الموضوع: تقرير مصور : كتم صوت ابواب سوزوكي التو عند الغلق

بسم الله الرحمن الرحيم
السلام عليكم و رحمة الله و بركاته

من ساعة موضوع تحسين العزل اللي فكرت فيه
http://www.nilemotors.net/Nile/313617-a.html

كنت بفكر اني اكتم صوت الأبواب عندي في الالتو عند القفل لأن الصوت بيكون مسموع بطريقة مستفزة

اشمعني يعني المرسيدس و البي ام هو احنا قلة و لا ايه

و الحمد لله قررت اني انفذ الموضوع ده و أحب اقول ان النتيجة ما شاء الله كانت مبهرة
نيجي بقي ازاي نعملها


اولا : الأدوات

- مقص
- شريط لاصق من عند اي محل ادوات كهربائية و انا جبت اللون الازرق لأنه نفس لون العربية ( ممكن يظهر في الصور ان اللون مختلف لكن في الحقيقة الفرق مش واضح بالعين المجردة )






ثانيا : التنفيذ و الخطوات



- هننضف الصوابع بفوطة و ميكونش عليها اي تراب عشان اللصق
و ده الشكل قبل شريط اللصق






- نقص حتة شريط لصق يكفي 3 لفات ع الصباع اللي جوة اللي هنلفه دلوقتي في الصورة مع مراعاة تقليل العرض بما يناسب عرض الصباع







- بعد ما لفينا الصباع اللي لجوة
نقص حتة شريط لاصق تاني لكن بما يكفي لفتين فقط عشان الصباع الخارجي و اللي هنلفه في الصورة التالية






- الناس هتقولي طب ليه اللي جوة 3 لفات و اللي برة لفتين لأن اللي برة هو اللي السان بيقفل عليه لو خليته 3 لفات ممكن تحس بتعليق في فتح الباب لكن 2 يعتبر ع الشعرة عندي مع 3 جوة

- و ديه النتيجة في الأخر






- و ده الباب الخلفي و تم التطبيق ع جميع الأبواب





-و زي مقولت فوق ( ممكن يظهر في الصور ان اللون مختلف لكن في الحقيقة الفرق مش واضح بالعين المجردة )

- محدش يبص للفينيش اللي انا عامله لأن الموضوع كان تجربة فمهتمتش بالشكل اوي لحد ما اجرب لكن شيلت كل ده و لزقت ع نضيف من اول و جديد و للأسف معرفش اصور لأن بطارية الكاميرا فضيت



اما النتيجة فما شاء الله الصوت اتكتم عن الأول بكتير و كأني بقفل باب عربية من العربيات اياهم هههههه
و كنت بفكر في فكرة تانية لكتم الصوت بنسبة 99% لكن الموضوع مازلت تحت الدراسة لأن فيه مجازفة شوية D:


اتمني الموضوع يحوذ اعجابكم