الموضوع: المدارس بين مصر والخارج..!

بسم الله الرحمن الرحيم
السلام عليكم
أنا بنتي هتكمل 3 سنين و9 شهور في شهر 9-2013 إن شاء الله واكتشفت إني المفرض أبدا أقدملها علي مدرسة
لسه مش عارف هكمل شوية في الإمارت ولا لأ بس لازم أدور عشان أستقر لأن بعض المدارس فتحت باب التقديم في دبي
عايز أفهم بقي مناهج المدارس:
1- المنهج البريطاني
2- المنهج الإماراتي

1- يدخل الطفل kg1 كام سنة؟ بين 2-3 سنوات ولا بين 3-4 سنوات ؟
2- الطفل يقدر يكمل مدارس إيه في مصر؟ لازم بريطاني ولا يكمل عادي لغات؟ وهل يقدر يكمل أزهري لغات وخاصة لو كان مدخلش إبتدائي لسه؟
3- يقدر يدخل بعد كده جامعات حكومية في مصر ؟
4- إيه المدارس الأفضل في دبي لمن يعرف من المقيمين ؟

ياريت بقي أي معلومات لأني مش فاهم حاجة في النظم الدولية دي

حبيبي............جيتلي في ملعبي بقى :-)

آنا عندي بنتين واحدة في كيه جي ١ و التانية في سنة تانية.......امريكي مش بريطاني

الآسعار في مصر هتزعلك جااااااااامد.......متفكرش فيها دلوقتي

المهم ان ايا كان المنهج هنا هتعرف تدخلها في مصر عادي

الدخول هنا بيك،ن ابتداء من سن ٣ سنين و نص في اول شهر ٩

تبتدي التقديم من شهر ٢ او ٣ حسب المدرسة

و نصيحة حاول تدخلهم امريكي او بريطاني........و حاول تشوف مدرسة بتهتم بالدين مش مجرد بتهتم علشان الوزارة

انا بناتي في مدرسة اسمها الامريكية الدولية في القصيص......وفيه في القصيص مدارس تانية كتير

الامريكية الدولية في مصر من سابع المستحيلات اني اعرف ادخلهم فيها......ب ٥٤ الف في السنة لسنة تانية :-)

هنا بحوالي ١٧ في السنة.....بدون الباص و اللبس...........لو ساكن في الشارقة الباص ب ٦٥٠٠......و لو في دبي ب ٤٥٠٠ او ٥٠٠٠

طبعا لو المدام مش بتشتغل يبقى تجيب لها عربية احسن و اوفر

المدارس في دبي كتيييييييير جدا و فيه منهم كتير كويسين........بس حاول تبعد عن الشويفات.....علشان الفكرة اللي بيروجوا للمدرسة على اساسها اللي هي امكانية نقل الطفل في اي وقت لاي مدرسة من مدارسهم حول العالم مش بتحصل غير في حالة واحدة بس.......ان يكون المدرسة اللي هتنقل لها فيها مكان فاضي......بنتي الكبيرة كانت هناك في كيه جي ٢ و كنت عاوز انزلهم مصر مرتين ، كل مرة يقولوا مفيش مكان.......، حاولت انقلها من سنة و شوية من شويفات راس الخيمة لشويفات الشارقة برضه مفيش مكان.

لو فيه اي اسئلة تاني شوط و ملكش دعوة.