مواطن بروتوني جديد مطلوب الدعم والمساعدة

**Nabil.M** · 20-10-2012 12:47 PM

السلام عليكم ورحمة الله وبركاته
مبدئيا انا بشكر المنتدى لانه كان من الاسباب بعد ربنا سبحانه وتعالى اني اتوفق في شراء البرتون برسونا
والحمد لله العربيه ممتازه وثباتها وسحبها رائع جدا
العربيه حاليا ليها معايا حوالي شهرين ولان تحركاتي مش كتير وكمان البلد صغيره وانا مش بسافر بيها فلسه عامله 800 كيلو و قريب ان شاء الله هتوصل الالف
المشكلة عندي هيه انها لما توصل الالف ان شاء الله مطلوب ان يتعملها صيانة الالف والمسافة بيني وبين القاهرة 700 كيلو لاني في قنا اخر الصعيد
فيه سؤال مهمين السؤال الاول صيانة الالف لو متعملتش في التوكيل هل العربيه بره الضمان
السؤال التاني ايه الحاجات الى مفروض تتعمل في صيانة الالف
وطلب اخير للناس الى اتعاملت مع التوكيل قبل كده هل فيه حد ممكن اكلمه واتناقش معاه في المشكلة دي
منتظر ردودكم وشكرا للى هيرد او يساعد مقدما

**tamerosman** · 20-10-2012 01:34 PM

صيانة الالف مهمة جدااااا . علي اساسها الضمان بيتغعل في كومبيوتر التوكيل و يتفتح للعربية ملف صيانة

مش لازم تعملها علي الالف بالضبط .انا عملتها علي ١٥٠٠

**amrelsha3er** · 20-10-2012 02:00 PM

معلش حاول تنزل تعملها فى ابو رواش
تغير زيت وتربيط عفشه ولو فى اى حاجه فى العربيه مضيقاك قولهم عليها
عقبال صيانه ال200الف :)

**tutankhamoun** · 20-10-2012 02:04 PM

منور المنتدى و القسم يا أستاذ نبيل .
أنت تطلع من دلوقتي تعمل صيانة الألف (بس لازم تحجز الأول و أنا من رأيي لو معندكش حاجة في العربية محتاجة تتعمل في الضمان .... شوف فرع العجوزة في وسط الأسبوع بيبقى أقل زحام و هاتمشي أسرع )
بس برضه لازم تحجز الأول .
يبقى 800 كم بالاضافة ل 700 اللي هي المسافة يبقى 1500 كم
حاول ما تتأخرش عن كدا علشان خاطر تغيير الزيت و الفلتر اللي موجودين فيها علشان دول اللي بيشيلوا كل البلاوي اللي بتطلع من الموتور في التليين .

بس الله يكون في عونك ......... هاتمشي 700 كم علشان تعمل صيانة ؟

بالمرة بقى أبقى اعمل زيارة في مكان من أماكن القاهرة . زي الأهرامات أو حديقة الأزهر
يبقى أسمك عملت حاجة تانية بالاضافة للصيانة .

و هاتنور القاهرة .

**Motarjim** · 20-10-2012 04:00 PM

المشاركة الأصلية كتبت بواسطة nabil.m

السلام عليكم ورحمة الله وبركاته
مبدئيا انا بشكر المنتدى لانه كان من الاسباب بعد ربنا سبحانه وتعالى اني اتوفق في شراء البرتون برسونا
والحمد لله العربيه ممتازه وثباتها وسحبها رائع جدا
العربيه حاليا ليها معايا حوالي شهرين ولان تحركاتي مش كتير وكمان البلد صغيره وانا مش بسافر بيها فلسه عامله 800 كيلو و قريب ان شاء الله هتوصل الالف
المشكلة عندي هيه انها لما توصل الالف ان شاء الله مطلوب ان يتعملها صيانة الالف والمسافة بيني وبين القاهرة 700 كيلو لاني في قنا اخر الصعيد
فيه سؤال مهمين السؤال الاول صيانة الالف لو متعملتش في التوكيل هل العربيه بره الضمان
السؤال التاني ايه الحاجات الى مفروض تتعمل في صيانة الالف
وطلب اخير للناس الى اتعاملت مع التوكيل قبل كده هل فيه حد ممكن اكلمه واتناقش معاه في المشكلة دي
منتظر ردودكم وشكرا للى هيرد او يساعد مقدما

وعليك السلام ورحمة الله وبركاته

ألف مبارك يا أستاذ نبيل على البرسونا. المفترض عز العرب أفندي يتوسع شوية ويفتح له مراكز بيع وصيانة في الصعيد الطيب الطاهر المبارك، ومع ذلك فهو محروم معزول طارد للسكان.

بس حضرتك كده كسرت القاعدة، لان السيارات السائدة في الصعيد هي طبعًا البيجو القديم، والفيات والشاهين، وحديثًا هيونداي وشيفورليه، تويوتا إلى حد ما.

ربنا يعينك على صيانتها... حضرتك ممكن بعد ما العربية تخرج من الضمان، وتشوف لك ميكانيكي كويس في قنا يكون بيشتغل في العربيات الحديثة، وتبقى تبعت تجيب قطع الغيار من القاهرة مع أي حد بيسافر القاهرة بصفة منتظمة، أو حتى سواقين الميكروباص إللي شغالين على خط القاهرة قنا أو المركز إللي انت تابع إليه فيها.

**hoko** · 20-10-2012 04:25 PM

فيه سؤال مهمين السؤال الاول صيانة الالف لو متعملتش في التوكيل هل العربيه بره الضمان
السؤال التاني ايه الحاجات الى مفروض تتعمل في صيانة الالف
وطلب اخير للناس الى اتعاملت مع التوكيل قبل كده هل فيه حد ممكن اكلمه واتناقش معاه في المشكلة دي
اولا الف مبروك عليك البرسونا - ثانيا صيانة الالف مهمه جدا زى مالاعضاء الكرام ذكروا لحضرتك . -ثالثا الحاجات الى مفروض تتعمل في صيانة الالف - تغيير زيت موتور وفلتر - تربيط عفشه - عمل تشيك كامل للعربيه - تزويد سوائل العربيه فى حالة النقصان - تصليح اى اعطال ظهرت خلال فترة التليين - اصلاح ومتابعة اى ملاحظات لحضرتك مع ملاحظة انها صيانه مجانيه.

**ahmed_h_g** · 20-10-2012 06:03 PM

مبروك عالبيرسونا يا أستاذ نبيل
أختيار موفق

**Bahaaeldin** · 21-10-2012 09:52 AM

ألف مبروك عليك .. وربنا يعطيك خيرها ويبعد عنك شرها يارب
سبقتك بشهرين تقريباً ببيرسونا أتوماتيك والحمد لله
وكما نصحك الزملاء الأفضل تسافر بها عشان تشوف أو تلاحظ أى شىء غريب عليها وإن شاء الله مش حتلاقى حاجة .. أنا سافرت بها الساحل الشمالى وعملت أكتر من ألف كم .. يعنى تليين العربية كان فى السفر .. وكمان عشان تتعود عليها أكتر بدون زحام وبعيداً عن المشاوير القصيرة، المهم ما تزودش عن 90-100 كم/ساعة
صيانة الألف عبارة عن تغيير زيت وفلتر وتربيط عفشة واصلاح أى شكوى (قد) يجدها العميل
مبروك عليك مرة تانية
ومرحباً بك فى نادى محبى بروتون

**amrelsha3er** · 21-10-2012 03:11 PM

المشاركة الأصلية كتبت بواسطة nabil.m

مبدئيا انا شاكر جدا تفاعلكم وردكم السريع وده شئ بيخليني اتفائل ولو معنويا بعيدا عن ال700 كيلو
الموضوع التاني انا دلوقتي بين خيارين انى اتوكل على الله واسافر بالعربيه ومعايا صديق عشان نبدل في السواقه لان المسافة مش قصيرة بس انا قلقان شوية من مسالة الزيت لان المفروض الزيت الف كيلو بس ودي سفرية طويلة
الحل التاني هوا مكلف شوية بس مريح اكتر ليا وللعربيه وهوا اني انقلها على تريلا لنقل العربيات وده هيبقى مريح اكتر ليا
مع ان فيه ناس نصحوني اني اسافر بيها المسافة دي عشان ل فيها عيب يظهر

استاذ نبيلبشرى ليك ولاهل قبلى ان شاء الله قريبا
سيتم فتح مركز معتمد لبروتون فى الغردقه البحر الاحمر
والكلام ده اتقالى من اباظه وغالبا اباظه اللى هيعمله
يااما ابو حته والكلام اكدهولى اكتر من حد هنا فى الغردقه
ان شاء الله الموضوع يتم على خير وبدل سفر القاهره
الغلادقه قريبه ليك :)
تحياتى