ماذا تفعل لو كنت مكانى- ترجع مصر ولا لا

**shaddadfalcon1** · 25-10-2012 01:40 PM

مصر ممكن تبقي كويسه بعد 40 سنه طيب ليه؟
اولا الجيل الموجود دلوقتي بتاع الأربعينات والخمسينات كله رايح في داهيه الا من رحم ربي
جيل ال 20 فيه جزء كبير كويس وده ممكن يجي منه
الخير كله بقي في الجيل اللي لسه هيطلع واللي عنده 10 سنين

فكمان 40 سنه هيكون معظم الناس محترمه وساعتها تقدر تعيش عيشه محترمه

المشكله مش في الزحمه لان في بلاد فيها زحمه اكتر ممنا مليون مره - المشكله في سلوكيات واخلاق الناس

ساعات الواحد بيبقي واقف في زحمه بس مبسوط عشان الناس ماشيه في حارتها ومفيش حد بيزمر ومفيش حد بيقطع عليك ولا بيكسر عليك

كنت لسه جي من عند البنك عشان اجيب العديه ووقف بعيد شويه عشان محرجش اللي بيسحب من المكنه الاقي كل شويه واحد داخل لازق في اللي بيسحب وحلاص ده كده بقي يبقي يدخل قبلي ويعمل نفسه عبيط

**Forever.Leo** · 25-10-2012 03:01 PM

القرار قرارك .. ماحدش هيحس بظروفك اكثر منك .. خذ قرارك .. بس يكون قرار عقلاني و عملي و ليس عاطفي .

**Mohab.Nabil** · 25-10-2012 03:48 PM

انا الحمد لله عايش عيشة ممتازة جدا هنا فى مصر و الحمد لله ناس كتير بتبصلى فى الحاجات اللى عندى برضه و مفيش حاجة ببقى عايزها و مش لاقيها

بس فعلا انا لو لقيت فرصة انى اسافر بلد محترمة ( اوروبا او امريكا او استراليا او كندا ... ) فى اى مركز محترم

مش هتردد لحظة

**egyptawy2010** · 25-10-2012 04:09 PM

المشاركة الأصلية كتبت بواسطة mohab.nabil

انا الحمد لله عايش عيشة ممتازة جدا هنا فى مصر و الحمد لله ناس كتير بتبصلى فى الحاجات اللى عندى برضه و مفيش حاجة ببقى عايزها و مش لاقيها

بس فعلا انا لو لقيت فرصة انى اسافر بلد محترمة ( اوروبا او امريكا او استراليا او كندا ... ) فى اى مركز محترم

مش هتردد لحظة

طيب لو كانت الفرصة ده بلد خليجى هل هتضحى بكل المزايا ده وتروح

هو حضرتك اتغربت قبل كده

**yassin_samir** · 25-10-2012 04:09 PM

المشاركة الأصلية كتبت بواسطة kar!m

بص ارجع اقعد في مصر شهر و جرب .. و شوف كده الشركة اللي هتشتغل فيها مكانها فين و انت ساكن فين.

و جرب انزل من بيتك الصبح من مصر الجديدة مثلا .. و الشركة مثلا في المهندسين .. و ارجع اخر النهار في وقت خروج الموظفين.

لو استحملت الشوارع الزحمة .. و انك تاخد مشوار 20 دقيقة في أكتر من ساعتين .. و سواقين الميكروباصات و اللي بيزنق عليك و اللي غلطان و يشتمك .. و تنزل تشتري خضار يقولك مفيش نقاوه يا بيه .. و المياه الملوثه و اللبن المغشوش .. و الغش في جميع السلع .. و اخلاق الناس اللي مش طايقه بعضها .. و ممكن تمشي في الشارع بتتكلم في الموبايل واحد راكب موتوسيكل صيني يخطفه منك و يجري .. أو زوجتك حد يخطف شنطتها و يجري .. لو تقدر تتعايش مع الحاجات دي .. ارجع.

مش بحبطك و الله .. بس عشان متقولش انا ايه اللي رجعني.

و ربنا يوفقك لما فيه الخير.

حرام عليك عمال اضحك حتى مرحلة البكاء
الكلام اللى انتا كاتبة دة مش انتا بس دا كلنا

**MaZaGAngeE** · 25-10-2012 04:19 PM

البلد ظروفها هتبان بالظبط بعد الاستفتاء على الدستور ... لكن على وجه عام مصر في الاتحاه الصحيح و السنتين اللي فاتوا وقفوا الانهيار الاقتصادي و هنبدأ نتجه للصعود و طبعا ده هياخد وقت و مجهود و تعب كبير من الشعب ...
لو انت قدامك فرصة ماديا كويسة و مجزية خد اجازة و جرب شهر او 2 قبل ما تصفي من شركتك ..
لو انت بتفكر في حكاية الاهل و الاصدقاء و ال..... كل ده في الهجايص و لا حاجة من كل ده موجودة في مصر

**egyptawy2010** · 25-10-2012 06:40 PM

طيب لو ساكن فى مدينة جديدة والشغل فى نفس المكان هل الموضوع هيفرق

**tutankhamoun** · 25-10-2012 08:19 PM

المشاركة الأصلية كتبت بواسطة egyptawy2010

طيب لو ساكن فى مدينة جديدة والشغل فى نفس المكان هل الموضوع هيفرق

بُص يا باشا لو أنت مش فارق معاك جودة الحياة ........... أرجع .

الناس هنا أخلاقها زبالة (خصوصا في السواقة ) السواقة هنا بالدراع و قلة الأدب .

مفيش واحد فيكي يا مصر مش بيعمل أدامي غرزة أو يكسر عليا في يو ترن أو يلصق نفسه في العربية علشان يعدي ما بين عربيتين .

لو كل الكلام ده مش فارق معاك ........ أرجع .

بس هاتندم .

أنا بقولك بالفم المليان ....... خليك ......خليك ......خليك ......خليك ......خليك ......خليك ......خليك ......
أنا نفسي أرجع مكان ما كنت بس الظروف مش سامحة خالص .

**Hussein_Emara** · 25-10-2012 09:06 PM

لو لاحظت حتلاقي 95% من المشاركات بتقولك خليك, و اختلفوا على الاسباب لكن اتفقوا على حقيقة واحدة: خليك عندك.

انا مش حكلمك على اخلاقيات السواقة في الشارع, دي محلولة في المدن الجديدة, انا مش حكلمك على اخلاقيات التعامل, ممكن تتفاداها و خلاص, انا حكلمك على حاجة واحدة بس, لاقدر الله فرد من اسرتك مرض و محتاج توديه مستشفى طوارئ او حتى كشف عادي, انا مظنش ان فيه بلد في الدنيا عندها ذرة ادمية حترفض دخول مريض لأنه معهوش واسطة تدخله المستشفى. و الحل البديل المستشفيات الخاصة, و ديه بردك مش حتدخلك الا لما تدفع الاف مؤلفة, و ياريتك حتتعامل كويس او حتى حد حيراعي فيك ربنا, في كل الاحوال حتتسرق, حتتبهدل و ممكن لاقدر الله تصاب بامراض جديدة من عندهم.
الكلام الي بقوله لحضرتك مش كلا مرسل, انا فضلت الف بمريض -تشخيصه المبدأي كان جلطة في المخ- لمدة يومين مفيش مستشفي راضية تستقبله لاسباب مختلفة (اللي معندوش مكان و اللي معندوش التخصص و اللي معندهمش دم و هكذا, و كله جربناه, عام و خاص) لغاية ماربنا بعتلنا واحد يكلم مستشفى من اللي رفضوا عشان معندهمش مكان و يطلع عندهم اماكن بس شايلنها للحبايب.

الكلام في موضوع الطب و المستشفيات ده لو اتفتح, اكيد كل واحد في المنتدى عنده خبرات اسوأ و اسوأ, و لو عايز, انا عندي كتييييييييير.
انا مش دكتور بالمناسبة, بس ليا اصدقاء دكاترة كتير, نصحوني حاول ماتمرضش, لأنك لو مرضت في بلدنا دي احسنلك تموت.

اما عن الحقوق الضايعة في مصر فحدث و لا حرج.
إنا لله و إنا اليه راجعون
لو عندك حل للكلام ده في مصر, دلنا عليه و ارجع, غير كده, خليك عندك!

-

الموضوع: ماذا تفعل لو كنت مكانى- ترجع مصر ولا لا

LinkBack

أدوات الموضوع

عرض

-

-

-

-

-

-

-

المواضيع المتشابهه

ماذا تفعل لو كنت مكانى؟

ماذا تفعل او كنت مكانى

ماذا تفعل لو كنت مكانى

ماذا تفعل لو كنت مكانى

ماذا تفعل لو كنت مكانى

الكلمات الدلالية لهذا الموضوع

المفضلات

المفضلات

ضوابط المشاركة