الموضوع: الي الاخوه المتزوجون: العيال هتجنني و اريد حلول

المشاركة الأصلية كتبت بواسطة mido90

يا باشا عادى جدا الولد بيدور على الغذاء فالثدى هو مصدر الاكل و الحنان بالنسبة لة مش زى ما انت فاهم و بعدين الشقاوة و الصحيان دى علامة جيدة على صحتة النفسية و الجسدية استحمل الفترة دى دة شىء طبيعى جدا

غذاء ايه بس ؟ علي اساس ان الاستاذ محروم ؟ و بعدين يتشاقي و يعمل كل ما تشتهي نفسه بس مش حساب حياتي انا

المشاركة الأصلية كتبت بواسطة sanhory

يا عزيزي كلنا هذا الرجل
انا عندي بنت 4 سنين و ولد سنتين الواد مطلع $%#^$%^$^ اللي جابوني و طبعا الام بتشتغل بس متهيئلي الحضانة حتظبط الاداء شوية لو مش بتوديه الحضانة ابتدي وديه يفرغ طاقته هناك و يرجعلك هلكان(نوعا ما بس مش شرط برضه ) بس اهو يبقى ارحم من قعدته عند جدته و بيبقى مقيد برضه مش زي الحضانة

انا عايز اقولك البنت كانت هادية هو اللي عفرتها مش عارف نعمل مع العيال دي ايه مفيش رش يترش عليهم زي بتاع الصراصير كده

انا ساعات ببقى عايز اقوم انط من البلكونة او اولع في نفسي خاصتا اني برجع قبل مماتهم من الشغل بساعتين في الساعتين دول بعرف ان الله حق و اننا بنيجي عالستات لما بنطلب منهم حاجات و معاهم العيال يا راجل دانا مبعرفش اعمل بيبي حتى

بس شوف موضوع الحضانة ده حيخليهم يناموا بدري انا عندي دلوقتي بينامو 9.30 بس بعد ما يتأكدوا ان انا و مامتهم نمنا و بنيجي نعمل نايمين فبنام فعلا بس قشطة اي حاجة هو حيبقى لا نوم ولا صباح الخير !!

تحياتي ليك

البيه بيعد يبكي في الحضانه و في كثير من الاحيان "بيتصلوا بالمدام و يجبوها علي ملي وشها" طب ايه الحل ؟

المشاركة الأصلية كتبت بواسطة mohamed_selim

اعملهم حته امنه فى البيت و تكون متسوره كويس و فيها لعب و مخدات و ميكونش فيها كهربا او زجاج و دخلهم و سيبهم ... هيلعبو و يعيطو و هينامو !

سوف افكر في هذا الحل جديا طالما "هيحلوا عن قفا اللي خلفوني"

المشاركة الأصلية كتبت بواسطة w-m-a

يا عزيزى كلنا هذا الرجل !!!!!!!!!!!!!!!
بالنسبه لموضوع الولد ده طبيعى بعد الفطام
وخاصه اذا شاف طفل تانى بيرضع
وفعلا الحضانه كويسه بس تكون حضانه مستوى
وموضوع المكان المخصص ده ممتاز
ربنا يحفظهم جميعا

و الله انا اشك في نوايا الواد و بيبقي باين عليه مش حكايه رضاعه و بس

المشاركة الأصلية كتبت بواسطة hossam_elwani

انا فى نفس مشكلتك لدرجة ان حصل نفور وسلبيه دائمه بين الزوجين

واقسم بالله لو رجع بيا الزمن مش حتجوز ولا اخلف ........ على الرغم من ايجابيته عند البعض

وهذا هو قدر الانسان ودلالته فى قوله تعالى "لقد خلقنا الإنسان في كبد "

تحياتى

لا صدقني سوف تتزوج لو رجع بيك الزمن و علي نفسي قبل الجواز كنت حاسس بعدم استقرار و بعد امان غير طبيعين و بحمد الله ان بقالي بيت بدل العزوبيه و الصياعه و الجواز ستره

المشاركة الأصلية كتبت بواسطة shaddadfalcon1

ههههههههههههه ربنا يخليهملك وعارف لو سبتهم وسافرت هتقعد تفتكر في الحاجات دي وتضحك وانا فاهم قصدك لان الواحد بيوصل لمرحله مش عارف حتي يعف نفسه ولو عمل حاجه بتبقي تقضية واجب مش زي الأول

انا عندي محمد عنده 4 سنين ونص والحمد لله نوعا ما هادي وبينام بدري وخصوصا انه في المدرسه دلوقتي

ابراهيم الصغير سنتين بقي ده عيل فظيع وعنده عقده من كل حاجه قدامه ياما يرميها او يكسرها ويرميها من البلكونه كمان لدرجة ان العيال اللي بيلعبو تحت العماره كانو بيتخانقو علي اللي يطلع الحاجات اللي الأستاذ يرميها

وبرده موضو النوم ده عنده غبي مش بينام خالص مع ان المفروض العيال الصغيره تنام كتيير

الحل انك تاكلهم كويس وتصحيهم بدري ومتخليش المدام تنيهم بالنهار وحاول توديهم حضانه او تيجبلهم لعب عشان يطلعو فيها طاقتهم لان الظاهر ان عندهم طاقه ذايده مش عارفين يفرغوها فيا

وبالنسبه للعسل الصغير عادي ومتحاولش تلفت نظهره انك مهتم عشان هيعملها كتيير عشان يلفت نظرك اكتر
هو بيعملها جايز عشان يرضع بس المفروض انه اتفطم دلوقتي بس جايز دي الطريقه اللي تعود يرضع بيها انا اتذكر ولادي الأتنين لما كنو بيصحو بالليل كانو بيرضعو لوحدهم يعني يحطو ايديهم ويطلعو ويرضعو ويرجعو الحاجه مكانها تاني هههههههههه

ابراهيم ابني بقي لما يشوف حد زرار القميص مفتوح مثلا اوواحده مش محجبه يقول عيييب بس ينطق العيب الف كانه خواجه ويفضل يقول ابطه يعني اربطه اواقفل الزارار يعني :)))

فعلا و انا في الشغل بعد اتذكر مصايبهم السوده دي و اعد اضحك و في نفس الوقت ببقي قلقان جدا عليهم ده انا فضلت 5 سنين جواز بدون خلفه و كانت الحياه وردي و مفيش قلق و لا شئ من هذا القبيل

انا و المدام بنبدأ رحله الجهاد و نبتدي ننيم العيال من الساعه 10 عشان علي 12 يكونوا ناموا و ساعتها الواحد بتكون مفاصله سابت اساسا (حرام)

المشاركة الأصلية كتبت بواسطة mohammedabdallh

انت كدا فتحت فتحه انت مش قدها
كل المتزوجون هتخش دلوقتى تكتب نفس الكلام
الحل حضانه
او حماتك او ولدتك هما الى يشيلوا العيال ويشركوا فى تربيتهم
اما موضوع مكان معزول وكدا هيعدوا يعيطوا ومش هتعرف تنام برده

الكبير بوديه الحضانه و في بعض الاحيان لما احب اخرج انا و المدام بجيب بنت خاله المدام و صديقتها تعد مع العيال و لما بنرجع بحس انهم هيشتمونا او شئ من هذا القبيل

المشاركة الأصلية كتبت بواسطة ahmed a.maksoud

ههههههههههه أسلوبك مسخرة.......و واضح أن أبنك طالعلك :)

بص يا باشا الموضوع عادي و اللى محسسك بيه بزيادة هو فرق العمر الصغير بين ولادك ربنا يخليهم لك.

حاول لو فيه أمكانية تدخل أبنك حضانة..........هيرجع مهدود و هينام.....أو على الأقل هينام بدري أكتر من الطبيعي.

الله يخليك يا فندم و حتي سألت والدتي عن هوايه الاستاذ فاستغربت و قالتي عمرك ما عملت كده و حاسس فعلا ان الواد هيطلع عيل صايع بس انا مكنتش صايع بصياعته دي و بالمناسبه الفرق بينيو بين ابني 30 سنه يعني فرق كبير

المشاركة الأصلية كتبت بواسطة w-m-a

يا عزيزى كلنا هذا الرجل !!!!!!!!!!!!!!!
بالنسبه لموضوع الولد ده طبيعى بعد الفطام
وخاصه اذا شاف طفل تانى بيرضع
وفعلا الحضانه كويسه بس تكون حضانه مستوى
وموضوع المكان المخصص ده ممتاز
ربنا يحفظهم جميعا

و الله مش حاسس انه موضوع فطام و شكلنا داخلين علي قله اجب

المشاركة الأصلية كتبت بواسطة Ahmed_Adham

بالنسبه للنوم. متخليهوش ينام فى الوقت اللي هوه عايز ينام فيه عشان تخليه ينام في الوقت اللي انت عايزه ينام فيه.

مواعيد النوم متظبطه من نوم ولادتهم و لكن ال 6 ساعات بتوع النوم بيبقوا متقطعين و بيطلعوا عينينا عشان يناموا و لا كأنها حاجه غريبه عليهم

المشاركة الأصلية كتبت بواسطة ahmedeihab

ربنا معاك يارب

و على فكره الخلفه مفيش احسن منها

و كل الناس على هذا المنوال مش انت لوحدك

^_^

ربنا يكرمك بالذريه الصالحه و ان شاء الله يكونوا صاحيين 24 ساعه و ساعتها مش هتقول الخلفه مفيش احسن منها

المشاركة الأصلية كتبت بواسطة msobhy

بص حضرتك انا هاكرر كلمة الاعضاء ان كلنا هذا الرجل
احب اضيف ملحوظه رفيعه كده على السريع
انا عندى ولدين 4 سنوات و 5 سنوات
مش هاقول هما بيعملوا ايه لكن أول يوم ليهم فى المدرسه واحنا رايحين نجيبهم عادى زى بقيت الناس
مدرسة الفصل بتاعهم أول لما شافتين باللفظ كده
هو انت والد مروان وحسام ------ بمنتهى البلاهه رديت - أيوه
الست (اللى هيه المدرسه) الله يكون فى عونكم - هو انتوا مستحملينهم ازاى
مشرفة الدور نفس الجمله بالظبط لا زادت حرف ولا قلت حرف
تانى يوم مدرسه (والرجاله بدءت تتعود على المدرسه بقى) المدرسه جابت مراتى تقريبا من قفها وهيه ماشيه وبمنتهى العصبيه قالت لها
هو انتى لما بتحبى تسكتى عيالك بتعملى ايه
اليوم الثالث (وربنا المدرسه بتستننا زى ما نكون حراميه) يا استاذ حرام عليك اللى بتعلمه لأبنك ده - الولد عمال يضرب الاطفال ولما بكلمه بيزعق لى ويقولى بابا قال كده (ابن الفتانه)
اليوم الرابع .......... اروح اخد دوا الضغط وارجع اكملك

موضوع الحضانه ده احراج لوحده و تضييع وقت ما يعلم بيه الا ربنا و شكلي هاخد دوا ضغط انا كمان

المشاركة الأصلية كتبت بواسطة aif

يا باشا احنا الكبار لنا نظرة مختلفة عن الطفل
بينما نحن ننظر لصدر المرأة انه عورة وذو ايحاء جنسي وما الى ذلك
الطفل يراه المكان الذي يستمد منه الغذاء والحنان من امه
واكيد بعد الفطام يظل بداخله حنين لصدر امه
وهو اكيد مش فاهم ليه امه منعته من الرضاعة من صدرها وفي نظره انها منعته من حبها وحنانها
علشان كدة لما بيشوف اي امرأة اخري بتلاطفه او تلعب معاه في هذه المرحلة بيحاول يجد عندها ما فقده عند أمه ... عشان كدة بيتجه مباشرة نحو صدرها محاولا تعويض ما حرمته امه منه
...
انا شايف تصرفه في هذا العمر منطقي وطبيعي وليس به اي شيء غريب او شاذ
والفطام زي ما هو ضروري للطفل لكنه شيء صعب ولا يخلو من القسوة .... لكنه لابد منه كما ذكرت
......
اما موضوع النوم ده هو الطبيعي بتاع الاطفال
حاول بدل ادوية الحساسية تخليه يلعب ويبذل مجهود جثماني كتير يفرغ الطاقة اللي عنده الاطفال لازم يجرو في البيت ويلعبو ويروحو نادي وحضانة لتفريغ طاقتهم
ربنا يخليهملك ويباركلك فيهم
....
عرفت بقى انت كنت بتعذب والدك ووالدتك قد ايه وانت صغير ؟؟؟
:-)

الولد عنده حساسيه فكده كده بياخد ادويه مفيهاش كلام لكن البنت معندهاش و برضه بتاخد ادويه عشان تنااااااااااااااام و طبعا كل ده بعد استشاره المختصيين يعني

انا حاسس ان عاده ابني دي مش حكايه فطام ( ده بيحط ايده جوه ) استغفر الله العظيم

انا كل ما انزل اجازه اعد ابوس ايدين والدي و والدي و اشكرهم انهم لم يرموني في اقرب ملجأ

المشاركة الأصلية كتبت بواسطة tamer_a7

ههههههههههههههه انت مش متخيل كميه الضحك اللي انا ضحكتها بدايه من اول الموضوع لغايه الاخر
يا باشا دا انت عايش معايا في البيت انا عندي كريم واحمد 5.5 و 3
دا حضرتك انا والمدام خلاص اخوات ههههههههههههههه
انا بقي عندي احمد معتبرني الاب الروحي بتاعه يعني سيدتك حاجه لازقه فيه والله لدرجه انه لما يجي ينام ينام في حجري ويرفض ينام علي السرير وما يتحطش علي السرير غير لما يروح في النوم تماما
انا ما بعرفش افتح لاب ولا حتي ايباد لان ايده سبقاني في كل حاجه حتي يا ربي الموس التاتش بتاع الاب عرفه وايديه علي طول طلقه عليه
بص موضوع النوم دا حله في الحضانه هيه اللي هتظبط نومه لانه هيبذل مجهود كبير جدا جري ولعب وكمان صحيان بدري
وربنا معانا جميعا ههههههههههه دا احنا طلعنا في الهوا سوا كلنا هههههههههههه

يا رتني انا و المدام اخوات ده احنا جيران مش اخوات و علي الاقل الاخوات بيتكلموا مع بعض و بيسلموا علي بعض لكن هيهات اخرنا مكالمه 30 ثانيه علي الموبايل عشان طلبات البيت و البهوات

موضوع اللابتوب ده موضوع ملل فعلا و الواد عايز يعد يلعب عليه بيتضايق اني لا ارضي هذا و بناقص من اني اكمل شغلي

موضوع النوم متظبط بس بيطلعوا عين ابونا و عقبال ما بيناموا بتكون الساعه 12 و الواحد جاب سولار مش جاز و خلينا قاعدين اخوات (الصبر يا رب)

المشاركة الأصلية كتبت بواسطة BESO516

ايه الرجوله المشرده دى

انتو كل شويه تطلعوا بموضوع تخلونى افكر افركش خطوبتى وبأذن الله يحصل
الواحد عنده24 سنه يلحق يعيشلو يومين قبل الهم اللى انتو بتحكوا فيه ده (: ربنا معاكوا

لا طالما مشيت في موضوع الجواز كمل مفيش مشكله و لكن اجل موضوع الخلفه علي قد ما تقدر

يا باشا كلنا هذا الرجل بس يظهر انت اللي جديد
و انت فاكر أنهم لما يكبروا حالك هايتعدل ؟؟؟؟ أبقى قابلني
ده انت لسة ماشوفتش حاجة لما حد بالعيال يتعلق بحد فيكم و يغير عليه من الطرف الثاني
و بس لو ندهت تبقي عملت جريمة
انا عندي ابني 3.5 لو ندهت بس علي والده الاقي وشه قلب عاوز اييييييه
و لا بنتي 7 سنين لو والدتها احتاجت مني حاجة ضررررة
انت كده في المرحلة الأولى
المرحلة الثانية عصبية بلا حدود و بلا داعي و خناقات علي اقل حاجة منكم انتم الاتنين
المرحلة الثالثة صمت و خرس زوجي
المرحلة الرابعة البحث عن متنفس خارج البيت (ماتفهمنيش غلط ) انا أقصد انك تنضم لينا منتدى أزواج و لكن عزاب
و لينا فرعين فرع في المؤسسة
و فرع في فيصل
(دي قهاوي علي فكرة عشان برضه ماحدش يفهمني غلط )
و عموما اوعي الشيطان يضحك عليك و يخليك تفكر تتجوز تاني اذا كنا مش سالكين بواحدة هانعمل ايه في اتنين !!!!
اعمل اي حاجة الا الجواز الثاني. اي حاجة (مش عارف ليه مصممين تفهموني غلط )
نياهاهاهاها
نياهاهاهاها

المشاركة الأصلية كتبت بواسطة khaled_legand

انا حاسس ان عاده ابني دي مش حكايه فطام ( ده بيحط ايده جوه ) استغفر الله العظيم
مش عارف ليه شامم ريحة غيرة

انا كل ما انزل اجازه اعد ابوس ايدين والدي و والدي و اشكرهم انهم لم يرموني في اقرب ملجأ
صدقني هاتلاقيهم فكروا في الموضوع ده كتيررررر زيك بالضبط



يا رتني انا و المدام اخوات ده احنا جيران مش اخوات و علي الاقل الاخوات بيتكلموا مع بعض و بيسلموا علي بعض لكن هيهات اخرنا مكالمه 30 ثانيه علي الموبايل عشان طلبات البيت و البهوات
هاهاهاها ده الموضوع طلع عادي يا جدعان

احنا ناسيين حاجة مهمة جدا

اننا نقول الحمد لله غيرنا مش لاقي يتجوز و غيرنا مستعد يبيع اللي وراه واللي قدامه عشان حتت عيل

نقول الحمد لله يا جماعة , بعد كده نشتم فيهم براحتنا نيههههههها