الموضوع: صابر اوبل كاذب ام صادق

المشاركة الأصلية كتبت بواسطة elmtr mohamed

مساء الفل

بص يا باشا من تجربتى مع صابر اللى عملتها هنا موضوع قبل كده هحاول افيدك ازاى تتعامل عند صابر

اولا متهيئلى انك لما تشترى بنفسك قطع الغيار هيبقى افضل مش لان حاجة صابر وحشة او غالية لا بالعكس احيانا بتبقى الحاجة عنده ارخص واحسن .. لكن لانك لما تشترى الحاجة بنفسك بتوفر مكسب الورشة او المركز فى قطعة الغيار لانه طبعا لازم يكسب فيها الاول ده غير المصنعية
ثانيا هتقدر تدور وتسال وتاخد خبرة وتعرف اماكن بيع ق الغيار واسعارها وانواعها وافضل الانواع واقلها وبلاد التصنيع بتاعتها ومتحبسش نفسك فى الكام نوع اللى بيتعامل فيهم الميكانيكى
لكن فى حاجات معينة انا انصح انك تاخدها من الميكانيكى عشان الضمان بتاعها يبقى هو مسئول عنها وممكن يكون صعب تفكها وتاخدها المحل عشان تغيرها يعنى مثلا انا لما جيت اشترى الريداتير فضلت انى اخده من عنده عشان يبقى مسئول عن ضمانه وتركيبه ولو فى اى حاجة يكشف عليه وهو راكب لانى صعب افكه وارجع بيه تانى المحل اغيره هتبقى مرهقة وهكذا بقى
لكن انا لسة شارى طنابير وتيل من شركة سرور فى شمبليون ورحت غيرتهم عنده ومخدش غير المصنعية بس
فانت بقى تقدر ايه الحاجة اللى يستحسن هو يضمنها واللى ممكن تشتريها من بره سواء بضمان او من غير
كمان لما تروح لصابر حاول تظبط ميعادك مع الصنايعى اللى بيشتغل فى العربية يعنى انا مثلا بيتشغلى فى عربيتى اتنين صنايعية (الدوكش) وده ولد جدع جدا جدا و (طاهر) وده ولد حريف وفنان فبظبط بالتليفون قبل ما اروح عشان اهرب من موضوع الزحمة عنده لان ماشاء الله عنده زحمة دائما .

طيب لو نويت تتوكل على الله وتجيب الحاجة من عنده يبقى خد المقايسة واسال على الحاجة بره الاول واللى تلاقى سعرها مبالغ فيه هاتها انت واللى تلاقى سعرها معقول خليها من عنده
انا عن نفسى مش بفاصل معاه للامانة لانه بصراحة كويس معايا بل احيانا بيدخل حاجة فى حاجة ومياخدش منى فلوس لو حاجة بسيطة .. لكن بقى انت حر وشطارتك والاسعار اللى هتاخدها فى المقايسة ..

لو هتشترى جديد شركة سرور والشيماء فى التوفيقية حاجتهم كويسة وكمان اوتو اوبل فى دمشق بس ده تفاصل معاه حبتين .. والمستعمل فى واحد كويس اوى فى الحرفيين اسمه مجدى البيومى اسعاره هاااااااااااااااااااايلة وبردو بيعمل معايا واجبات دائما لانى زبونه وهناك ولد جدع ومحترم اسمه احمد ماسك المحل .. لو عايز توصله ممكن ابقى اديك رقمه وكمان ابقى اكلملك احمد اوصيه بس بردو ابقى فاصل معاه مهما كان دول بياعين وتجار :)

وملحوظة بلاش تياس بسرعة كده .. ومبروووووووووووووووووك
شوف بقى ياباشا وربنا يكرمك ويارب اكون قدرت افيدك بحاجة ولو بسيطة

والله انا عاجز عن الشكر يا متر.. وان شاء الله اروح لصابر بكره واحاول اخليه ينجز في العربيه..
في الاول لما سالت لقيت ناس بتشكر في صابر جدا واولهم حضرتك بس بعد كده لقيت هجوم شديد علي صابر من ناس اعرفهم وااخرين بالمنتدي .. بس ربنا يكرم ويختارلي الخير

المشاركة الأصلية كتبت بواسطة ahmed_fahmy

تلعنوان غريب شويه وانت موضحتش ايه المطلوب وطبيعى العربيه مسروق منها كل حاجه ممكن تتسرق انا اشتريت عربيه مره من مزاد كانو سرقين كل حاجه افترض حسن تلنيه الاول وربنا يكرم ووضح ايه المطلوب

اولا انا بعتزر يا استاذ احمد.. التعبير ممكن يكون لم اوفق فيه بس والله دا كان سببه شبه ياس مني .. العربيه لما عاينتها وكان معايا واحد فاهم في اساسيات العربيات لقيتها فعلا مش متهانه وفابريكه بره وجوه وكمان مضمونه يعني من مزاد للمخابرات يعني اشتريها وانا متطمن مش اروح ااسوق البس في عربيه مسروقه ولا عامله حادثه ومقلوبه ولا ابن حرام يسرقها من قدام البيت بع ما اشتريها وده فعلا حصل مع جاري ..بس للاسف ما كانش متاح انك تدور وتجرب العربيه ودخلت المزاد وخدتها غاليه الفين او تلاته بس انا راضي ومستريح بس للاسف انا في رابعه طب عين شمس وابويا مدير عام في شركه حكوميه بيعني من الااخر مش فاضيين لدلع الصنايعيه .. فانا بدعي ربنا انه يكرمني واظبط العربيه ومش مهم الفلوس انشاله اصرف 10000 بس تطلع ما فيهاش غلطه وتريحني واخلص من عزاب المواصلات والتاكسيات والسجاير بتاع السواقين اللي جابت اجلي.. وشكرا

وبكره ان شاء الله هجيب اللسته والمعاينه بتاع صابر اوبل واسعاره وتقولوي ايه رايكم في الاسعار .. انا ما يهمنيش ان العربيه تصرف كتير بس يهمني الصدق والامانه لاني ما بحبش اي حد يستكردني

المشاركة الأصلية كتبت بواسطة elmtr mohamed

ياباشا ربنا يكرمك ويبارك لك فيها ويكفيك شرها

انا الاول كنت بستغرب من الناس اللى بتهاجم صابر مع انى مستريح معاه لانى معترف ان عربيتى هى اللى اعطالها كتير ومجنوووووووووووونة لكن اكيد الكل مش هيجمع على ميكانيكى واحد انه بلا عيوب لان كل عربية وليها ظروفها ونصييييييييبها وحط تحت دى مليون خط

ومدام رحت لصابر خلاص وهو فعلا مش وحش يبقى تعمل معاه اللى لازم تعمله مع اى ميكانيكى

قدر الامكان تشترى انت قطع الغيار الا اللى محتاجه ضمانه الشخصى

تقف على ايد الصنايعى عشان تتعلم وكمان عشان يفضل مهتم بالشغل لان الصنايعية فى كل الورش تقال شوية

اعرف انواع كل قطع الغيار اللى بيعرضها عليك واسعارها وشوف بره واسال وهات الارخص والاحسن

ظبط مواعيدك مع الصنايعى اللى شغال عشان فى اى ورشة بتلاقى الصنايعى لو شغال فى حاجة بتاخد يومين ثلاثة لما تدخل عربية محتاجة شغل ياخد كام ساعة يسيب عربيتك ويرم المصلحة الاول

لو حسيت ان فى حاجة وقفت مع الصنايعى على طوووووووووووووووول اتوجه لصابر او اخوه الاسطى محمد وقلهم على المشكلة لان مهما كان الصنايعى شاطر لكنه فى الاخر مش بخبرة الميكانيكى نفسه صاحب المكان

حاول تظبط الصنايعى اللى شغال فى العربية بعلبة كانز - هستحرم اقول سجاير بصراحة لانها حرام طبعا - علبة عصير يعنى ظبطه بقى بطريقتك وقله اظبطلى الشغل وانا عنيا ليك لان فى الاخر الصنايعى ده لقمة عيشه الاساسية فى البقشيش لانه بياخد ملاليم من صاحب الورشة وده عن معلومة عشان يهتم وخلى بالك ده فى اى ورشة مش صابر بس

بص ياباشا اى عربية سواء جديدة او مستعملة -مع الفرق طبعا - لازم تفهمها وتعرف كل حاجة فيها عشان اى عطل او حاجة محدش يضحك عليك ويعملك فيلم زى ورش كتير

انا كنت الاول ما اشتريت العربية رحت شوية مع مركز فى صقر قريش المعادى وكنت مكبر دماغى وكل ما يقولى دى تتغير اقوله اوك غير وكان بيعمل اللى عايزه وانا مكبر دماغى لكن لما فى الاخر لقيت الموضوع كبر اوى بقى قلت لا ادور انا بنفسى واسال عالاسعار لقيته دابحنى فسبته وبعد كده بقى لما بقيت اسال عالاسعار بره وفى الحرفيين عرفت انه كان بيستغفلنى جدااااااااااااااااا .

انا حاولت اجمع هنا الحاجات اللى ممكن تكون فاضلة عشان تعرف تتعامل مع اى ورشة بما فيهم صابر وربنا يوفقك يا باشا :m_yes[1]:

اشكرك يا متر للمره التانيه .. فعلا حضرتك انسان محترم

علي العموم انا رحت النهارده لصابر واداني المقايسه بالحاجات اللي جابها
1.فبر كونتاكت +كونتاكت استيراد=350
2.فحمايه اميبولايزر=150
3.كتاوت طلمبه بنزين=70
4.مروحه تكييف خلف الاكصدام استيراد =550
5. 4 كتاوت مراوح جديد=220
6. بطاريه 74 امبير جديد= 580
7. وش تويتر +تويتر استيراد=350
8. مثلث بلاستيك مرايا شمال داخلي استيرد=70
9. مرش استيراد =300
10. شبكه اماميه بالعلامه =110
11. سويتش تكييف مستطيل=240
12. مروحه تبريد داخلي استيراد =450
114. فوانيس شبوره جديد 350


اي رايكم في الاسعار دي. كويسه ولا مبالغ فيها