الموضوع: تقرير صيانة الالف كيلو للصني الجديدة؟

بسم الله الرحمن الرحيم...............
الحمد لله انا وصلت بالعربية ل1300 كيلو و ده طبعا لاني ما بتحركش بيها كتير و قعدت اسبوعين مركونة لحد ما اترخصت.........
المهم لما حان معاد صيانة الالف و العداد و صل 870 كم توكلنا على الله و سافرنا لبني سويف اللي فيها اقرب توكيل ليا _ اسمه البركان_ بما اني ساكن ف المنيا و المسافة بينهم 130 كم تقريبا.
المهم طلعت الصبح الساعة عشرة الا عشرة و اخدت طريق الصعيد الحر و الطريق ده تحفة بمعني الكلمة انا كنت ماشي من 120-150 و ما كنتش حاسس باي اختلال او عومان او اي حاجة بالعكس العربية كانت ثابتة جدا ، فقط بتحس بالهوا بيخبط ف العربية بس ده احساس فقط لكن العربية ما بتتحركش او بالكتير حركة بسيطة لو ماسك الدركسيون بايد واحدة مش هتحس غير بالاحساس بتاع الهوا بيزيح العربية لما تعدي عربية نقل او كدة.

المهم انا طبعا قلت اجرب امشي شوية فوصلت ل170 و برده كانت كويسة و ما كنتش حاسس بقلق خالص بس ده كان للتجربة فقط .

وصلت التوكيل على 11:15 و سلمتهم العربية و قلت للمهندس على شكوتين كنت باشتكي منهم و هما: 1-البلوتوث ساعات بيعلق و في ده قاللي اروح لشركة اوتو تك في العاشر و اللي ضمان الكاسيت تبعها.

2- صوت طقة خفيفة باسمعه لما ادوس فرامل للاخر بحس ان العربية تقف سواء كانت ماشي بسرعة او ببطء.

و استنيت شوية ف المكتب يعني لمدة ساعة ونص تقريبا و بعدين استلمت العربية و طلع يجربها معايا و الصوت اختفى الحمد لله هو انا ما فهمتش عمل ايه اوي بس هو الصوت كان من ورا من الناحية الشمال و تقريبا هو ربط على العفشة ف الجزء ده.

و حتى كان في صوت مجنني و هو صوت مية بتلق كده و ما كنتش عارف جاي منين اتاري كان في ازازة مية تحت الكرسي و انا مش واخد بالي.

اخترت زيت 10000 كيلو بس مش عارف حطوه نوع ايه بالظبط و نسيت اسالهم.

و انا راجع بقى قلت ادي اول الف خلصت خلينا نسرع شوية فطلعت بالعربية لحد 180 و طبعا زي ما قلت الطريق ما يحسسكش بحاجة اكيد كنت الدريكسيون كويس و العربية ما كانتش وحشة في الثبات و ما كانتش بتعوم . بس طبعا ده برده كان للتجربة لمدة 5 او 10 دقايق بس ما اعرفتش ازود عن 180 ما كانتش راضية تجيب اكتر فقلت يمكن الريح عكس اتجاهي. لكن اغلب الطريق كنت ماشي من 140-160.

هذا و صلى الله و بارك

1000 مبروك على الصيانة يا باشا وربنا يكفيك شرها ويديك خيرها