السلام عليكم

حابب ققول كلمه صغيره للناس اللي بتحاول تنشر الاحباط واليأس ... الناس اللي بتحاول تصور ان اي مؤيد لمرسي او اي واحد مش محبط زيهم شايف الكاكا مانجه (نقلا بالنص مع اعتذاري)

احنا عيشيين معاكوا في نفس البلد ... النور والمايه بيتقطعوا علينا زيكوا (الميه بالذات لازم تقطع عليا يوم الجمعه وانا بستحمى )... بنقف بالسنين في زحمة المرور ... وبنتفرج على عربيتنا وطرقنا الجميله بتدمرها
مفيش طياره هيلوكبتر بتشيلنا من زحمة المرور ولا مرسي بيبعتلنا مولدات كهربا ... عايشين بناكل وبنشرب من اللي بتكلوه وبتشربوه .... وبنقف زي أي حد في طابور البنزين 3 ساعات عشان ناخد ربع لتر يدوب يكفي تدور بيه على بنزينه تانيه وغيره ...

بس الفرق اللي مش عارفيين تفهموه اننا عندنا امل ... على يقين ان ربنا هيعوض صبرنا
الامه اللي معندهاش أمل في بكره هتتدفن بالحي والدوس عليها الاقدام


قال تعالى : ( وأورثنا القوم الذين كانوا يستضعفون مشارق الأرض ومغاربها التي باركنا فيها وتمت كلمة ربك الحسنى على بني إسرائيل بما صبروا ودمرنا ما كان يصنع فرعون وقومه وما كانوا يعرشون ) .


انا زهقت من الناس اللي شغاله ااحبااط للبشر طول اليوم .... اااالبلد ضاعت ... مفيش امل ... مرسي فشل ... تكلمه بالحسنى يتهمك انك اخوان او تجار الدين ضحكوا عليك وعلى العموم الراجل بينقد بس!!

ده مش نقد ... ده نشر لليأس والاحباط الشديد وتبديد أي أمل في عيشه كريمه
يأ أخي ابني ومتهدش .... ليه ديما بتفترض سوء النيه... ليه بتعشق حب رؤية الجزء المظلم متقليش مفيش غيره لأ اسف... عاوز االبلد في 100 يوم تتخلص من 30 سنه فساد وتخلف .... عاوز تحصد قبل ما تزرع .. عاوز تعمل ثوره وتهد البلد و مدتفعش التمن ... بتتكلم بأي منطق

نفسي حد من النخبه السياسيه يطرح حلول ... يشمر ايده ويشتغل للبلد فعلا ... مش يبأ شحط كده وكل همه النيل من الاخوان والتيار الاسلامي عشان فاكر انه كده هيكسب النااس!

انا والله بحب بلدي جدا زي أي واحد فيكو وطموحي ليها مش بس أحسن اكل وشرب ... لا طموحي لبلدي أعلى من كده بكتييييييييير .... بس الصبر والعمل وامل ... شيلنا مبارك الكبير بس لسه مشلناش مبارك اللي جوه كل واحد فينا

مش عاوز اتكلم كتيير ... بس احنا خدنا قاعده في الاقتصاد " اللي الناس بتتوقعه, بيحصل" .... قبلها بكتيييير قدوتنا عليه الصلاة والسلام قال: تفألوا بالخير تجدوه"

 اتمنى من اللي بينقد يبقد بموضوعيه .... والناس اللي بتحاول تنشر اليأس ان شاء الله كيدهم مردود عليهم

نلقاكم على كل خير ان شاء الله