلفى كهرباء و المراية الشمال كهرباء, فى الاكسار اليمين بس كهرباء
* التكييف: لايوجد اختلاف ممكن نقول ان البيرسونا احسن بس فرق بسيط جدا

الراحة الشخصية: القعدة فى الاكسارا احلى و امكن التخزين اكتر بكتير

رأى الشخصى: العربية واخدة صيت اكتر من حقها بس هى مناسبة لسعرها و الاستفادة بالنسبة ليا هى الاتوماتيك فقط بس فى المقابل فى حاجات كتير خسرتها, والحمد لله انى مشترتهاش زيرو

اسف على الاطالة بس انا كنت بنقل تجربتى, ياريت محدش يتأثر بكلامى :)
بس الحمد لله انا مبسوط بالعربية و خصوصا انى تنقلاتى قليلة
شكرا والسلام عليكم