ربنا معاك ان شاء الله و اكيد موضوعك دة هيريح ملاك كتير ان شاء الله فى المستقبل
ربنا معاك ان شاء الله و اكيد موضوعك دة هيريح ملاك كتير ان شاء الله فى المستقبل
مفيش أخبار يا أ/أنس من أتوأيجيبت عن قطع الغيار المطلوبة لحضرتك يا ريت تطمنا
اعملو موضوع منفصل بالحكاية دى عشان الناس تشوفه و تاخدةوا اجابات
انا شايف ان السؤال ده مكانه مش هنا
نحن هنا لحل مشكلة اخونا و مساعدته فى وقت الضيق
كمان حضرتك الافضل تعمل موضوع منفصل و تطرح فيه السؤال ده
بكده حتاخد اجابات ان شاء الله من الاعضاء لان الموضوع المنفصل الناس كلها حتشوف سؤالك فى عنوان الموضوع
اما هنا السؤال مجرد سطر داخل مشاركة داخل احد صفحات احد المواضيع فى قسم نيسان
يعنى عدد اللى حيشوف السؤال محدودين جدا
ارجو من الاعضاء الالتزام بالموضوع الاصلى
و هو حل مشكلة اخونا انس بسبب الحادث الذى اصابه
اى كلام فى مواضيع اخرى يعتبر خروض عن صلب الموضوع و بهزا تضيع فائدة الموضوع نفسه
لان فى اعضاء بتدخل ماتشوفش الموضوع الاصلى و ما يبقاش عارف القصة من اولها و يقول "مش حقعد اقراء 20 صفحة" بينما هو لو قرا اول صفحة حيعرف على الاقل اساس الموضوع
الاعضاء بتدخل و تشوف المشاركات حتى لو كان الكلام فيها عن حجات تانية و ممكن تفتكر ان هوا ده الموضوع و ترد عليها و تسيب الموضوع الاصلى و ده حياخد الموضوع فى نقاشات جانبية او نقاشات عن الصيانات
بينما العضو المنكوب انس مستنى حد يدخل يساعده
و بكده يبقى احنا بنؤذيه بدل ما نساعده لاننا كده بناخد الموضوع فى سكك تانية و هوا عامل الموضوع عشان نحل معاه المشكلة
نرجع بقى لصلب الموضوع
طمنا عليك يا انس عملت ايه؟؟
السادة الأفاضل أعضاء المنتدى
السلام عليكم ورحمة الله وبركاتة
عذرا لأنى تأخرت عليكم اليوم فى الكتابة لأأنى طول اليوم برة و لسة داخل من ساعتين اليبت
امبارح و بعد تعليق الأخ الفاضل hfshabaan
عن توافر قنطرة ريداتير فى أوتو ايجيبت رغم أنى سألت عليها أكتر من مرة هناك ورغم أن نيسان ايجيبت ردت على السبع وقالتلهم أن قطع الغيار مش موجوده ومش هتتوفر الا بعد شهور
المهم كلمت أوتو ايجيبت وفوجئت ان عندهم حاجة من الحاجات الى أنا عايزها فعلا و هى قنطرة الريداتير بس مفيش مواسير التكييف ومفيش الركبه الى بتركب فى القنطرة وفى اكصدام.
طبعا ماصدقتش نفسى و كنت هروح أجيبهم فى ساعتها لولا ان الساعة كانت عدت 5
روحت النهاردة الصبح من 8 ونص كنت قدام أوتو ايجيبت زى الى رايح يلحق أخر رغيف عيش فى مصر :)
و الحمد لله لقيتها فعلا موجوده و جبتها و أنا الدمعة كانت هتفر من عينى وجبت كمان الاكصدام
ولما كلمت المهندس وائل فى السبع ماكانش مصدق وقالى الحق روح جبها فورا
حتى لما جبتها وكلمته عشان يبدأ شغل فى العربية قالى لما تيجى نبقى نبدأ لأنه تقريبا ماكانش مصدق لأن المصنع رد عليه أن القنطرة دى مش موجوده ولا هتبقى موجوده قريب!!!!!!
لدرجة انه لما شافها طلب منى الفاتورة عشان يتصل يتخانق مع المصنع (على فكرة الراجل ده محترم جدا و متفاهم ويعرف يعنى ايه خدمة عملاء بزوق و احترام لدرجة انه قلب الدنيا على قطع الغيار دى وكنت بكلمة كل يوم ومزهقش منى أبدا كمان نزلى فى المصنعيه جامد عشان غلطة من عندهم وقالى ان أنا ماليش زنب دى غلطتهم هما عشان كده هما يتحملو فرق الفلوس)
نرجع للموضوع.. و أنا راجع من أبو رواش عديت بالمرة على مودرن أ/ سعيد البحيرى على ما أتزكر وللأسف برضه مالقيتش باقى قطع الغيار
المهم روحت جرى للسبع وسلمتهم القنطرة وماكانوش مصدقين و قالولى طب حضرتك هنبق نكلمك على بكرة ولا بعده على ما نخلص !!!!!!!
طبعا جالى حالة زهول على غضب وقولتلهم انى مش هتحرك من السبع من غير العربية حتى لو هبات عندكو هنا!!
أنا بقالى 14 يوم مستنى العربية يا بشر حرام عليكو
المهم فعلا استجابو وابتدو شغل وحاولو يستعدلو الركبه لأنى مالقيتهاش زى ماقولت لحضراتكم بزرجينة وشوية رزع ودق لحد ما ربنا كرم والقنطرة ركبت وركبو عليها الريداتير الجديد بس قالولى أنها لازم تتغير بعد كده :( وبعدين ركبو السربنتينة بتاعة التكييف من غير ما يشغلوها طبعا عشان المواسير مش موجوده زى ما قولت لحضراتكم
وكمان غيرولى فلتر الزيت لأن لاقيتة مخبوط وفيه كام عوجه كده فقلنا نغيره بدل ما يعمل مصيبه لاقدر الله
المهم ان العربية دارت أخيرا :)
و عرفت أمشى بيها :)
و أخرج من التوكيل حتى وهى مكسرة من قدام بس مش مشكلة :)
أخيرا رجعتلى عربيتى:)
بعد 14 يوم انتظار ويأس وغضب
بس و أنا دلوقتى مستنى باقى قطع الغيار تتوفر بعد تجاهل نيسان ليا تجاهل تاااام حتى مردوش عليا فى الشكوى الى عملتها عندهم !!!!!
المهم أنا دلوقتى محتاج مواسير التكييف بتاعة السربنتينة و كاوتش قاعدة ريداتير وقربة مياة مساحات (للأسف لقيتها اتكسرت هيا كمان وبرضه مش موجوده) والركبة اليمين
بالاضافة الى الصاجة الى بتركب لى الفرامل عشان صوت التصفر بتاع الفرامل ودى المهندس وائل قال ممكن تبقى متوافرة بعد أسبوع أو 10 أيام للناس كلها عشان الى كان بيسأل عليها
أنا بشكر يا جماعة كل الأعضاء الى بيكلمونى وبيتصلو بيا سواء على التليفون أو على الرسائل الخاصة والى من كترهم مش قادر أتذكرهم كلهم وياريت يعذرونى و فعلا يا جماعة أنا والله ما كنت متخيل أبدا حجم التعاون ده من الأخوة الأعضاء والاخلاص فى الرغبه فى المساعده الى شفتها منهم وربنا يارب يقدرنى أنى أرد شىء من جمايلهم عليا علما بأنى كنت عامل الموضوع عشان نيسان يستجيبو بس الى حصل أن الساده الأعضاء هما الى ساعدونى ونيسان معبرتنيش خالص :)
الف مبروك يا استاذ انس و الله فرحت جدا لحضرتك
و اعتقد دلوقنى انه على الاقل 3/4 من المشاكل اتحلت بس ما انكرشى برضه ان الموضوع بتاعك بين عوار جامد عند نيسان و لازم حد منهم يرد و يفسر لنا اللى حصل و ما يعديش الموضوع زى ما كل حاجة بتعدى من غير محاسبة و غالبا ده اللى ح يحصل
انا مش عارف اقولك ايه و لا ايه بس ح اقولك حاجة واحدة بس ان لو فيه خير فى الموضوع ده بس هو اللى خلانا نعرف شخصية محترمة زى حضرتك و بينت المجهودات الرائعة لباقى الصقور
تحياتى
الله يخليك يا باشا وشكرا لزوقك و أنا الى اتشرفت بمعرفتكو والله وان شاء الله لازم نتقابل فى يوم ما و أتعرف بحضراتكم
بس هو الموضو ما انتهاش ولا حتى الحاجة الى ركبت ركبت مظبوطة زى ما قولت لحضرتك عشان الركبة الى ركب عليها كل حاجة قالولى لازم تتغير
بس أنا من زهقى طلبت أن العربية تخرج بأى شكل عشان أحس أنى عندى عربية وأقدر أقضى مصالحى الى متعطلة من أسبوعين
بالاضافة لباقى قطع الغيار الى برضه مش متوفرة لحد دلوقتى وبعدين ان أنا الى أجرى أجيب قطع الغيار و أوديها ده شىء مش قادر أقبله ولا أبلعه أبدا وعمرى ماكنت هعمل كده أبدا لولا الحوجه الا أنا فيها...
الحاجة اللى انت تتعلمها من الموضوع ده ان فيه سوء اتصال بين المصنع و الموزعين بتوع نيسان يعنى لازم ما تكتفيش بأنك تعتمد على حد يقولك ح يجبلك الحاجة و لازم انت تتصل بنفس و تروح و تشوف و تسأل فى كل حتة و مكان
و ده طبعا مش الصح بس انت عارف ان عندنا الحاجة الغلط بتفرض نفسها لحد ما تبقى هى الصح
و ان شاء كل حاجة تخلص على خير يا رب العالمين
تحياتى
الف مبرووووووووووووووووووووك
قدر الله و ما شاء فعل
و ربنا يجازي كل شخص مقصر في عمله سواء في التوكيلات او في المصنع او في الشركة الام
و ان شاء الله العربية ترجع احسن من الاول يا استاذ انس
و ربنا يعوضك خيرا بأذن الله
لولولولولولوىىىىى
قلت لك اوتو ايجبت من الاول يا جدع
طيب كده كويس اوى العربية دارت
عقبال باقى القطع
ما ضاقت الا اما فورجت يا شيخ
دانا كنت متنكد اوى
بس بردك لازم نشوف الحجات اللى ناقصة دى
خليك وراهم زى الشنيور فى دماغهم
اعمل لهم صداااع
و بردك خليك ورا الجماعة بتوع اوتو ايجبت
و لما القطع توصل سواء السبع او اوتو ايجبت تروح تشترى جرى
و على فكرة واضح ان الجماعة بتوع السبع استجدعوا معاك اول ما جبت لهم القنطرة
هتفرج ان شاء الله هتفرج
ياااااااه الف الف مبروك..... ولو كنت بعرف ازعرط كنت زغرطلك.
وربنا يقويك وتعرف تجيب باقي الحاجه.
الف مبروك يا ريس ...... ربنا يكملهالك على خير و يحفظهالك....... فى شوية نقط عاوز أقولهم:-
- أى ماركة مهما كانت جامدة و مشهورة أداءها بيتغير( خصوصا فى الخدمات) فى الأسواق التعبانة اللى مفيهاش فوانين قوية وحماية مستهلك فعالة يعنى مش بيكون 100% يمكن ينزل لحد 75% .
- فى حالة الضغط فى انتاج العربيات مع ازدياد الحجز طبيعى ان المصنع يركز فى الانتاج و ينسى الصيانة خصوصا لو ما فيش جهة تحافظ على حق العملاء و تلزم العميل بكده.
- أى منتج جديد فى بداية طرحه بيكون مش متوفرله اكسسوارات و قطع غيار لفترة معينة _ بس طبعا ممكن نقبل ده فى الموبيلات بسهولة مش فى العربيات.
- نقيم بقى نيسان من دلوقتى فى استجابتها للموقف ده و ايجاد حلول لتفاديه مع أى حد تانى من الأخوة.
- أهم نقطة بقى وجود المنتدى بتاعنا الحبيب و رجالته الجامدين و فيضان المساعدة و المساندة التطوعية منهم اللى بتهون عللينا مشاكلنا مع المصنع أو الموزعين..... علشان كده لازم نحافظ على نقطة القوة دى عن طريق الاصرار على العلاقة الحلوة المحترمة بين جميع الأعضاء و نفضل كلنا فاكرن و مركزين ان الرجالة دى بيعملوا المجهود ده متطوعيييييين .... يعنى لله ..... يعنى كلنا لازم نتقى الله فى مشاركاتنا و أسلوبنا مع بعض علشان فى الآخر احنا كلنا المستفدين من العلاقة المحترمة بينا علشان احنا جهة و احدة و نيسان و الموزعين جهة تانية.
- فى الأخر و رغم كل معاناة أخونا الأستاذ أنس و رغم ان مش ده المفروض يكون أداء ماركة كبيرة زى نيسان بس أنا كنت عارف أن حل الموضوع شوية مجهود و صبر لغاية ما نيسان تظبط موضوع الانتاج و تحن على الصيانة و تضخ شوية قطع غيار فى السوق و تحط فى تخطيطها ان فى كلاب كتيير فى الشو ارع و ان الحوادث _بعد الشر عننا جميعا - يمكن تقع فى أى وقت.
- بعد زيارة مصنع نيسان لازم نتحرك علشان يكون فى و سيلة اتصال دائمة و فعالة مع المصنع و قياداته و هما لازم يفهموا ان ده مصلحة و فايدة كبيرة جدا لهم لأنه بيديهم معلومات بيتدفع غيها فلوس محترمة لو محتاجنها.
فى النهاية شكرا للجميع و تحية كبيييييييرة لكل رجالة المنتدى الجامد ده و ربنا يجمعنا دايما على الخير.
ياااااااااااااه أخيرا ألف مبروك يا باشا
بس متنساش حقك واتصل اشتكى فى نيسان انهم قالوا ان قطع الغيار مش موجودة و مش هتتوفر قريب
وكمان اتصل بادارة اوتو ايجبت علشان خدمة العملاء اللى قالك ان ما عندهمش لانه اكرر الموضوع ده منهم و هما اكيد هيهتموا لانهم كده هيخسروا عملاء
وعن تجربة شخصية مع السبع المهندسين هناك محترمين و خدومين بصراحة و اتوايجيبت نفس الكلام
بس لازم نيسان تشوف مشكلة عدم توافر قطع الغيار
توكيل نيسان الواحد ياما جربه من اسواء التوكيلات في مصر والتوكيلات عموما ضايعه
الف الف مبروك......
يا باشا الله يبارك فيك و أنا مقتنع بكلام حضرتك بس فى نقتطين عايز أأكد عليهم:
أولا مفيش أى استجابة شوفتها من نيسان خلال الأزمة دى .. خالص.... ولا الهوا.. ولا حتى تليفون وقطعة الغيار الى لاقيتها كانت عن طريق عضو فاضل فى المنتدى هو الى بالصدفة سأل عليها و هو فى أوتو ايجيبت ولقاها وكانت بقالها يومين تلاته عندهم يعنى مش جاية مخصوص عشان الموضوع بتاعنا ولا حاجة يعنى استجابة زيرو وعلى فكرة فى واحد عنده نفس المشكلة فى السبع ولسة مش لاقى القنطرة
الاستجابة الوحيده الى لقيتها كانت من حضراتكم السادة أعضاء المنتدى المحترمين
ثانيا المشكلة لسه ما انتهتش ولا حاجة زى ما ذكرت قبل كده وحتى الحاجات الى ركبت ماركبتش صح لأن الركبة مش موجوده ولازم كل ده يتشال تانى وتتغير الركبة يعنى أنا ماشى قلقان وان كنت بحمد ربنا وأبوس ايدى وش ودهر أن العربية راكنة قدام بيتى والحمد لله
الف مبروك وان شاء الله تكمل باقي القطع قريب
ألف مبروك يا أستاذ أنس والحمد لله وربنا يكملها على خير أنشاء الله موضوع حضرتك ده كان مخلينى خايف أركب العربية وأسوقها عشان لا قدر الله يحصل حاجة الواحد يحتاس وقدر الله وما شاء فعل يا صديقى
طمني يا أستاذ انس
عملت إيه مع الناس اللي اديتك ارقامهم ؟؟
ألف مبرررررروك يا أ/انس وعقبال باقى قطع الغيار بس ماتسبش حقك خليك وراء التوكيل ويارب يكفيك شرها وخلى بالك بعد كده اول ماتشوف اى كلب فى الشارع اوقف مكانك لحد مايمشى !!
ان شا ء الله قريب كل حاجة حتتوفر باذن الله
كلنا مش ساكتين وبلغنا واتصلنا فى مراكز الخدمة كلها نسال
وكمان الموضوع بنلغنا بيه المسئولين فى نيسان نفسها .. واكيد حيتعاملوا معاه .. وحيوفروا قطع الغيار الباقية فى المركز اللى كان فيه العربية باذن الله
وانا متابع الموضوع لغاية ما يتحل كله وكمان يتوفر كل حاجة لعملاء نيسان عموما .. وهى بس فترة وحتعدى وكل حاجة حتكون تمام ومتوافرة
تحياتى للجميع
الف مبروك استاذ انس و ان شاء الله خير و كله يكمل في اقرب وقت ممكن
دائما سباق بالخير يا أ/ أحمد ومجهودك لا ينكره أحد رغم أفتراء بعض المغرضين وضعيفى النفوس وأللى مستنية أى مشكلة تحصل عشان تنهش فى منتدى نيسان وأعضاءه ومنسقيه ولكن دائما يفشلون وسيظل قسم نيسان أفضل قسم نشط فى منتدى نايل موتورز بفضل كل القائمين عليه وعلى رأسهم عمدتنا أحمد مصطفى ولك تحياتى :vctry:
عشان الناس اللي بتقول إننا بنهاجم القسم و بنظلم الناس
ده تلخيص للمشاركات اللي تمت بعد مشاركة أستاذ انس (رقم 208) اللي شرح فيها
اللي حصل معاه
كان فيه منها الايجابي اللي اعترف بوجود مشكلة و عاوز فعلا يساعد صاحب الموضوع
و عشان كده كانوا بيقولوا الحق من غير مجاملة
و فيه برده اللي داخل يهاجم أي حد بيقول كلمة مش عاجباه عن التوكيل
و يقولك مغرضين و حاقدين و بتاع ههههه
و يبرر اللي التوكيل عمله و إن كل حاجة بقت تمام
و ده اللي احنا بنتكلم فيه ,المحاباه للتوكيل و الدفاع عنه
والمبالغة في تقدير العربية (ده مش موضوعنا دلوقتي )
مش إن التوكيل غلط أو لأ
و الكلام أنا موضحه باللون الازرق
واللي هيدور هيلاقي من ده كتير بس عشان الاخ molla مايقولش إني بعمل مجهود فالبحث
وده كان رد صاحب الموضوع نفسه
في الاخر بقى احب اقولكم اللي هيحصل
طبعا بعد الضغط والفضيحة دي ,التوكيل هيضطر يوفر الحاجة لأستاذ أنس
و ساعتها هنطلع احنا طبعا مغرضين و حاقدين
و إن التوكيل عمل اللي عليه و حل المشكلة خلاص
على شوية كلام حلو والناس برده تشتري و تلبس بقى مع نفسها
زي ما حصل مع أكتر من عضو
وده أنا سبق و وضحته باللينكات
يا ريت الناس تبقى حيادية شوية و زي ما تذكر المميزات تذكر العيوب كمان
و بلاش تحسسونا إن توكيل و عربيات nissan نازلة من السما
يا ريت تتقبلوا كلامي ده بصدر رحب و بلاش بقى جو (مغرضين و حاقدين و الكلام ده )
يا ريت الموضوع ميتحولش لتراشق بالاتهامات بين الناس وبعضها
محدش حاقد علي حد ومحدش باصص لحد في رزقه
ربنا مقسم الارزاق
ولو فيه حد بيحقد علي حد بسبب عربيته كان زمان قسم بي ام ومرسيدس ولعوا في المنتدي بسبب الحسد (:
ربنا يبارك للناس في عربياتها ويكفيهم شرها
هدف المنتدي هو عدم الانحياز والموضوعيه والحياديه
تبادل خبرات
المساعده
تقييم العربيات
تقييم التوكيلات
التوعيه
مش الصراعات
وسبب نجاح المنتدي هو حياديته علي طول الخط وترابط اعضاءه وسعيهم لحل المشاكل اللي بتواجههم
دمتم بود
محمد الشنوري
اسئلتى هنا للاستفهام و ليس للاستنكار عشان بس نحب فهم وجهة نظرك
حضرتك عايز توصل لأيه بالظبط؟؟؟
الاخ حاتم saint لم يشكر التوكيل
و لم يقل احد ان الدنيا اصبحت تمام ( و ان كنا نريد ان يتحقق ده مستقبلا عشان مصلحة الاعضاء و ملاك سيارات نيسان)
الاخ حاتم شكر احمد مصطفى على مجهوده و المنتدى و تعاون الاعضاء
و بعدين حضرتك بتقول بلاش معارضين و بلاش مغرضين و حاقدين؟؟؟؟
حد قال عليك حاجة وحشة؟؟؟ عشان تقول " هنطلع احنا طبعا مغرضين و حاقدين "
هوا فى حد ذكر عنك شىء بسوء؟؟
ما حدش قال عليك كده و لو شايف ان الكلام ده يمسك فى شىء فده رايك انت و حضرتك حر فيه و هذه مشكلتك لكن ما حدش قال عليك حاجة
و بعدين بلاش بلاش بلاش؟؟؟ بلاش ليه؟!!!
زى ما حضرتك حر فى ابداء رايك حتى و ان اختلف مع اراء البعض
فالناس ايضا احرار فى ابداء ارائهم لاننا هنا فى ساحة لابداء الراى
و ليست ساحة لتكميم الافواه او قمع الناس فكريا
و ياريت تتقبل كلامى بصدر رحب
نعود لاساس الموضوع
وصلت لايه يا اخ انس طمنى عليك.... هل من جديد؟؟
بصراحة أنا مش فاهم أنا بحابى التوكيل فى أيه أنا بشكر أحمد مصطفى منسق القسم فى مجهوده فى توصيل مشكلة الأستاذ أنس لشركة نيسان علشان أنا عارف علاقاته القوية بمسئولى شركة نيسان فين المحاباه والتوكيل انا مجيبتش سيرته ولا هو هجوم وخلاص وبعدين أنا لما شاركت فى الموضوع اول مشاركة قلت انا بعلن تضامنى مع صاحب المشكلة ومش هركب عربيتى حتى حل هذه المشكلة عشان ببساطة ممكن الواحد يكون مكان صاحب الموضوع فى ثانية و لما قلت المغرضين وضعيفى النفوس أللى دخلت تشمت فى العربية وتسخن الموضوع بعيدا عن تقديم مساعده او نصيحة لصاحب الموضوع وبعدين لو التوكيل سىء وأنا قلت كويس او ممتاز أنا كمالك للسيارة أول واحد سوف يصيبه الضرر من هذه المحاباه ولا أيه فياريت الناس تتقى الله فى كلامها ونقدها وتقبل تحياتى وارجوا تكون فهمتنى
الحمد لله كدا ضمنا ان ال 10 صفاحات الجايين خناق ومشادات بين اللى شايفيين ملاك نيسان متحيزيين واللى شايفين ان اللى مش من نيسان حاقدين,,, وهايبتدى تراشق الكلمات والاتهامات, وفى ناس (اكيد طبعا عارفين مين) هايتم اتهامهم انهم بيحابو الوكيل وبينصروه علطول و ممكن توصل لاتهامهم انهم بيقبضو منه (اتهام باطل طبعا)...
انا حاسس انى شوفت الحكايه دى قبل كده زى ال Déjà vu ... اه افتكرت http://www.nilemotors.net/Nile/318121-a-14.html
دلوقتى انا هاعمل unsubscribe للموضوع عشان اوفر على نفسى كتر الرسايل على الميل (اللى فى الغالب مش هايبقى ليها لازمه), وهاتبقى ضيعت الردود الفعاله وردود المساعده لصاحب الموضوع.
قلبى عندك يا استاذ انس واتمنى ان عربيتك ترجع زى الاول واحسن وربنا يقويك ويعينك على اللى انت فيه...