بطاريه العربيه بتنام كتير ايه الحل ؟

**serona** · 05-11-2012 06:53 PM

السلام عليكم يا جماعه
اولا الصراحه انا استفدت كتير من المنتدي ده بجد اشكر كل الناس اللي فيه
المشكله اللي عندي هو اني كنت اشتريت عربيه من سنه ونص تقريبا وكنت وقتها محتجاها يعني بروح بيها الشغل دلوقتي حصلت ظروف و شغلي بقي في وسط البلد فطبعا مش بروح بيها ابدا لان المكان ده علشان الاقي فيه ركن مستحيل ده غير الزحمه
المهم دلوقتي العربيه مركونه في الجراج مش بخرج بيها الا نادرا جدااااااا ممكن توصل لمره في الشهر و طبعا كتير اوي البطاريه بتنام ده غير انها بقالها سنه و نص و مش عامله غير 1500 ده طبعا نتيجه اني مش بخرج بيها

اللي عايزه اسأله هل ده غلط علي العربيه و هل طبيعي ان البطاريه تعمل كده ؟ و المفروض اعمل ايه لو مش هخرج بيها يعني افصل البطاريه مثلا انا سألت ناس قالولي غلط بيأثر علي البطاريه لو فصلتيها فتره كبيره عن العربيه طيب المفروض اعمل ايه ؟
ياريت تنصحوني و شكرا اوي

**aw2100** · 05-11-2012 08:44 PM

نوع البطارية اللى عندك اية سائلة او جافة ؟ لو جافة مفيش مشكلة لو فصلتيها من العربية وهى واقفة ومش حتنام حتى لو سبتيها شهر مركونة لكن اعتقد ان اللى عندك سايلة ودى محتاجة شحن كل فترة ممكن تغيريها ببطارية جافة او تتدورى العربية وهى مركونة مرتين فى الأسبوع مدة 10 دقائق على الأقل لشحن البطارية ولو بطارية جافة دة معناه انها عايزة تتشحن عند كهريائى على التونجر شحن بطئ علشان تاخد كمية كهرباء كافية مدة لاتقل عن ساعتين علشان البطاريات الجافة لما بتفضى بتحتاج شحن على التونجر لان دينامو العربية مش كافى لشحنها وربنا يكفينا شر الزق !!

**serona** · 06-11-2012 03:12 PM

شكرا لاهتمامكم بس البطاريه جافه و انا بدورها مره واحده الصراحه كل اسبوع و بتنام برضه و رحت للتوكيل علشان في ناس قالتلي كده البطاريه بايظه قالولي لا البطاريه سليمه بس مفيش حاجه اسمها ادور العربيه لازم اخرج بيها و دلوقتي انا مش عارفه المشكله فين و ايه الحل مع العلم ان البطاريه بتنام تقريبا كل شهرين او ثلاثه و هي النترا 2010

**aw2100** · 06-11-2012 03:36 PM

يبقى البطارية عايزة تتشحن عند كهربائى على التونجر شحن بطئ علشان تاخد كمية كهرباء كافية مدة لاتقل عن ساعتين علشان البطاريات الجافة لما بتفضى بتحتاج شحن على التونجر لان دينامو العربية مش كافى لشحنها فى مدة 10 دقايق كل اسبوع وتكررى الشحن عند الكهربائى كل ما تفضى ودة طبيعى فى الوضع دة بالنسبة لبطارية حضرتك

**dr.hazem** · 06-11-2012 04:03 PM

من التجربة،، الصلانسيه مش بيشحن البطارية كويس. والافضل من مجرد التشغيل لمده 10 دقايق هو المشي لمشوار بسيط 10 دقايق كل أسبوع بسرعات اعلى من 40...

تحياتي

Sent from my LT18i using Forum Runner