الموضوع: الحقونى العربية فصلت وحالفة ماتدور

النهارده كلمت الكهربائى على التليفون وقولتلة انا ركبت المشط والموبينة العربية مادرتش قالى هتفك وش الاسبراتير وتدور العربية وتشوف الشاكوش بيلف ولا لاء المهم عملت اللى بيقولى علية دورت العربية وبصيت على الشاكوش ملقيتوش بيلف ولا اى حاجة فى مكانة رحت اتصلت بية تانى وقولتلة رد وقالى الخبر المفجع اللى مكنتش عاوز اسمعة الموتور جاب كاتينة يعنى الموتور علية العوض عاوز عامرة لان طالما الشاكوش مبيلفش يبقى فية مشكلة فى الكاتينة السير اتقطع فيها حاجة وطالما كاتينة يبقى ماتور وش
كلمت كهربائى تانى قالى طالما الشاكوش مبيلفش يبقى الكامة اتكسرت
كلمت الميكانيكى قالى نفس الكلام كاتينة قولتلة تعالى شوفها لان انا شايف السير سليم ونشوف هنعمل اية
بس انا بصيت على السير تانى ملقيتش فية حاجة وراكب مش مقطوع
انا الوقتى مستنى الميكانيكى يجى يشوفها ويشيك على الكاتينة ويقولى ايه الحكاية
انتم ايه رايكم فى الموضوع ده

شفتو الهنا اللى انا فيه
جبت الميكانيكى وبص على العربية وشاف سير الكاتينة وقالى سير الكاتينة سليم مفيهوش حاجة فى اللحظة دى تنفست الصعداء طب المشكلة فى اية
المهم فك بوجية من البوجيهات وحط مكانة مفك وقالى عشق على الرابع وفعدت ازق العربيية ادام و ورا وبعدين شكلة لسة مش لاقى العطل المهم فك وش الاسبراتر وشاف الشاكوش لاقاه مبيلفش مع المارش المهم انا عندى الاسبراتير لو شفتم الصورة فى الصفحة اللى فاتت واصل بجنب الموتور متعشق مع الكامة فى الجنب
راح الميكانيكى فك الاسبراتير من الموتور نفسة طبعا ظهرت الجزء بتاع الكامة من الجنب اللى بيخلى الشاكوش يلف ودور سنه مارش الجنب مش بيلف قالى الكامة دى مكسورة من النص لانة من عند الكاتينة بيلف ومن جنب الاسبراتير مش بتلف الخلاصة اللى طلعت منها الكامة مكسورة
طب ايه الحل قالى لازم يتجاب كامة وتتخرط وهنفك بس قاللى نصيحة كده كده تكلفة لو خرطت ومتعرفش جوه لسه اية هات وش سلندر كامل ويركب على ابوة ويكون حالتة كويسة احسن
طب التكلفة هتكون كام ياعم قالى حسب ممكن تتكلف 700 وممكن 1000 اعمل حسابك على 1200 حسبا لتحضير العفريت الا وهو فك الموتور وماتعرفش لسه جوه اية
طبعا اخر يوم ليه بكرة علشان العيد والعملية ناشفة معايا وهاطر ان استنى لبعد العيد وبكرة هروح واسئل على وش سلند كامل بسلطاتة وبابا غنوكة
بس انتم ايه رايكم هل فعلا كلام الميكانيكى صح والكامة مكسور من النص وهل اجيب وش سلند بس و لا اجيب موتور كامل وعاوز اعرف الاسعار معلش لوش السلندر كامل او موتور كامل لوحده منغير الكربراتير والاسبراتير والدينمو ماتور فرادانى يعنى
انا بكرة هروح بنك الاسكان هنا فى بورسعيد اسئل على الحاجات دى بس لو حد له سكة مع بتوع الاستيراد يقولى
طبعا العربية اوبل فكترا 1400cc كربراتير عاده وشكل حوض الموتور واضح

المشاركة الأصلية كتبت بواسطة tananybasha

طيب ما تبص على الكامه بعينك
عارف يعنى ايه كامه مكسورة
شوفها بعينك دول كام مسمار

يعنى انت عاوزنى افك مسامير غطا التكيهات وابص على الكامة هى هتبان وهيبان مكان الكسر
طب لو فعلا طلعت مكسورة ايه سبب الكسر
كلامك يا طنانى مش مطمنى (عارف يعنى ايه كامة مكسورة) يعنى الحورات اللى انا هخش فيها فى الموتور ممكن توسع والتكلفة تبقى ايه ووالكامة دى ضررها على الموتور ايه
فى الاخر عاوز نصيحتك بالنسبة للحوسة اللى انا فيها دى اجيب وش سلندر كامل وهيركب ومش هيجيب مشكلة ولا اسئل على موتور كامل
معلش تقلت عليك بس انا عارف انك مش بتبخل على حد بحاجة

المشاركة الأصلية كتبت بواسطة tananybasha

كامه مكسورة يعنى الوش فيه تأكل
و فيه حاجة ضربت فى عمود كامه عبارة عن صلب لا هوائى

تمام انا هفك غطا التكيهات واشوف بس كنت عاوز رايك فى حكاية وش السلند اجيب واحد على بعضة احسن ولا على اد الكامة تتخرط ولا ماتور وخد فى بالك ان سير الكاتينة سليم

متجبش حاجه الا لما تفك الاول و تشوف محتاجه ايه

النهارده فكيت الوش زى ما انت قولت يا طنانى وفعلا زى ما الميكانيكى قال الكامة مكسورة من النص ودى الصور اللى انا خدتها موضحة الكسر فين
- ده شكل عمود الكامة

ووده مكان الكسر
وووفية اماكن تحت عامود الكامة فيها تاكل



بس مش عارف اسمها دى شواكيش بتهيائلى
المهم رحت اسئل عليهم فى بنك الاسكان عندنا فى بورسعيد على وش سلندر كامل بالكامة رحت عند على لادا قالى الوش عامل 500 والكامة 600 يعنى 1200 وقالى ما تاخد الوش بالبلوك احسن واوفر يعمل 2200 طبعا الكلام ده لسه فى اوله مافصلتش معاه بس قولتلة هجيلك بعد العيد لانى مش مستعد الوقتى
بعد كده رحت للشيخ محمد قالى موتورك قليل ونادر لما يجى ومش عندى بس ممكن اشوفلك الكامة بس وتعمل فى حدود 600
رحت لواحد تانىقالى الموتور ده مش موجود وحاجنة قليلة بس هيجيلى بعد العيد منه ممكن اجيبلك واحد بحاجته كلها ويعمل 3500 جنية انا كنت ببيعة 4000 ولو عاوز الكامة بس عندى الوقتى تعمل فى حدود 700 لكن الوش كامل لا مش عندى
انتم ايه رايكم وايه رايكم فى الاسعار والموتور بتاعى قليل لما يجى ليه علشانة كربراتير 1400 غير الهاف انجيكشن اللى لقيتة عند الشيخ محمد مرطرط 1400 برضة لكن موتور مش عارف
بس انا حاسس ان الاسعار غالية ولوفيه حد عنده وش كامل بالكمة حالتة كويسة يقولى