الموضوع: ما هو أفضل حل لتلافي تزنيق السيارات

هو انا الموضوع ده بيحصل معايا كتير برده ومش ببقي فاهمة ايه الغرض منه في الحقيقة
بس حصل معايا في مرة بقي بس بطريقة متهورة وغبية وحيوانة وكنت فعلا هاروح فيها انا واختي لولا ستر ربنا ودعا الوالدين.
كنت في شارع زحمة وبعدين الحمد لله الدنيا فضيت شوية والعربيات اتحركت وطالعين كوبري عادي جدا لاقيت سواق ميكروباص جنبي مصمم يطلع قبلي قلت مش مهم عديه مفيش مشكلة ده سواق ميكروباص (مرفوع عنه التكليف :biggrinjester:) وهديت شوية اللي ورايا معجبوش الامر واداني كلكس سخيف فضلت مهدية برده بس مش ببرود يعني عشان يبطل كلكس ، المهم اتحركنا وطلعنا الكوبري وعادي وفجأة لاقيت حد عدي بسرعة من جنبي الشمال وفي منزل الكوبري فضل يزنق عليا اروح يمين ييجي يمين اروح شمال ييجي شمال (تقريبا هو كان عايز يلبسني في سور الكوبري ويموتني) وكل ماهدي يهدي وكل ماشد يشد لحد ماقلبي وقع في رجليا من المتهور ده ومبقتش فاهمة هو بيعمل كده ليه ده قلت ده مجنون المهم فضلت مهدية لحد ماخلص اللي بيهببه ومشي شديت ورحت محصلاه وبزعقله بقي واقوله ايه اللي بتعمله ده :cuss: لاقيته كمان بيشوح بإيده ويزعقلي وعمال يهلفط بكلام مش مفهوم ويشتم فيا وفي اللي علمني السواقة (اتاري ده بقي صاحبنا اللي اداني كلكس جامد علي مطلع الكوبري وانا بطأت قدامه "افتكرني بعاند فيه يعني ولا بغلس عليه") يعني مهما كان يعني حتى لو غلست عليه (مع ان ده مكنش مقصود بجد) يوصل بيه الغل لدرجة انه يعمل حركة زي دي كانت ممكن تئدي لوفاتي ووفاة اللي معايا لإن منزل الكوبري خطر وكنت فعلا هالبس في سور الكوبري بجد والغريب انه راجل سنه لايقل عن 45 سنة يعني مش شاب هانقول عليه طايش ومتهور المفروض انه راجل ناضج يعني ولما لاقيته كده سبته يمشي وخلاص اختي قالتلي ده باين عليه مجنون فعلا لإنه بعد ماعدانا كان هايخبط ولد معدي علي رجليه برده بنفس الطريق ويروح يمين وشمال زي ماعمل معانا قعدت طبعا اتحسبن فيه وادعي عليه هاعمل ايه بس
مش عارفة الناس بقت عاملة كده ليه بجد وايه كمية الغل والوحشية اللي بقت في الناس دي
بجد انا اتخنقت من حوار السواقة ولو الدنيا فضلت كده انا هاعتزل السواقة قريب

المشاركة الأصلية كتبت بواسطة AM011

هو سؤال غريب شوية لكن بيحصل كتير معايا مش عارف ايه السبب وهل بيحصل مع كل الناس ولا لأ ؟ مع إني بامشي في الحارة بتاعتي وملتزم بقواعد المرور وباوسع لأي حد عايز يعدي :

لو انت ماشي ولقيت واحد طلع قدامك وبعدين كسر عليك جامد قبل ما يطلع قدامك (بيزنق عليك قاصد ) وهو عنده طريق فاضي يعدي فيه لغاية لما يطلع قدامك ، ايه افضل تصرف تعمله؟
هل تهدي ؟ وفي الحالة دي هيفضل يزنق لغاية قبل ما تقف بشوية
ولا تكسر يمينك ؟ وفي الحالة دي مش هتخلص هيفضل يزنق
ولا تقف مرة واحدة وتطلع منه بسرعة ؟
ولا تمشي جنبه وتبص له بتناحة ؟
ولا تنزل تضربه بالنار وترتاح انت وهو ؟؟؟

ولا ايه؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟

اركب عربية جيب و ركب فيها دفندر

ههههههههههههههههههه

الحل انك تمشي خارج الحارة المرورية بسنة بسيطة و على طرفها قوي

علشان لو حد زنق عليك , تقدر تطلع منه و متتزنقش في الرصيف

طبعا الحل ده يعتبر غير حضاري لأنه يجب الالتزام بالحارة المرورية

بس ده الحال في مصر

الحل من وجهة نظرى و دا اللى على طول بعمله
انى ابقى لازق فى اللى قدامى دايما
بس طبعا عايزة تركيز جامد و تبقى شابف قدام اللى قدامك عشان تبقى مستعد لو حاجة حصلت
و ممنوع منعا باتا انك تلزق فى ميكروباص او نقل او اتوبيس او اى حاجة عالية
لأنك مش هتشوف اللى قدامه و فى الحالة دى لو وقف سيادتك هتلبس فيه لا محالة
.
.
و فى طريقة كمان بس دى عايزة حرفنة جامدة
اول ما تلاقى واحد غلس و عمال يزنق عليك
دوس بنزين شوية و
المس المرايا بتاعته بمرايتك اليمين
بس خد بالك من حاجتين انك تلبس فى اللى قدامك و انت بدوس بنزين
او تكسر مرايتك اليمين
.
.
او لو منفعش اى حل معاه خالص
حاول بعد كده تطلع منه و تحطة وراك و تقرفه شوية
.
.
على فكرة لسه دلوقتى كنت مستعجل وزنقت على راجل كبير معاه 132
و عديت و نسيت لقيته جاى ورايا و مستحلفلى و طلع يجرى ورايا فى شارع الهرم
بس مشفنييييش

الحل :
بيع الدايو ... هات عربيه اكصداماتها نيكل او الومونيوم و تكون بتستحمل .. و تكون موديل قديم .. و فيها موتور عفي ..
و اللي يونق عليك ادعكله الجنب بتاعه ببرود شديد .. و ان اتكلم معاك : قوله انا ملتزم و انت اللي بتزنق عليا ... ولو حب يبق معاك ... ارفع التليفون و اتصل بالنجده و اقلبها مصيبه و طلعه هوه اللي غلطان و مابيهمش ..