انا اتكلمت مع خطيبي كتير فى موضوع السفر دة لانه كان دايما بيقولى توافقى مثلا لو جالى شغل فى اى حتة زى السعودية ولا البلاد العربية .. بصراحة احترت اوى .. هو بيقولي نكون نفسنا و نرجع !! بس من النمازج اللى قدامى مفيش حد اتعود و عاش برة مصر و ارتاح و فكر يرجعلها !! طيب و وبعدين ؟؟ اعيش انا ازاى بعيد عن مامتى و اهلى و قرايبي و صحابي و النادي بتاعى و مارينا و شوارع مصر و رمضان و صلاة التروايح و التهجد و خناقى مع الناس اللى بتكسر عليه و عم ابراهيم السايس و محمد ابنه اللى كرهو عيشتهم منى ...

هسيب كل دة و اروح اترمى فى بلد مفرفش فيها حد و افضل انا قاعدة بين 4 حيطان و كل دة عشان شوية فلوس!!

طيب ما الواحد لو معاه 1000 جنيه هيظبط نفسه على قدهم و لو معاه 10000 جنيه بيظبط نفسه على قدهم برضه..ساعتها الاحتياجات بتزيد بس مش الاحتياجات الاساسية .. انا بحس الحاجات اللى مش مهمة هى اللى بتزيد و بتبتدي تحس انك مش قادر تعيش من غيرها ..

مش عارفة .. محتارة اوى

فى ستات قلبها جامد ممكن تسفر اجوازهم يشتغلو برة و يفضلو هم فى مصر و يروحو وييجو فى الاجازات على اجوازهم..بس دي مش عيشة ولا اقبلها على نفسي و لا على جوزى لانه كدة هتعامل معاه كانه المصرف العربي المتحد!!! بجد متبقاش عيشة و بستغرب اوى اللى قادرين يعيشو كدة