الموضوع: متسيبش مخالفة تعدي.......نايل موتورز تتعاون مع Emokhalfa

كلنا بنحب مصر بجد...... لان كل واحد فينا اكيد كان بيفكر في الفكره دي .......

يجب تطبيق القانون علي الكبير قبل الصغير ..........الكبير و المسئول لازم يكون قدوه حسنه ........

( ان الله لا يغير الله ما بقوم حتي يغيروا ما بأنفسهم ) .....قرءان كريم .

اولا نشكر جميع من اهتم بالموضوع من الاعضاء ونشكر كل من اداره المنتدي والاخ احمد علي المبادره بالتنسيق بين فريق اي مخالفه و نايل موتورز
احب اوضح احنا ايه هدفنا باي مخالفه اكيد كلكم عارفين حال الشارع المصري من انعدام النظام والتسيب اللي فاتورته السنويه بندفعها ٢ مليار جنيه خسائر حوادث عشره الاف قتيل وخمسين الف مقعد. فكرنا ازاي ممكن نساعد ان احنا نغير في شوارعنا لان احنا مؤمنين ان الوضع الحالي هيفضل يسوء طول ما مفيش حاجه جديده حصلت. الحكومه جربت تعمل مخالفات اغلي بس ده ماحلش حاجه لان الناس مش مهتمه بالعقوبه الماليه. فوصلنا ان ممكن نقدر نآثر عن طريق الضغط المجتمعي. احنا بنجمع المخالفات كلها في قاعده بيانات متاحه للجميع مجانا فبالتالي كل ام ممكن تدخل تبحث عن نمره الباص اللي بتودي ابنها او بنتها بيه للمدرسه ولو لقت مخالفات تقدر تعمل مشكله في المدرسه لان معظم مخالفاتنا متصوره صور واضحه. ممكن اي حد بيشتري عربيه مستعمله يكشف علي ماضي العربيه ولو لقي صاحبها مثلا بيتحرش ببنات ممكن يقرر انه ما يشتريش منه. ده اسمه وسائل جديده للمجتمع لمعاقبه المخالفين طبعا جميل لو الداخليه في ظابط في كل شارع وكمين بس ده مش موجود ويبقي جميل فلازم نفكر بطريقه جديده.
طب المبلغ اي استفادته اولا الطاقه السلبيه اللي اتشحن بيها لما شاف او اتعرض للموقف اتحولت الي ايجابيه لما بلغ.
نعود عيون الناس انها تشوف الغلط لان احنا ساعات من كتر ما بتشوف الغلط وتقول ده عادي بتفقد احساسك بايه صح وايه غلط
نعرف بعض ونبيقي مجموعه كبيره بتنادي بتعديل في قوانين المرور
ونعمل توعيه ان ده غلط ونعرف الناس ايه الصح
من ضمن حملاتنا قريبا دورات بسيطه للاسعافات الاوليه و في المدارس لتوعيه شباب المستقبل
برضه البيانات اللي بتجيلنا بنوصلها للداخليه لدراستها واستخلاص معلومات من الاحصائيات مثل اماكن محتاجه تواجد عسكري او كمين او كاميرا وفيه بعض الحوادث المبلغه تم اتخاذ خطوات مباشره
برضه المخالفات علي عربيات الشركات بنوصلها لاداره الشركات موثقه لمحاسبه الموظفين
هدفنا ان شوارعنا تبقي اامن لينا ولاولادنا
وماتسبش مخالفه تعدي
فريق اي مخالفه

ديه امثال مروريه يقوم اعضائنا بتطويرها كل فتره وهنطبعها قريبا كاستكرز للعربيات

والله موضوع تحفه ربنا يوفقكم وانا عن نفسي مش هسيب عربية مخالفة الا لما اجيبلكم قررها