كليو ولا لوجان ؟؟ لوجان ولا كليو ؟؟

**Chicco** · 12-07-2008 02:41 AM

المشاركة الأصلية كتبت بواسطة Ramy_Tantawi

السلام عليكم.

التيست درايف عند رينو موجود وممكن اي حد يحجز ان شاء الله عن طريق الاتصال بي 16202 والتفاصيل عندهم ان شاء الله اكتر طبعاً مني.

سؤال جانبي لدكتور هشام فرصه نستغله هنا بس مش كاطبيب زي المره اللي فاتت جزاه الله خير المره دي كا عضو من اعضاء الاسره الرينوهاويه . هو في لوجان وكليو في كندا ؟ اقصد يعني الرينو عموما في كندا انتشارها عامل ازاي وايه الماركات اللي حضرتك بتحس انها مكتسبه ثقة السوق اكتر من غيرها في العموم في كندا واشكر حضرتك على سعة صدرك وجزاك الله خير يا دكتور.

أنا تحت أمرك يا رامي باشا ...اتشرف اني فرد من الأسرة الرينو هاوية ده كفاية إن حضرتك فيها بذوقك و أخلاقك العالية ....ربنا يديم المعروف يا أخي الفاضل

بص يا سيدي ....ما فيش رينو في أمريكا الشمالية كلها ....لا كليو و لا لوجان و لا غيرهم .....ده مش بس كده العربيات الفرنساوي كلها مش موجودة .....فيه كلام عن بيجو انها حترجع تاني بس لسه كلام

أكتر عربيات الناس بتثق فيها هنا الياباني خصوصا هوندا و بعديها تويوتا بماركاتهم الفاخرة اكيورا و لكزس

نيسان (+انفنتي) و مازدا عملين شغل كويس برضه ....متسوبيشي و سوزوكي أقل كتير

الأوروبي البي أم و أودي الأحسن و بعدين مرسيدس و فولكس
فولفو و ساب على استحياء

الامريكاني منتشر طبعا انما سمعته وحشة ...اعتمادية و أداء و استهلاك بنزين ....ألا فيما ندر

الكوري هيونداي شادة حيلها جدا و مبيعات بتزيد اطراديا

ما فيش لا صيني و لا ماليزي

بورشه مرطرطة في الشوارع :)

لو نسيت حاجة أسأل يا باشا و أنا أرد

**itsonlyme** · 12-07-2008 03:34 AM

المشاركة الأصلية كتبت بواسطة Ramy_Tantawi

السلام عليكم.

التيست درايف عند رينو موجود وممكن اي حد يحجز ان شاء الله عن طريق الاتصال بي 16202 والتفاصيل عندهم ان شاء الله اكتر طبعاً مني.
.

معقولة؟ دي تبقى حاجة كويسة أوي. عموما نتصل ونشوف.

المشاركة الأصلية كتبت بواسطة Ahmed Allawy

بصرة.. انا كمان شوفتها هناك النهاردة.. يمكن شوفتني و شوفتك بس منعرفش بعض.. :) :) :)
عموما.. انا شايف فيها حاجة.. انها عكس العربيات الصيني.. بمعني:::
العربية دي اساسياتها كويسة جدا جدا جدا موتور و عفشة رينو.. تكنولوجي قديمة نسبيا سهلة الاصلاح.. رخيصة نسبيا..
اتساع العربية في منتهي الجمال.. الصالون و الشنطة..
وده المهم في العربية.. غير كده يعتبر كله رفاهية..
يعني التقفيل و الخامات عليها تحفظات.. و السعر برضه عليه تحفظ.. بس المشكلة ان السوق كله علي دلوقتي.. مع امكانية ان لو سعرها نزل شوية هتبقي انسب..

العربياتا لصيني بقي كماليات و بس.. اساسيات متضمنهاش.. الله اعلم بيها..

كل واحد بقي ادري بظروفه.. وهو عايز ايه م العربية..
.
.

أنا شايف ان التابلوه و الأبواب خامتهم كويسه. الي استغربته هو فرش الأرضية والسقف والشنطة. لاحظت الموضوع ده؟

عموما ممكن أروح تاني عشان أشوف تاني العربية وبالمره أشوف الموتور.

**Chicco** · 12-07-2008 04:01 AM

المشاركة الأصلية كتبت بواسطة Ramy_Tantawi

السلام عليكم.

التيست درايف عند رينو موجود وممكن اي حد يحجز ان شاء الله عن طريق الاتصال بي 16202 والتفاصيل عندهم ان شاء الله اكتر طبعاً مني.

ازاي ما خدتش بالي من المعلومة ديه ...ألف شكر يا رامي باشا ....فعلا توكيل محترم :)

**amr123** · 12-07-2008 02:29 PM

السلام عليكم :

ارجو انت يتسع صدرك لتعليقى

قبل الكلام احب اعلق على مووضع التسيت درايف ...هو فعلا موجود و انا سألت عليه اكتر من مرة بس كان الرد واحد "اه طبعا ممكن بس للاسف مفيش عربيات دلوقتي للتست هنتصل بحضرتك اول مايكون ممكن" كمان ده بيكون في العبور بس

الكليو مناسبة جدا لواحد مش فارقة معاه الكنبة الي ورا - ده رأي
اللوجان واسعة واسعة بجد عمرك ماحد يجلس خلف السائق و يشتكى من ركبته ده بالاضافة انها ممكن تاخد 3 اقراد
قطع الغيار اعتقد انها قريبة جدا من بعضها
اعتمادية اللوجان اكيد اكتر صاج و عفشة اقوي بشك واضح ختى للعين و يدل على ذلك نجاح داتشيا في الموديل ده في دول امريكا الجنوبية
الموتور قريب من بعضه و ان كان موتور الكليو احدث بس الللوجان اقوى
كماليات اللوجان اكتر

انا رأي لو حضرتك عايزة حاجة متجربة في مصر بقالها سنين و مش فارق معاك حجمها يبقى كليو
عايز حاجة عائلية بكماليات لا تحتاج لتغيرها قريبا لما اسرتك تكبر و مش فارق معاك شكلها يبقى لوجان

اتفرج تاني و تاني و تاني و استفت قلبك و ربنا يوفقك لأختيار سليم

**mohamedmonam** · 13-07-2008 10:08 AM

سؤال يا جماعة معلش ... كنت فى معرض شركة عربيات فى المهندسين وقاللولي ما فيش كليو هاتنزل تاني من 2008 هل الكلام ده صح وانتاجها هايوقف؟؟!!

**أبو عبدالله** · 13-07-2008 02:29 PM

المشاركة الأصلية كتبت بواسطة mohamedmonam

سؤال يا جماعة معلش ... كنت فى معرض شركة عربيات فى المهندسين وقاللولي ما فيش كليو هاتنزل تاني من 2008 هل الكلام ده صح وانتاجها هايوقف؟؟!!

الكليو في منها انتاج جديد
ولكن ممكن يكونوا في التوكيل هنا المصري مش هينزلوها لأن كان سعرها حوالي 120 الف يعني بسعر الميجان وانا شوفتها في معرض اتوماك السنه اللي فاتت

ودي صورة لها

**Chicco** · 13-07-2008 03:28 PM

ألف شكر يا أبو عبد الله باشا ...ديه شكلها الكليو الفرنساوي (تقفيل بلدها) و الله أعلم ...... على فكرة أنا لما اشتريت الكليو التركي سألتهم في التوكيل عليها و قالوا ممكن يجيبوها سبشيال اوردر ب-١٢٥ ألف لو فاكر كويس ....طبعا قلتلهم و مالها التركي

يا تري التوكيل حيكتفي بلوجان في الفئة ديه ؟

**itsonlyme** · 13-07-2008 05:16 PM

المشاركة الأصلية كتبت بواسطة mohamedmonam

سؤال يا جماعة معلش ... كنت فى معرض شركة عربيات فى المهندسين وقاللولي ما فيش كليو هاتنزل تاني من 2008 هل الكلام ده صح وانتاجها هايوقف؟؟!!

لما سألت في المصرية للسيارات عن الكليو قالو لي نفس الكلام. استيراد الكليو كلاسيك المعروفه في مصر سوف يقف لتحل مكانها اللوجان.

أما بالنسبه للكليو اللي موجوده في اوروبا, دي هاتش باك وكمان أحدث من الكليو بتاعتنا وعلى فكره هي محققة مبيعات عالية في أوروبا الكام سنه الي فاتو.

**Ahmad Allawy** · 13-07-2008 07:36 PM

الكليو الاصل فيها الهاتش باك علي فكرة..
زي الكورسا و الفورد فييستا..
و البيجو 206.. و غيرها و غيرها..
المشكلة ان عندنا هنا ف السوق المصري عندنا ثقافة السيدان..
لسبب او لأخر.. ..
كون اها تنزل سيدان العربيات دي بيكون يعني حاجة متأخرة.. لو نزلت يعني.. و لكن الاصل بيبقي وهو الهاتش بتاعها..