الموضوع: ايهما افضل نيسان صنى الجديده او رينو لوجان

ايهما افضل نيسان صنى الجديده او رينو لوجان علشان انا تعبت من التفكير واحد يقولى ابعد عن المصرى و خليك فى المستورد وواحد تاني يقولى الصنى اكيد احسن طيب و لو كانت الصنى احسن هل تستحق الفرق فى الفلوس ده كلو 22000 ولا احسن بحجات بسيطه شكل و كده لان الفرق ده هقسطو ولو فى عربيه تانيه فى نفس السعر قولولى و شكرا اوى

المشاركة الأصلية كتبت بواسطة ahmed_m_ashraf

إيه العيوب دي يا أستاذ هيثم؟ أنا بصراحة معنديش فكرة ٢٠١٠ كان تقفيلها مستواه إيه، بس قريت في كذا موضوع من ناس راكبة لوجان من زمان إن التقفيل من ٢٠١٢ ويمكن من ٢٠١١ كمان أفضل جوده بعض الشئ في كذا نقطه منها نوعية الفرش للكراسي وخامات التابلوه وفرش الأبواب وهكذا. أنا عن نفسي مليش ملاحظات على التقفيل بالنسبة لفئه العربية و مقارنة مع البدائل في نفس السعر.

ياريت توضحلنا بنقط محدده لو أمكن.

بالنسبالي، أؤيد كلام أستاذ وسيم وأيمن، اللوجان عربية محترمة مفيش كلام ليها عيوبها آه بس مقابل المميزات والسعر، صفقة رابحة طالما متقدرش تجيب حاجة أعلى (وأكيد الصني ليها عيوب برضه، شوف قسم الصني عشان تبقى كل حاجة واضحة بالنسبالك)، لاكن لو أنا لسه بشتري الصني الجديدة كانت هتشدني أكيد، بس الأول هتفرج عليها كويس وأطمن من مستوي التقفيل وكمان هتأكد إنها مريحة في القعدة مكان السواق بالنسبة لواحد طويل زي (١٩٥ سم) لأن الصني الشكل القديم كانت ضيقة جدا بالمقارنة مع اللوجان (وبصراحة لولا النقطة دي كنت هاخد فترة طويلة أحاول أحسم قراري بين لوجان وصني الشكل القديم). بس لاحظ إني في كلا الحالتين بتكلم في دفع كاش. يعني لو الصني هتدخلك في قسط، دي ليها حسبة أخرى، أنت أدرى بظروفك.

لو على التقفيل، الصني تقفيل مصري آه بس اللوجان فئه أقل شوية فمظنش تتفوق على الصني في التقفيل وبعدين واضح إن كل مصانع العالم بقى ليها هفوات في التقفيل، يعني الواحد بقى بيسمع كتير عن عربيات زيرو والكاسيت مش شغال أو زجاج كهرباء مش شغال. عاين الصني ولو إرتحت لمستوى التقفيل يبقى خلاص. موضوع الإحساس بالفرق محتاج حد يكون جرب الإثنين.

بص يا باشا.
اللي مش عاجبنى التالي:
1- غطاء الماتور اللي فى 2013 مختلف عن 2011. بتاع 2011 مكتوب عليه رينو و السعة اللترية و شكله احلي من مو 2013
2- فى خلوص كبير نسبي فى التابلوه من جهتى اليمين و الشمال ( المسافة بين التابلوه و الباب) و المسافى بين بربيز الزجاج الامامى و التابلوه اكبر من اللي موجود فى مو 2011

المقارنة ده لاحظتها عند مقارنتى بين سيارتى الشخصية و سيارة العمل