الموضوع: جديد في القسم وارجو المساعده

المشاركة الأصلية كتبت بواسطة abaza2107

السلام عليكم
انا الحمد لله ربنا وفقنى واشتريت ابيزا 2001 1000 سي سي

الف مبروك العربية وربنا يديك خيرها ويكفيك شرها

ولاني جديده عليه الأبيزا فكنت عايز افهم من اعضاء المنتدى الكرام بعض الملاحظات فيها
اولا-العربيه الدبرياج تقيل شويه ولازم اضغط عليه جامد

اعتقد لو كنت راكب هيونداي قبل الأبيزا لازم تشعر ان الدبرياج تقيل - وتقل الدبرياج نسبي - يعني اللي انت تحسه تقيل يكون بالنسبة لحد فينا متعود علي الأبيزا يكون عادي
انتظر لأول مقابلة للقسم ونجربه ونقولك

ثانيا-الطلعه على الأولاني بترعش شويه وبلاحظ ان عدد لفات الموتور
بيعلى شويه وينزل شويه وترعش وبعدين تطلع

حاجة من ثلاثة
يا انت مش ظابط رجلك مع الدبرياج
يا أما لو ربطنا الشكوي الأولي مع دي = بلية دبرياج وديسك (يعني طقم كامل علي بعضه)
يا اما - ودة اغلب الظن - سيرفيس كامل ونظافة للحساسات والبوابة والرشاشات يعني سيرفيس كامل للعربية

ثالثا -صوت الموتور على الأول والثاني والثالث جيد واول ما اغير للرابع صوت الموتور بيعلى جدا مع اني عدد لفات الموتور على 2 او 2.5
وكذلك الخامس

انت فعلا شكلا نازل من هيونداي او ياباني
احنا عربياتنا كدة - ومعظم الفولكس كدة
صوت الموتور عالي لو انت فاتح الزجاج وماشي بسرعة
اعتقد ان عربيتك طبيعية جدا ومافيهاش حاجة
وبردو تشيك علي الشكمان والجوان بتاع الماسورة والفرن

رابعا - الغيار الخامس فيه عضه غريبه كأن الواحد بيشحط الغيار بس مش بقوه

غير زيت الفتيس الأول وشوف العيب هيختفي ولا لاء
ولازم تجيب الزيت بتاعها المذكور في الكتالوج بتاع العربية

خامسا -بحس بعومان احيانا من الأمام وسنه بوش بسيطه في الدريكسيون

جلب مقصات وضبط زوايا واكشف علي البطاحات

سادسا -لما العربيه بتعدي على طريق غير مستوي شويه بتتنطط من الخلف

بتتنطط جامد اوي ولا مجرد ناشفة في المطبات ؟؟

سابعا -المفروض صيانات العربيه كل ايه امتى زي مثلا البوجيهات كل عشرين وكده يعني

الصيانات بتاعتها تقريبا علي مواعيد ثابتة هقولك الأصول والي احنا بنعمله لطبيعة بلدنا وقيادتنا
1- زيت المحرك : حسب نوعية الزيت
2- فلتر الزيت : كل 3 غيارات او 30 الف ايهما اقرب
3- زيت الفتيس : كل 60,000 او كل سنتين ايهما اقرب
4- زيت الباور : كل 60,000 او كل سنتين ايهما اقرب
5- زيت الفرامل : كل 60,000 او كل سنتين ايهما اقرب
6- سير الكاتينة : كل 60,000 للكتالوج لكن احنا بنقول كل 40,000 (علي فكرة الكتالوج قايل 90,000 لو مشيك كله طوالي)
7- سير الأدارة (الدينمو) : كل 60,000 للكتالوج لكن احنا بنقول كل 40,000
8- فلتر الهوا : كل 60,000 للكتالوج لكن احنا بنقول كل 6 شهور علشان التراب عندنا في مصر
9- فلتر البنزين : كل 30,000 للكتالوج بس احنا بنقول كل 15,000 علشان بنزين بلدنا
10- فلتر الغبار بتاع التكييف : كل 60,000 للكتالوج بس خليها كل صيف احسن
11- بوجيهات : كل 30,000 لل3 شمعة العادي و100,000 لل1 شمعة الأيرديوم
12- سائل التبريد : كل 60,000 او كل سنتين للكتالوج بس يستحسن لو كل صيف (سنوياً)


شوف كدة لو انا نسيت حاجة قولي عليها

ثامنا -مفاتيح الزجاج الخلفي اسفل الكاست هل هيا بترفع بس ولا ترفع وتنزل

لا طبعا مش طبيعي -
نظف المفاتيح او غيرها لو مشتغلتش بعد التنظيف باكاي بتاع الألكترونيات

تاسعا- عاوز افك لمبات الشبوره وانظفهم ازاي

ماجربتش قبل كدة
بس احمد مبارك عملها في عربيته
فك الفوانيس كلها وغسلها ونظفها وركبها تاني
اعمل بيها موضوع منفصل وان شاء الله يدخل ويرد علي حضرتك

وانا اسف جدا للتطويل بس انا جديد في قسم السيات فاستحملوني
وشكراا للردود مقدما

انت نورت القسم وشرفتنا وسعدنا بموضوعك ويسعدنا دائما تقديم الحلول والمساعدة ان امكنا ذلك
وما توفيقي الا بالله

باختصار لموضوع الصيانات
كل الزيوت ماعدا زيت الموتور كل 60 الف او كل سنتين
كل السيور كل 40,000
كل الفلاتر كل 30,000
البوجيهات كل 30,000
التبريد والتكييف كل صيف
ولو قدرت تعمل الصيانات في مواعيد قبل ميعادها يكون احسن ليك وللعربية

تحياتي