يوم الأثنين اللى فات كان عندي مشوار للعين السخنة بالعربية قلت كويس أشوف الاستهلاك هايعمل إيه على الطريق

ميزة طريق العين السخنة إنه مش طويل ومش هاتلحق تحس بملل فرجلك تدوس على البنزين من غير ما تحس .. وكمان نظيف وواسع وممكن تمشي عليه من غير دوسة فرامل واحدة لغاية ماتوصل البوابات

المهم ... فولت العربية من إمارات مصر اللى في التجمع لغاية الزور ... عقبال ما روحت وجيت ... كانت العربية عاملة 302 كيلومتر

طول الطريق ماشي بمثبت السرعة على سرعة 120 بالضبط ما حطتش رجلي على الفرامل ولا البنزين نهائي إلا في العين السخنة نفسها وشوية المشي اللى هناك وبعد كدة على الدائري هنا في القاهرة بعد ما رجعت لإنه كان زحمة شوية

دخلت فولت تاني من إمارات مصر في التجمع برضه لغاية الزور ... وخدت 22 لتر بالضبط

يعني 274.5 كيلومتر / الصفيحة ... طبعا بالنسبة لي كدة ده استهلاك ممتاز ما شاء الله

لأن في المعتاد زي ما قلت هى بتعمل معايا على طول 213 - 220 كيلومتر / الصفيحة

والحمد لله رب العالمين