الموضوع: تقرير شامل عن بريليانس v5 بعد 5000 كيلو

اتوجه بالشكر لكل من ساهم في البوست ده و اصبح مرجع و دليل للي عايز يعرف معلومات عن ال v5 و انا استفدت كتير من مشاركات الاعضاء
الحمد لله انا استلمت العربيه من شهر تقريبا مكنش فيه اي ملاحظات عليها الا صوت عالي معدني سمعته في مطب عبيط مش ممكن يعمل كده
نزلت ابص علي العربيه ملقتش حاجه قلت يمكن الكبوت مكنش اتقفل كويس قفلته و تاني و مشيت علي البيت بعدين خلال اسبوعين اتكرر الصوت ده تلات مرات .. في حاجه غلط و كمان الشنطه لازم تترزع علشان تقفل و الا العربيه مش هتعمل لوك و حصلت معايا و قعدت ربع ساعه مش عارف العربيه مش بتقفل ليه اتاري الشنطه لسه علي كومبيوتر العربيه مفتوحه
كلمت التوكيل و رحت ابوراوش و دي قصه تانيه .. المهم رحت قلتلهم علي صوت عالي في العفشه و مشكله الشنطه كانوا متوقعين الشكوي و النتيجه كانت مرضيه جدا
الشنطه بقت بتقفل عادي من غير ما ارزعها جامد و الصوت اللي كنت سمعته في العفشه لم يتكرر
معقوله كانت العفشه سايبه اوي جده و كانت قصه تربيط بس
قلت اما ابص علي العربيه بنفسي فرحت بنزينه و نزلت تحت العربيه لقيت ان فيه شداد كبير كده بين العجلتين اللي قدام ده الوحيد اللي مساميره مكانها اتغير و عرفت من العلام باللون الازرق اللي علي راس المسمار لكن باقي المسامير متلمستش !!
خليتهم يربطوا كل المسامير و كلها جابت !!
بعد كده العفشه بقت تمام و مرضيه جدا
لسه مش مصدق ان العفشه كانت سايبه .. حركه بايخه في عربيه زيرو
حاجه تانيه مش ظريفه
تانك البنزين فيبر و بمستوي العربيه يعني مش اعلي عن الارض عن باقي جسم العربيه من اسفل
بعض الملاحظات التانيه اللي شايفها بايخه برضه بس شغال يعني :)
المساحات مش بتترفع
درج التابلو مفيهوش نور
الابواب مفيهاش عاكس ضوئي
تنبيه ربط الحزام للي راكب جنب السواق
مفيش تنبيه عند السرعات العاليه
بصفه عامه باستثناء الملاحظات دي العربيه جميله جدا و احساس بالثبات و الفخامه ممتاز .. ناس كتير قالت شعر فيها بس انا قلت ااقول الحاجات اللي محدش اتكلم عليها
لو ظهرت حاجه تانيه هقول عليها

الف شكر gs9miller على تقريرك المتميز انا كمان استلمت العربية من شهر ونص تقريباً و كل اللى حضرتك ذكرته كان عندى الى جانب انى بسمع صوت تكتكة جاى من ناحية الشنطة فى المطبات الصغيرة و زقزقة فى الزجاج الامامى اليمين لما يكون مفتوح منه جزء وانا ماشى وكذلك الكبوت مش مريح مكانه حتة عاليه و حتة واطية ورحت ابو رواش فى صيانة الالفين من اسبوع تقريباَ قلت لهم على اللى فيها واستلمتها الساعة واحدة و نص تقريباَ و دفعت 450 جنية وانا مروح لاحظت ان صوت التكتكة و الزقزقة زى ما هو الكبوت معوج زى ماهو لكن ماسمعتش الصوت المعدنى العالى دة تانى لكن لاحظت حاجة نكدت عليا ان العربية بقت مخنوقة وسحبها قل عن قبل الصيانة وبتاخد وقت طويل عشان توصل لسرعة 100 او 120 اكنى راكب بطة عجوزة و مكنش عندى وقت ارجع لهم ابورواش تانى فانا ماشى كده مؤقتاَ لحد ماحجز فى فى فرع القطامية لانى غالبا مش هاروح ابو رواش تانى.

الف شكر يا استاذ مدحت حضرتك رائد ملاك الv5 و سبب رئيسي اني خدت قرار الشراء
انا كنت ااقصد ان في صوت تنبيه حزام للراكب بجوار السائق و ده مزعج و انا عملت زيك جبت توكه حزام بس من عند بتوع الاكسسوار و ركبتها
اجمالا العربيه جميله و ان مكنتش حاسس بفرق بعد صيانه الالفين هيا هيا
هما غيرو زيت و فلتر بس .. لكن انا اصلا مكنتش بشتكي من حاجه بالنسبه للسحب كل اللي كان مضايقني العفشه و اصوات في الشنطه لو الاسفلت مش ناعم و التيل كان بيصفر
و الحمد لله معظم الحاجات دي اختفت بس الشنطه لسه بتزقزق كده بس مش مضايقاني عادي
باقي ملاحظاتي علي العربيه ممكن تقول عليها حسوكه شويه بس يعني وجهه نظري ان عربيه بالشكل ده و مش رخيصه و بتنافس .. ميبقاش فيها الحاجات العبيطه دي !!
مثلا كل الزراير منوره و جميله و مشاء الله الا زرار ضبط المرايات !! نسيوه!!
تانك البنزين اعتقد كان لازم يبقي صاج يعني كل ملاحظاتي علي العربيه ممكن تقول عليها حسوكه بس التانك فيبر لا بايخه بجد في طرق مصر الجميله مع ان معلومه زي دي مكنتش هتأثر عليا و انا بشتري العربيه لان المميزات اكبر بكتير و كل عربيه هتلاقي فيها حاجه بايخه :)

عموما تاني بقول العربيه حلوه و مريحه و فخمه و سحبها حلو و ربنا يبارك لنا فيها

المشاركة الأصلية كتبت بواسطة مدحت البلبيسى

الف مبروك وربنا يباركلك ويبارك للكل فيها خلينا نوضح بعض الحاجات الى لاحظت انها عامة مع الاغلبية عشان يطمنوااولا العربية الاول البواب والشنطة بتقفل برزع شوية خصوصا الشنطة ودى بتروح الصيانة بيريحوا المفصلة وبتبقى زى الفل مافيهاش مشكلة خالص وبتبقى ناعمة جدا وكون العربية مابتقفلش الا لما الشنطة تقفل دى على فكرة عملية امان زى لو نسيت باب مفتوح او الكونتاكت مفتوح العربية ما بترضاش تقفل ويوضحلك السبب على شاشة الكمبيوتر لانها بتفضل منورة ثانيا حكاية العفشة سايبة ما اظنش مع الكل ودى عادى بتحصل مع زمايلى فى عربيات كتير من الشحن والنقل وفى ماركات كتير وبتتربط والامور بتبقى تمام الاهم عشان ماتقلقوش فى الاول بتبقى العربية ناشفة شوية وممكن تدب فى بعض الحفر على سرعة لكن بعد الالفين وانت طالع وخاصة بعد الخمس الاف العربية بتنعم جدا جدا جدا وبتختلف تماما فما تتخضوش فى الاول نفس خضتى ودى لاحظتها مع الكل وبعد كدة عفشتها بتبق ما شاء اللة وكمان ممكن يبقى فى صوت تكتكة بسيط عشان العربية زيرز لكن مع المشى بتطبع وبتبقى تمام الحاجة تانية السحب بعد صيانة الالفين بيختلف وبيزيد تماما وبيبقى بسم اللة ماشاء اللة بس لازم تفتح الكانة وتقرص عليها عن تجربة بتفرق بعدة طول العمر فى العربية ومن كلام المهندس ليا وانا بصراحة فتحتلها من اول الف كيلو والعربية سحبها بسم اللة ماشاء اللة حاجة كمان نصيحة لازم كل اسبوع او عشر ايام فى بلدنا الجميلة تنفضوا فلتر الهواء والسربنتينة بالهواء بتفرق جدا فى السحب خاصة فى جو بلدنا المترب كمان نصيحة هواء الكاوتش لو مش مظبوط فى العربية دى بياثر بيتظبط على 32 هواء والافضل على عداد ديجيتال بلاش مقاسات الهواء العادية عن تجربة بتزود وبتنقص بالخمسة والعشرة انا بطلتها خالص لان لو الهواء زاد اوقل بياثر فى مشى العربية والثيات العربية ثباتها محترم جا واللة امبارح ملف وعلى سرعة ورملة على جانب الطريق العربية لمت معايا لو عربية تانية كنت انقلبت والحمد للة ربنا ستر وفراملها بسم اللة ماشاء اللة وعلى فكرة كل تمشى بالعربية اكتر هاتظبط معاك فى كل حاجة كمان ممكن يكون فى الاول تحس بسخونية بسيطة من جوة او فى الماكنة وبعد الالفين كيلو وانت طالع بتختفى تماما وبتبقى تمام كمان حضرتك بتقول مافيش تنبية حزام امام للراكب الامامى موجود وماحدش قارقنى غير صوتة لدرجة انى ربطة على الكرسى باستمرار ودة بصراحة امان فى عند لمبتين وجرسين للراكب الامامى والسائق مفيش تنبية للسرعات العالية ودة بصراحة انا شايفة ميزة عشان الازعاج ومش هوة دة الى هايمنع حد من الجرى الى عايز يجرى بيجرى حكاية المساحات مش بترفع دة امان من الكسر والسرقة بصراحة وللقزاز ولو حضرتك حبيت ترفعها بتوقفها فى النص وترفعها عادى جدا جداوبسهولة وانا شايها ميزة عن تجربة شخصية درج الطابلوة مافيهوش نور دة انا معاك فية بس الاضاءة فى العربية كافية جدا وبتنورة وبيبقى واضح العواكس فى الابواب انا معاك مش موجودة عمرى ما خدت بالى منها يمكن مش ماثرة فى حاجة احنا بنحسوكها شوية ههههه على عربية بالسعر دة وبامكانيتها التانية الى تضاهى اكتر من سعرها وعامة محلولة ممكن حضرتك بتجيب الفوسفور وبتقطعة عن بتاع الكماليات وبيلصقة زى العاكس تماما بس حد يكون كويس وبيفهم بتبقى كويسة جدا عن تجربة لو تفرق معاكالعربية فيها كماليات واوبشن كتير وبجد حلال فيها الفلوس وبجد مش هاتندمموا ربنا يباركلنا فيها والى عندة سؤال انا تحت امر الكل فى اى حاجة واى سؤال هاتقولوا انا بدافع عن العربية ومتحمسلها بصراحة بحترمها جدا وما كسفتينيش وما ندمتش على اختيارى مقارنة بالعربيات التانية الى معايا فى البيت وعربيات اصدقائى واكيد مش احسن عربية فى الدنيا ههههههه ولكن على سعرها بجد تستاهل اكتر والسلام ختام

حمدى بك...شكرا على مجهودك وافاداتك اللى حببيتنا فى العربيه دى فعلا
حصل تنويه على ان الهاي لاين من العربيه دى فيه ايرباج فى الكراسى الاماميه
انا ملقتش اى حاجه تأكد المعلومه دى على موقع بريليانس مصر بالمرة
لو تكرمت تأكد المعلومه دى او تنفيها. علشان ده يفرق كتير فى خطة الكسوه الجلد اللى كنت هاركبها لما اشتريها ان شاء الله

الفرش الجلد لن يعوق الوساده الهوائيه اللي في الكرسي ...علي حسب كلام كل بتوع الفرش ...الوساده الهوائيه بتقطع الخياطه و تفتح برضه