الموضوع: تعبت با جماعه وجبت اخرى

السلام عليكم
رجاله الاوبل المحترمين - يارب الكل بخير
بصراحه انا تعبت وزهقت ومليت وفلست وجبت اخرى على ايد العربيه
بجد مش ممكن اللى بتعمله العربية الاوبل فى صاحبها بتطلع عينه
كل اسبوع اقول ابيعها واروح للميكانيكى يقلىمش حاتعرف تركب بعدها والعربيه نضيفه وحالتها حلوه و و و
لما هى فيها كل المميزات دى امال عمال ادفع فى فلوس على الفاضى ليه .
انا بقى عندى اكتر من مشكله :
1-الحراره : صرفت عليها فلوس غير طبيعيه غيرت (ساعه للريداتير- وفكيت الريداتير ووديته اتسلك واتنضف مرتين – طرمبه مايه- شيلت الترموستات اللى فى وش الماتور- راجعت الشكمان كله وغيرت العلبه اللى فى النص بنصائح من الاخ المحترم فادى فى طريقة الشراء - رحت شوفت ضغط التكييف وعملت التكيف كله من كمبروسر لكنترول فالف لاكسبنشن لافلتر- السربنتينه اتغسلت لما قالت كفايه –اتاكدنا ان الدوره مافهاش سده- بحط مايه خضرا وطبعا كل شويه تنزل على الارض فى التصليح وتتغير) ولسه عندى المشكله لما اكون ماشى بالراحه ومشغل التكيف الحراره بتدخل فى نص الاحمر ومش عيب مؤشر لانى بنزل ابص بلاقى القربه بتغلى ومش عيب مراوح لانى بلاقى المراوح شغاله وواخده سرعتها وشاكين فى علبه البيئة !!!!.
2-ال ABS : اللمبه عماله تنور وتطفى وطبعا طول ماهى منوره كل مادوس فرامل العربية بتعوم وعلى الكمبيوتر ال4 حساسات منورين ومابقتش عارف ده عيب ايه .
3-حساس الكامه : العربية بتفصل بدرى لما بدوسلها بنزين جامد او وانا مشغل ال Sport ومش بترضى تنقل ولما باخدها بالهداوه بتنقل كانت عملت قبل كده الحركه دى والحساس اتنضف واشتغلت تمام دلوقتى عمال بنضف فيه مافيش فايده .
4-الزيت : فى نشع زيت من عند مدخل البوابه كده وقالولى ده وساخه فى المكنه وغير زيت كذا مره علشان المكنه تنضف وعملت كده ومازلت بتطلع زيت فى الحته دى --- فى نشع فى جمب الماتور اليمين من وعند جوان وش السليندر وبيقلولى ده عاادى .
5-فى رجه فى الماتور على السلنسية وشاكك انها قواعد ماتور.
6-وامبارح نزلت العربيه مضارتش وفى الاخر اكتشفت ان المراوح شغاله على طول ولو حدها لحد مافضت البطاريه وحاليا فاصل المراوح
7-عندى مساعد ورا شمال ضارب زيت (مش مهم ده دلوقتى).

يا جماعه الله يكرمكم عايز ميكانيكى نضيف فى مكان قريب للمعادى ويكون فاهم اوبل وياريت لو حد عارفه يوصيه عليا يشوفلى ايه اللى فى العربية ويظبطلى الدنيا وتقولولى لو حاجيب حاجه استيراد اجيبها منين وياريت مكان قريب كمان ويكون تعامله محترم (مايضحكش عليا من الاخر)
معلش طولت عليكم بس فعلا انا خلاص جبت اخرى مع العربية على كم الفلوس والوقت اللى بيضيع عند الميكانيكه انا اجازتى بقضيها مع الميكانيكى والله لا برتاح ولا بشوف اهلى ولا بيتبقالى فلوس -- ودى اخر مره اصلح فيها لو عملتها بعديها حابيع واستاذنكم سرعه الرد علشان انا 5 ايام فى القاهره ويومين فى طنطا
وشكرا مقدما