للمرة الثانية الفرامل هربت و العربية لفت علي طريق السويس

**MITSUKERO** · 18-11-2012 10:48 AM

السلام عليكم

امبارح راجع الظهر علي طريق السويس في اتجاه الرحاب و بدوس فرامل قبل الاصلاحات اللي في الطريق و مرة واحدة لقيت فردة واحدة مسكت فرامل و الباقي لا و العربية لفت نص لفة و كانت هتتقلب

المهم وقفت و بصيت علي العجل الخلفي لاني كنت حاسس ان فيه عجله قافشة و فعلا لقيت العجله اليمين ورا قافشة

استنيت لما العجل برد شوية عشان زيت الباكم يكون برد و الفرامل تشتغل و مشيت بالعربية براحة لحد الرحاب و دخلت علي توكيل كيا جري (توكيل كيا في الرحاب بيصلح اي نوع و لو مش في التوكيل بيبقي في اي محل تابع لصاحب التوكيل جنبه) المهم رحت هناك لقيت مهندس اعرفه كويس من كتر التعامل معاه و رفعهنا العربية و جاب صنايعي و فك العجل اللي ورا و بص و قالي "دي الطنابير خلصانه خالص ياباشا"

طبعا انا رد فعلي كان عنيف جدا و قولتله طنابير ايه يابني ادم انت بقولك الفرامل قافشة ده ماله و مال الطنابير !!! اكيد ماستر

قالي متزعلشي ياباشا انت شاكك في الماساتر الخلفية لو عايز اغيرهالك هغيرهم بس مش هم السبب و هترجع تاني يحصل معاك نفس الموقف بالظبط لان الموضوع ده بيحصل كتير !!!

قولتله طيب ايه السبب و ركزوا معايا بقي في السبب اللي قاله لاني عايز افهمه :

قالي التيل اتاكل من كتر ما الفرامل قافشة و الرجلاش بتاع العجله معمول قافش جدا و الطنابير متأكله و لما ده كله بيحصل مع العالي و الواطي اللي في الطنابير بيخلي سوسته التيل بدل ما تلم التيل مرة تانية بعد ما يفتح بتقوم بقي تفتح التيل و متعرفشي تلمة تاني لما تشد فرامل اليد

قولتله براحة عليا و اعتبرني مبفهمشي اي حاجة

قالي لما بتدوس فرامل قطعة الاولي الامامية في التيل الخلفي هي اللي بتمسك مع الفرامل بتاعة العجل اللي قدام و لما بتشد فرامل اليد قطعتين التيل الخلفي بيمسكوا مع بعض و ده الطبييعي اللي مش طبيعي عندك ان التيل و طنابير خلصانه و ده بيخلي التيل يفتح و ميرجعشي مكانه لما تشد فرامل اليد !!!
قولتله ليه ؟

قالي السوسته لما بتفتح اكتر من الازم مش بتعرف ترجع التيل مكانه

المهم انا اتصلت بمحمد عبده بتاع فيصل و قالي لا ده هتلاقيه ماستر خلفي و تعالي اعملهالك !!

فبقوله دي المسافة من الرحاب لحد عندك كبيرة جدا هاجي ده كله منغير فرامل !!!! قالي تعالي واحدة واحدة !!!

المهم اساسا اني فكيت العجل الخلفي عند محمد عبده من اسبوعين و شحم البلي الخلفي و اخد رجلاش الفرامل و تقريبا هو اللي خلي المشكلة تظهر اوي كده بس الله اعلم لسه هشوف و قالي الماستر سليم بس الطنابير دي هتحتاج تتغير عشان مش كويسة بس عادي تمشي شوية !!!!

دلوقتي بقي العربية مرمية في الرحاب بعد ما الصنايعي قفلها تاني و خلي الرجلاش بسيط عن الاول و العجل مبقاش قافش و قالي لو شديت فرامل اليد الفرامل هتقفش تاني و انا بحذرك اهه عشان متقولشي ان مقولتش قولتله انا هسيب العربية اساسا مش هركبها لحد ما تتصلح

اعمل ايه ؟

هل كلام الصنايعي صح ؟

اغير طنابير و تيل خلفي ؟

اجيب طنابير و تيل منين ؟

طيب اعدل الفرامل الخلفي لسكاكين ؟ التعديل محتاج جنط 14 ؟

تكلفة التعديل بتساوي تكلفة الطنابير ؟

كلام كتير اوي في دماغي و بجد مش عارف اخد قرار و قرفان جدا و محتاج كل الناس المحترمة اللي هنا

معلش انا طولت عليكم بس انا عشمان فيكم جدا ربنا يعلم انا بحب الناس هنا قد ايه

**mero100** · 18-11-2012 11:12 AM

لو زي ما حضرتك ذكرت :
إن التيل الخلفي خلصان يبقي بوظ الطنابير و حتحتاج تتخرط عند خراط أو تغيرها حسب رغبتك .. مع تغيير التيل الخلفي و أعتقد سعره 175 ج في التوكيل معرفش بره بكام .
ثانيا : الميكانيكي حيكشف علي ماستر العجله الخلفي . لو بايظ يتغير . مع مراجعه الفرامل كلها .

ما عتقدش الموضوع فيه أكتر من كده .
و الموضوع بسيط إن شاء الله متضايقش نفسك.

**E_medo77** · 18-11-2012 11:26 AM

يا باشا اولا الحمد لله قدر ولطف ثانيا انا اعتقد ان العيب ماستر مش الرغى اللى بيقوله ده !!!! ازاى الطنابير متاكله وفيهم واحده قفشت ؟؟!!

**MITSUKERO** · 18-11-2012 12:16 PM

المشاركة الأصلية كتبت بواسطة mero100

لو زي ما حضرتك ذكرت :
إن التيل الخلفي خلصان يبقي بوظ الطنابير و حتحتاج تتخرط عند خراط أو تغيرها حسب رغبتك .. مع تغيير التيل الخلفي و أعتقد سعره 175 ج في التوكيل معرفش بره بكام .
ثانيا : الميكانيكي حيكشف علي ماستر العجله الخلفي . لو بايظ يتغير . مع مراجعه الفرامل كلها .

ما عتقدش الموضوع فيه أكتر من كده .
و الموضوع بسيط إن شاء الله متضايقش نفسك.

التيل الخلفي كان سلة جديد و خلص لما الفرامل قفشت

الطنابير بايظة من قبل كده

الطنابير الخلفي ممنوع تتخرط علي حسب كلام اكتر من ميكانيكي

الميكانيكي كشف علي الماستر قدامي و مجبشي زيت

**mero100** · 18-11-2012 12:26 PM

المشاركة الأصلية كتبت بواسطة mitsukero

التيل الخلفي كان سلة جديد و خلص لما الفرامل قفشت

الطنابير بايظة من قبل كده

الطنابير الخلفي ممنوع تتخرط علي حسب كلام اكتر من ميكانيكي

الميكانيكي كشف علي الماستر قدامي و مجبشي زيت

تمام .. أنا مقدر الحيره اللي إنت فيها .. بس خير إن شاء الله ..
كده حتستني رأي حد من الخبراء / محمد ممدوح أو طارق أو عصام غنايم .
حيدوك الرأي الصح و تعمل إيه بالظبط.
بس في وجهه نظري إن المشكله مشكله ماستر عجله .

**swimmer25** · 18-11-2012 01:00 PM

أنا بس حبيت أحييك علي تقديرك للمسئولية وعدم قيادة السيارة بهذه الحالة لأن أرواح الناس في الشارع مش لعبة ولا تجربة
أوصيك بتغيير كل ما يلزم لحل المشكلة حتي لو تكلفة زيادة

**mero100** · 19-11-2012 03:35 AM

ياريت تبقي تقولنا العيب طلع ايه بعد الاصلاح ان شاء الله .

**MITSUKERO** · 19-11-2012 10:02 AM

المشاركة الأصلية كتبت بواسطة mero100

ياريت تبقي تقولنا العيب طلع ايه بعد الاصلاح ان شاء الله .

بأذن الله هروح لمحمد عبده انهرده و هعمل تقرير مفصل عن الفرامل كلها لاني بجد قرفت منها و مش عايز حد يشوف اللي انا شوفته

**mero100** · 19-11-2012 10:33 AM

المشاركة الأصلية كتبت بواسطة mitsukero

بأذن الله هروح لمحمد عبده انهرده و هعمل تقرير مفصل عن الفرامل كلها لاني بجد قرفت منها و مش عايز حد يشوف اللي انا شوفته

ان شاء الله تطلع حاجه بسيطه .

الموضوع: للمرة الثانية الفرامل هربت و العربية لفت علي طريق السويس

LinkBack

أدوات الموضوع

عرض

-

-

-

-

-

المواضيع المتشابهه

الفرامل هربت منى وربنا ستر

الحقوني الفرامل هربت و كنت هعمل حادثة

الحمدلله ..العربية اتخبطت للمرة الثانية قدام البيت !!

الفرامل هربت !!!!

الكلمات الدلالية لهذا الموضوع

المفضلات

المفضلات

ضوابط المشاركة